2024 2023 2022 Flere år...
09-03-2010
Ilulissaniit Nanortaliup akornanni illoqarfinni puisip amiinik tunisinerup unitsinneqarnera
Aalisarnermut- Piniarnermut Nunalerinermullu Ataatsimiititaliap ulloq 1. marts ataatsimiinnermini Ilulissaniit Nanortaliup akornanni illoqarfinni puisit amiinik tunisinerup unitsinneqarnera oqaluuseraa. Nunaqarfinni isorliunerusunilu puisit amiinik tunisineq suli ammatinneqartoq ataatsimiititaliamit paasineqarpoq.
Tunisinerup unitsinneqarnerani tunuliaqutaasinnaasut pillugit maannakkut tunngavilersuutaasut ataatsimiititaliamit ilisimaneqanngillat. Taamaattumik tunisinerup unitsinneqarneranut tunngavilersuutit sukumiinerusumik qulaajarneqarnissaat siunertaralugu Aalisarnermut- Piniarnermut Nunalerinermullu Naalakkersuisumut Ane Hansenimut saaffiginnittoqassasoq ataatsimiititaliap aalajangiuppaa.
Taamaattoq tunisinermut unitsitsinermut atatillugu inuussutissarsiornikkut eqqungaanerpaat salliutinneqarnissaat Ataatsimiititaliap pingaartippaa. Taamatuttaaq Ataatsimiititaliap Naalakkersuisunut kaammattuutigissavaa puisit amiinik nunanut allanut niuerneq pitsanngorsaqqinniarlugu periarfissanik misissuineq sumut killinnersoq ataatsimiititaliamut nassuiaqqullugu.
Hans Aronsen
Ataatsimiititaliap siulittaasua