2024 2023 2022 Flere år...
17-02-2010
Cop 15 aamma Kalaallit Nunaat
COP15-ip naammassineranit maanna qaammatip aappaa avillugu qaangiuppoq, nunallu ataasiakkaat silap pissusaa pillugu anguniakkatik 31. januar FN-imut nalunaarutigisussaagaluarpaat.
Inatsisartut Eqqissisimatitsinermut Avatangiisinullu ataatsimiititaliaata silap pissusaa pillugu oqallinneq malinnaaffigaa, COP15-imilu ataatsimut angusat ugguaralugit. Isumaqarpugut nunarsuaq tamakkerlugu tamanna unammiligassaasoq nunarsuarlu tamakkerlugu sulissutigineqarnissaa pisariaqartoq.
Taamaattumik nunanit CO2-mik aniatsitsinerpaaffiusunit annertunerusumik isumaqatigiinniarusussuseqarneq neriuutigisimagaluarparput.
Taamaattorli Kalaallit Nunaata angusarisai nuannaarutigaavut. Nunarsuarmi sila pillugu unammilligassanut Kalaallit Nunaata peqataanera naammagisimaarparput, ilutigalugumi suliffissuaqarnitta ineriartortinnissaanut periarfissineqaratta.
Illuatungilersuinertut pissusilersorneq ilisimaaraarput, taamaakkalurtorli illersorneqarsinnaasoq isumaqarfigaarput. Tunngaviatigut Kalaallit Nunaat nunaanngilaq CO2-mik annertuumik aniatitsisuusoq, tamatumalu saniatigut pinngortitamik mianerinnittummik nukimmik pilersuisinnaaneq pinngortitakkut periarfissaqarpugut. Kiisalu aningaasarsiornikkut annertusaanissamut periarfissaqarumanngitsutut inissisimanngilagut.
Piffissami 2013-mit 2020-mut CO2-mik aniatsitsinerup annikillisineqarnissaanut Naalakkersuisut aalajangersimasunik suliniuteqarnissamut saqqummiussinissaat qilanaaraarput. Aammattaaq piffissami 2008-mit 1012-mut Kyoto-mi isumaqatigiissut aallaavigalugu aniatsitsinerup annikillisarneqarnissaanik iliuusissanik aalajangersimasunik ujartuivugut.
Silap pissusaata allanngoriartornera piviusuuvoq, taamaattumittaaq Kalaallit Nunaani ukiuni qulikkaani tulliuttuni allannguutaasussat suuneri pillugit misissueqqissaarnernik ujartorpavut. Soorlu nunatsinni sila ingasannerusumik allanngorluinnartoq misigissavarput aamma tamanna qanoq kinguneqassava?
Sapinngisaq malillugu Inatsisartut aamma innuttaasut annertunerpaamik peqataatinneqarnissaannut Naalakkersuisut kaammattorumavavut, taamaalilluta suliap naammassineqarnissaanut tamatta peqataasinnaassagatta, silallu pissusaanik periarfissat nalornissutillu ammasumik oqallisigisinnaassagatsigit.
?
Naaja Nathanielsen
ataatsimiititaliap Siulittaasua.