2024 2023 2022 Flere år...
08-04-2010
Oqaaseqarnissamut piffissaliussat nutaat taasissutigineqarnissaat
Immikkoortoq 31-p, tassalu Kalaallit Nunaanni Inatsisartut Suleriaasiata allanngortinneqarnissaanik siunnersuutip, (Oqaaseqarnissamut piffissaliussat allanngortinneqarnerat), saqqummiunneqarnissaa Siulittaasoqarfimmit ullumi aalajangiunneqarpoq.
Immikkoortoq tallimanngornermi ulloq 9. april ataatsimiinnermi ullormut oqaluuserisassanut nassuiaateqareernermi oqaluuserineqassaaq.
Kalaallit Nunaanni Inatsisartut Suleriaasiata allanngortinneqarnissaanik siunnersuut suleriaatsimi aalajangersakkat naapertorlugit immikkut akuersissuteqarnikkut suliarineqassaaq, taamaalillunilu immikkoortoq aqagu ataatsimiinnermi siullermeerneqassaaq, tamatumalu kinguninngua aappassaaneerneqarlunilu pingajussaaneerneqassaaq. Tamatumani taasinerup kinguninngua aalajangersakkat nutaat atuutilernissaat siunertarineqarluni.
Oqaaseqarnissamut piffissaliussat allanngortinneqarnissaat pillugu makku pingaarnertut paasissutissiissutigineqarsinnaapput:
Inatsisartunut ilaasortat Naalakkersuisullu siunnersuutaannik akissutaannillu atuaalluni saqqummiussisarnerit atorunnaarsinniarneqarput. Tamatumani tunngavilersuutaavoq siunnersuutit akissuteqaatillu immikkoortup oqaluuserineqarnissaa sioqqullugu agguaanneqareertarmata, taamaalillutillu taakku imarisaat Inatsisartunut ilaasortanit Naalakkersuisunillu ilisimaneqalereertarlutik. Taamaattorli atuaalluni saqqummiussinissaq qinnutigineqarsinnaavoq.
Tamatuma saniatigut oqaaseqartartunut tamanut killeqanngitsumik apeqquteqarsinnaaneq maanna atuuttoq ima allanngortinneqassaaq; partiit ataasiakkaat tamarmik oqaaseqartartunut ataasiakkaanut tamanut annerpaamik pingasoriarlutik apeqquteqarsinnaallutik aammalu nammineq oqaaseqartartorisat sapinngisamik apeqquteqarfigineqartassanatik.
Oqaaseqarnissamut piffissaliussat allannguutaasa pingajuattut taaneqarsinnaavoq naggataarutaasumik oqaaseqarnermi apeqquteqartoqarsinnaajunnaarlunilu oqaaseqaateqartoqarsinnaajunnaarmat.
Kiisalu nutaatut periarfissiissutigineqarpoq immikkoortunik immikkut ittunik, soorlu ammaanermi oqalugiaateqarnermi aningaasanullu inatsimmik oqaluuserinninnermi Siulittaasoqarfiup oqaaseqarnissamut immikkut piffissaliisinnaanera.