2024 2023 2022 Flere år...
10-02-2010
Inatsisartut politiit misissuinerannik sunnguamilluunniit kinguarsaanngillat
AG, nalinginnaasumik pingasunngornikkut naqitatut saqqummertartoq, taamaattoq naqitatut qarasaasiakkullu aaneqarsinnaasutut marlunngornermi ulloq 9. februar unnukkut saqqummereerpoq.
Pissutsilli taamaakkaluartut AG-mi saqqummersumi oqaatigineqarpoq ”Inatsisartut siulittaasuat Josef Motzfeldt telefonikkut mail-ikkullu attaveqarfiginiarneqarsimagaluartoq, iluatsinngitsumilli” soorlu aamma AG allattoq ”aamma Inatsisartut allattuunerat Ellen Kolby Chemnitz oqaaseqartinniarlugu attaveqarfiginiarneqarsimagaluartoq”. AG-mit oqaaseqartitsiniarluni saaffiginnissutit taamaalillutik pisimapput marlunngornermi ulloq 9. februar ullaakkat, aviisip aaqqiissuunneqarnerata naammassilivinnerani imaluunniit naqiterneqarnissaa sioqqutitsiarlugu, taamalu piffissaagallartillugu saaffiginnissutitut oqaatigineqarsinnaanngilluinnarlutik.
Pissusiviusut saqqummersinneqarnissaat siunertaralugu oqaatigineqassaaq Inatsisartut Siulittaasoqarfiat Allattoqarfimmilu aqutsisut ataasinngornermiit sulinerminnut atatillugu angalammata, taamaattumillu pineqartunut ajornarsimalluni AG-p, aviisip saqqummerfissaa nalunaaquttap akunnialunnguanik sioqqullugu, Allattoqarfimmut saaffiginnissutaa takussallugu, taamalu aamma Allattoqarfik periarfissaqarsimanani saaffiginnissut qisuariarfigissallugu.
AG-p saqqaa atuarlugu ajuusaarnarluinnartumik isumaqalersitsisinnaavoq nunatta inatsisiliortui naalakkersuinermik sulialinnik arlalinnik politiinut suliassanngortitsinermik politiit misissuinerannik kinguarsaasut. Soorunami tamanna ilumooranilu pissutsit taamaanngilluinnarput.
Suliassaq allaffissornerinnakkut ingerlanneqarpoq, paasissutissanik paarlaasseqatigiittarnermi naalakkersuinikkut akisussaasut akuliutsinneqassanatik.
Inatsisartut Allattoqarfiat Politimesterip misissuineranik kinguarsaassalluni soqutigisaqaranilu kissaateqanngilluinnarpoq Politimesterimillu saaffiginnissutit tamarmik tiguneqartut naammassineqartarlutik. Tamanna aamma suliassami matumani soorunami atuuppoq.
Inatsisartut Allattoqarfiata ilanngullugu erseqqissassavaa Allattoqarfik politiinut tunniussinerup siusinnerusukkut Naalakkersuisunut ilaasortaasimasunut tunngasortaata misissuiffigineqarneranut akuliusimanngimmat taamatullu aamma suliap ingerlanerani akuliutsinneqanngilluinnarsimalluni, soorlu aamma Inatsisartut Allattoqarfiata paasisinnaanngilluinnaraa aviisip inatsisiliortussaatitaasutut aqutsisussaatitaasutullu pissaanerup immikkoortinneqarsimanerat paasisimanngimmagu.
Inatsisartut Allattoqarfiata naggasiullugu ilisimatitsissutigissavaa suliami sukumiinerusunik paasissutissiinissaminut piareersimagami, kissaatiginarlunilu taamatut saaffiginnissutit akissuteqarfiginissaannut iluamik piffissaqartinneqartarnissaq.
Ellen Kolby Chemnitz
Inatsisartut Allattuunerat