Nutaarsiassat

12-03-2010

NAAJA NATHANIELSENIMIT, PER BERTHELSENIMIT, AQQALUAQ B. EGEDEMIT AAMMA NIELS THOMSENIMIT

NAAJA NATHANIELSENIMIT, PER BERTHELSENIMIT,

AQQALUAQ B. EGEDEMIT AAMMA NIELS THOMSENIMIT

(Aningaasaqarnermut Ataatsimiititaliamut ilaasortat)

TUSAGASSIORFINNUT NALUNARUT

Sapaatip akunnerani matumani Aningaasaqarnermut Ataatsimiititaliap Nukissiorfinnut pulaarnera, Ineqarnermut Attaveqarnermullu Naalakkersuisoqarfiup aallartitaanit peqataaffigineqartoq, tusagassiorfitsigut sammineqarpoq. Naalakkersuisoqarfiup pineqartup suliassaqarfimmini ataatsimiinnernut aallartitaqartitsisarsinnaanera Aningaasaqarnermut Ataatsimiititaliami ilaasortat taaneqartut assortunngilaat. Suliassani Naalakkersuisoqarfiup suliamut tunngatillugu ilisimasanik tunniussaqarfigisinnaasaani taamatut peqataatitaqarneq pissusissamisuuginnarlunilu naapertuuppoq. Pisumi matumani nalorninarsimavoq Naalakkersuisoqarfik sunik tunniussaqarsinnaanersoq, taamaattumillu nalilerneqarluni peqataaneq suliamut attuumassuteqanngitsoq. Aallartitaq malillugu ataatsimiinnermi oqaluuserineqartut pillugit Naalakkersuisoqarfimmut ingerlatitseqqiinnartussaasimavoq, apeqqutinut akissuteqarani paasissutissanilluunniit itisiliinani. Tamatuma kingorna Naalakkersuisunut ilaasortaq akisussaasoq Jens B. Frederiksen tamanna pillugu inerititaqarfiusumik oqaloqatigineqarsimavoq. Jens. B. Frederiksen malillugu aallartitap peqataaneranut pissutaasimavoq Ataatsimiititaliaq siunissami pitsaanerusumik sullissinnaajumallugu Ataatsimiititaliatulli paasissutissanik taakkuninnga pissarsinissaq. Naalakkersuisoqarfiup aallartitaqarneranik naammagisimaarinninnginneq Jens B. Frederiksenip tigulluarpaa tusaatissatullu tigullugu.

Nukissiorfinnit ataatsimiinneq pivoq Aningaasaqarnermut Ataatsimiititaliap Nuummi, suliffeqarfippassuit oqartussarpassuillu soqutiginartut angerlarsimaffigisaanni, pulaaqattaarneranut atatillugu. Nukissiorfiit saniatigut Ataatsimiititaliap taamatuttaaq pulaarpai Kommuneqarfik Sermersooq, KANUKOKA, Akileraartarnermik Aqutsisoqarfik, Grønlandsbanken, Greenland Venture, Niuernermik Ilinniarfik, Royal Greenland aamma Sulisitsisut. Pulaaqattaarnerup siunertaraa Ataatsimiititaliap suleqqinnissaanut ilisimasanik isumassarsianillu katersinissaq.

Paasissutissat sukumiinerusut ukununnga saaffiginnilluni pissarsiarineqarsinnaapput:

Naaja Nathanielsen, oqarasuaat angallattagaq 29 57 04.

Aqqaluaq B. Egede, oqarasuaat angallattagaq 22 69 76.

Per Berthelsen, oqarasuaat angallattagaq 55 33 61.

Niels Thomsen, oqarasuaat angallattagaq 58 66 36.