2024 2023 2022 Flere år...
08-03-2010
Ilaqutariinnermut Ataatsimiititaliap paasisassarsiorluni angalanera
Ilulissanut Aasiannullu ataatsimiititaliap paasisassarsiorluni angalanissaanut Qaasuitsup Kommunia sivikitsumik piffissaqartinneqarluni pilersaarummik suliaqarsinnaammat Ilaqutariinnermut Ataatsimiititaliap qujassutigaa.
Ilulissani Aasiannilu pissutsit pillugit Qaasuitsullu Kommuniani isumaginninnikkut tunngasunik Ilaqutariinnermut Ataatsimiititaliap paasisaqarnerunissaa angalanermi siunertarineqarpoq.
Meeqqanut, inuusuttunut, innarluutilinnut, utoqqarnut il.il. sullissiviit assigiinngitsut ataatsimiititaliap takuniassavai. Ataatsimiinnerni taakkunani sullissivinnik takuniakkanik sulisunik atuisunillu oqaloqateqarnissamut ataatsimiititaliami ilaasortat periarfissaqassapput taamaaliornikkullu pissutsit ulluinnarnilu atugaat paasisaqarfiginerusinnaassallugit.
Tamatuma saniatigut kommunimi qinikkat aqutivillu ataatsimiititaliap ataatsimeeqatigissavai taamaalilluni isumaginninnermut tunngasuni maleruaqqusanik atuuttunik aqutsineq pillugu ataatsimiititaliaq ilisimatinneqarsinnaaqqullugu. Tamatumani pingaartumik pineqarput meeqqat inuusuttut, pensionistit innarluutillit suliffissarsiortullu, tamatumanissaaq pisortanit ikiorsiissutit maleruaqqusat. Taamaalilluni kommunimi illoqarfiit ilaanni inuuniarnikkut atukkat pillugit kommunimit kommunimilu innuttaasunit paasissutissanik pingaarutilinnik ataatsimiititaliaq katersisinnaavoq.
Ataatsimiititaliap suliassaqarfimmi iluani paasissutissanik pissarsisinneqarnissani salliutippaa, taamaalilluni ilisimalikkat tamakku inatsisiliornermi tunngavissatut aammalu aningaasanut inatsisissatut siunnersuutissamut atatillugu aalajangiinernut atorneqarsinnaassallutik.
Ilaqutariinnermut Ataatsimiititaliami ilaasortat makku peqataassapput: Debora Kleist, (IA), Siulittaasoq, Jane Petersen, (IA), Siulittaasup tullia, Ruth Heilmann, (S), Astrid Fleischer Rex, (D) og Knud Kristiansen (A).
Annertunerusumik paasisaqarusukkaanni Ilaqutariinnermut Ataatsimiititaliami siulittaasoq, Debora Kleist, mobil 49 03 90, saaffigineqarsinnaavoq.