2024 2023 2022 Flere år...
11-03-2010
2010-mi Inatsisartut ataatsimiinnerinit naqeqqaakkanik suliaqarnissamut neqerooruteqaqqusineq
Inatsisartut 2010-mi ataatsimiissutaasa naqeqqaaganngorlugit elektroniskimik tunniussassatut suliarineqarnissaannut Inatsisartut Allattoqarfiat matumuuna neqerooruteqaqqusivoq.
Suliakkiissutigineqartut tassaapput ukioq 2010-mi Inatsisartut ataatsimiinneri.
Ukiut tamaasa sapaatit akunneri arfinillit missaannik sivisussusilimmik upernaakkut ataatsimiittoqartarlunilu sapaatit akunneri arfineq pingasut missaannik sivisussusilimmik ukiakkut ataatsimiittoqartarpoq. Tamatuma saniatigut immikkut ittumik ataatsimiittoqarsinnaasarpoq.
Marlunngornermi, pingasunngornermi sisamanngornermilu nal. 13-18 Inatsisartut nalinginnaasumik ataatsimiittarput. Pisulli ilaanni sapaatip akunneranut ullut ataatsimiiffiit amerlanerusinnaasarput. Ullormut ataatsimiinneq agguaqatigiisillugu nalunaaquttap akunnerinik 6-inik 7-nilluunniit sivisussuseqarajuppoq.
Suliassaq tassaavoq ullup ataatsimiiffiup naaneranit tunniussinissamut piffissap erseqqinnerusumik isumaqatigiissutigineqartup ingerlanerani kalaallisut elektroniskimik allatanik tunniussisarluni immiussat tunngavigalugit oqallinnerit tamarmiusut allattorneri. Oqallinnerit kalaallisut ingerlanneqarneri danskisut nutserneqassanngillat. Suliassamuttaaq ilaapput kalaallisut naqeqqaakkanik kukkunersiuineq, tamatumalu kingorna imaqarnilianngorlugit aaqqissuussineq.
Neqeroorutinit tigusat naliliiviginerini piffissaq eqqorlugu tunniussinissaq suliallu qaffasissumik pitsaassuseqarnissaat annertuumik aalajangiisuutinneqassaaq.
Naqeqqaakkanut piumasaqaatit siusinnerusumut sanilliullugu allanngortinneqarput, taamaalilluni 72-96 tiimiinnarnik piffissaliilluni naqeqqaakkat tunniunneqarnissaat piumasaqaataajunnaarluni. Taamaalillunilu naqeqqaakkat tunniunneqarnissaannut piffissarititassap Allattoqarfiup suliarinnittullu akornanni isumaqatigiissutigineqarnissaa naatsorsuutigineqarpoq. Tamanna neqeroorutikkut ersersinneqassaaq.
Inatsisartut ataatsimiinneri tamakkerlugit naqeqqaakkat quppernerit nalinginnaasut agguaqatigiisillugu 2.500-sarput. Qupperneq nalinginnaasoq ataaseq tunngavigalugu aki naatsorsorneqartarpoq. Qupperneq nalinginnaasoq ataaseq oqaasertalittut allatami naqinnertut 2.400-itut naatsorsorneqartarpoq (tassa imaappoq naqinnerit, killiffilersuutit oqaatsillu akorngi naqinnertaqanngitsut). Elektroniskiusumik allariikkat, soorlu oqaaseqartartut saqqummiussaat allallu Inatsisartut allaffeqarfiannit pissarsiarineqarsinnaasut immikkut akileqartillugit naqeqqaakkanut tunniunneqartunut ilanngunneqartassapput.
Suliap isumagineqarnissaani aalajangersimasumik isumaqatigiissuteqarnikkut teknikikkut atortulersuutinik annikinnerusumik Allattoqarfik atukkiussisinnaavoq. Taamaattorli atortunut atukkiunneqartunut atortunulluunniit isumaqatigiissutip ilarisaatut neqerooruteqartumut atugassiissutigineqartunut atatillugu teknikikkut Allattoqarfik ikorfartuissanngilaq.
Neqeroorummik tunniussivissaq pingasunngorneq 31. marts 2010-imut killeqarpoq. Neqeroorutitut tunniunneqartut Inatsisartut Allattoqarfiata tamakkerlugit atorumanagit aalajangeriaannaavoq. Neqeroorummik akuersinermi suliassaq pillugu sapaatip akunnerani 14-imi immikkut isumaqatigiissusiortoqassaaq.
Ilusiliinissamut piumasaqaatit neqeroorummillu tunniussinissamut paasissutissanik tunniussinissaq pillugu Allattaaneq Ellen Kolby Chemnitz, tlf. 34 61 04 imaluunniit e-mailikkut ekc@inatsisartut.gl saaffigalugu pissarsiariniarneqarsinnaapput.
Inatsisartut Allattoqarfiat
Postbox 1060 ? 3900 Nuuk
E-mail: inatsisartut@inatsisartut.gl