2024 2023 2022 Flere år...
07-02-2010
Inatsisartut Nunanut allanut Sillimaniarnermullu Ataatsimiititaliaat piffissami 1. februar - 5. februar 2010 Bruxellesimut Københavnimullu paasisassarsiorluni angalavoq
Inatsisartuni ataatsimiititaliatut nutaamik katitigaasutut nutaanillu ilaasortalittut ataatsimiititaliap kissaatigisimavaa Kalaallit Nunaata Bruxellesimit sinniisoqarfia tikeraassallugu, taamatullu aamma ataatsimiititaliap suliassarfiinut Folketingimi ataatsimiititaliat pingasut attuumassutillit ataatsimeeqatigissallugit.
Suliassaqarfinni assigiinngitsuni sulianut tunngatillugu immikkut ilisimasalinnit assigiinngitsunit Kalaallit Nunaata EU-llu akornanni pissutsinut atatillugu ullutsinni sammineqartut pillugit Ataatsimiititaliaq saqqummiivigineqarpoq. Tamatumani immikkut taaneqassapput OLT-mik aaqqissuussineq, Kalaallit Nunaata EU-llu peqatigiinnissamik isumaqatigiissutaat, puisinit nioqqutissiat pillugit peqqussut aamma EU-p issittumut tunngasuni naalakkersuinikkut peqataanera.
Piffissami sivikitsumik qulequttat annertuut amerlasuullu sammineqarput, tamatumunngalu peqatigitillugu ataatsimiititaliamit immikkullu ilisimasalinnit paasissutissanik soqutiginartunik paarlaasseqatigiittoqarluni sukumiinerusumik malersorneqaqqittussanik. Tamatumani assersuutigineqarsinnaapput EU-p issittumi inissisimanera, Kalaallit Nunaata EU-llu akornanni peqatigiinnissamik isumaqatigiissut, Kalaallit nunaata nunatut OLT-mik aaqqissuussinerup iluaniittutut, taamatullu aamma Kalaallit Nunaata EU-llu akornanni toqqaannartumik isumaqatigiissutit iluanni, siunissami periarfissai. Kiisalu minnerunngitsumillu EU-p puisinit nioqqutissianik eqqusseqqusiunnaarnermik peqqussutaa sammineqarpoq, tamatumani ataatsimiititaliap Europaparlamentip siulittaasuata tullia Diana Wallis ataatsimeeqatigaa puisinillu nioqqutissianik eqqusseqqusiunnaarnissamik peqqussut naggueqatigiillu Inuit nioqqutissiaasa peqqussutip avataaniitinneqarnerannik saqqummiivigineqarluni.
Tikeraarnerminut atatillugu ataatsimiititaliaq aamma periarfissinneqarsimavoq Danmarkip aalajangersimasumik EU-mi sinniisuutitaqarfiani pisortap tullia Jonas Bering-Lisberg kiisalu Danmarkip aalajangersimasumik EU-mi sinniisuutitaa ambassadør Poul Skytte Christoffersen naapeqatigissallugit.
Bruxellesimut paasisassarsiorluni angalaneq Kalaallit Nunaata Sinniisoqarfiani ministerråd Lida S. Lennert sinniisoqarfimmilu allatsimi Naja Lund pitsaasumik ikiuunnerisigut aaqqissuunneqarlunilu ingerlanneqarpoq, naggaserneqarluni danskit NATO-mut ambassadøriannik ataatsimeeqateqarnermik, tamatumalu kingorna NATO-p qullersaqarfianut pulaarnermik. Ataatsimiinnermi taakkunani ataatsimiititaliaq NATO-p massakkorpiaq ingerlatai, isumannaallisaanermut tunngatillugu naalakkersuinikkut apeqqutit qulliunerusut kiisalu NATO-p siunissami isumannaallisaanikkut inissisimanissaa pillugit saqqummiivigineqarpoq.
Paasisassarsiorluni angalanermi immikkoortutut kingullertut Folketingip Kalaallit Nunaat pillugu ataatsimiititaliaa, illersornissamut ataatsimiititaliaa aamma avatangiisinut pilersaarusiornermullu ataatsimiititaliaa ataatsimut ataatsimeeqatigineqarput. Ataatsimiinnermi apeqqutit nunanut allanut tunngasutigut naalakkersuinikkut ingerlatsinermut, taamatullu aamma ajutoortoqarsinnaaneranut upalungaarsimanissamut tunngasut suliallu ingerlasut allat sammineqarput. Ataatsimeeqateqarnerit taakkua aamma ammasumik paaseqatigiiffiusumillu ingerlanneqarput.
Ataatsimiititaliap siulittaasuata nalilerpaa ullut marluk/pingasut ataatsimiititaliap suliassaanut tunngatillugu ilinniarfiusimaqisut, aamma ataatsimiititaliani namminermi suleqatigiinneq eqqarsaatigalugu. Ataatsimiititaliamut ilaasortat suleqatiginnikkusuttuupput, assigiinngitsunik isumaqartoqarsinnaagaluartoq ataatsimiititaliap inissisimanerata sulineratalu ataatsimut anguniagaqarfiunissaat ataatsimoorfiulluni. Ataatsimiititaliap siulittaasuata naggataatigut Kalaallit Nunaata Sinniisoqarfia tikeraarneq sioqqullugu nalaanilu sulisimanerat qujassuteqarfigaa.
Paasissutissat sukumiinerusut ataatsimiititaliap siulittaasumit uunga attaveqarluni pissarsiarineqarsinnaapput:
Justus Hansen, angallattagaq +299 53 12 10.
Nunanut allanut Sillimaniarnermullu Ataatsimiititaliaq tallimanik ilaasortaqarpoq: Inatsisartunut ilaasortat Justus Hansen, Demokraatit, Jane Petersen, Inuit Ataqatigiit, Hans Aronsen, Inuit Ataqatigiit, Aleqa Hammond, Siumut aamma Knud Kristiansen, Atassut.