2024 2023 2022 Flere år...
09-04-2010
Ullormut oqaluuserisassani immikkoortoq 31-p suliarineqarnera - Oqaaseqarnissamut piffissaliussat allanngortinneqarnerat
Inatsisartut upernaakkut ataatsimiinnerminni ullormi siullermi immikkoortoq 31 suliaraat, tassalu “Kalaallit Nunaanni Inatsisartut Suleriaasiata allanngortinneqarnissaanik siunnersuut. (Oqaaseqarnissamut piffissaliussat allanngortinneqarnerat)”.
Immikkoortup siullermeerneqarnerani partiit illuatungiliuttut aappaat oqaluttarfimmit nalunaaruteqarpoq siunnersuut ullormi ataatsimi siullermeerneqartussatut, aappassaaneerneqartussat pingajussaaneerneqartussatullu oqaluuserisassanngortinneqarsimammat suleriaaseq unioqqutinneqarsimasoq.
Innuttaasunut eqqortumik paasissutissiinissaq eqqarsaatigalugu erseqqissaatigineqassaaq suleriaaseq atuuttoq unioqqutinneqarnani malinneqarmat. Aammattaaq allaffeqarfik isornartorsiorneqarpoq, akissuteqarsinnaanngitsulli oqaluttarfimmit ilanngunneqarnerat naleqquttuunanilu inatsisartoqarnermi pitsaasumik pissusilersornissamut naapertuutinngilaq.
Siunnersuut Siulittaasoqarfimmit sivisuumik suliarineqarpoq aammalu partiit Siulittaasoqarfimmi ilaasortaatitaqartut tamarmik peqataapput, soorluttaaq siunnersuut Inatsisartunut saqqummiunneqarnissani sioqqullugu partiinut tamanut tusarniaassutigineqarsimasoq. Taamaattumik siunnersuutip saqqummiunneqannginnerani siunnersuutip partiinit ataasiakkaanit partiillu akornanni sukumiisumik oqaluuserineqarnissaanut naammattumik piffissaliisimaneq partiit ilaasa atorluarsimagunanngimmassuk ajuusaarnarpoq.
Suleriaatsimi immikkut akuersissuteqarsinnaanermik aalajangersagaq naapertorlugu (§ 41) immikkorluinnaq ittunik pisoqartillugu siunnersuut ullormi ataatsimi siullermeerneqarsinnaavoq, aappassaaneerneqarsinnaavoq pingajussaaneerneqarsinnaallunilu.
Oqaaseqarnissamut piffissaliussat maanna atuuttut 2008-mi novemberimi aalajangiunneqarput. Oqaaseqarnissamut piffissaliussat allanngortinnerisigut Inatsisartut oqallittarneri nutaarluinnarmik ilusilerneqarput, tassungalu ilanngullugu oqaaseqarnissamut piffissaliussat taamani atuuttut tunngaviusumik allanngortinneqarlutik. Oqallittarnerit eqeersimaarnerusumik ingerlanneqartalernissaannik oqaaseqartartullu pilertornerusumik nikittarnissaannik naalakkersuinermik suliaqartut kissaataannik malinninnissaq tamatumani siunertarineqarsimavoq. Oqaaseqarnissamilli piffissaliussat atuutilersut misilittagaqarfigilernerisigut paasinarsivoq iluarsiissuteqarnissaq pisariaqartinneqartoq.
Taamaalilluni misilittagarilikkat tunngavigalugit Siulittaasoqarfik naliliivoq arlalinnik iluarsiissuteqarnissaq pisariaqartinneqartoq. Tamatumani oqallinnerit uummarinnerunissaannik anguniagaqarsimaneq piviusunngortinniarlugu.
Taamaalilluni tamanna naammassiniarlugu siunnersuut upernaakkut ataatsimiinnermi ullormi ataatsimiiffimmi siullermi oqaluuserisassanngorlugu saqqummiunneqarpoq, taamaalilluni oqaaseqarnissamut piffissaliussat nutaat ingerlaannartumik atulerneqarniassammata Inatsisartullu ataatsimiinnerup ingerlanneqaleruttornerani oqaaseqarnissamut piffissaliussanik nutaanik atuilinnginniassammata.
Immikkoortoq 31-p Suleriaaseq pillugu Ataatsimiititaliami sivisuumik suliarineqareerneratigut oqaaseqarnissamut piffissaliussat iluarsiissutissaat Inatsisartuni amerlanerussuteqarluartunit isumaqatigiissutigineqarput, taakkulu ullut ataatsimiiffiit aappaanni marlunngornermi ulloq 13. april siullermeerluni atorneqassapput.
Taamaalilluni Siulittaasoqarfimmit neriuutigineqarpoq oqaaseqarnissamut piffissaliussat oqimaaqatigiiffiusumik iluarsineqartut aammalu oqaaseqarnissamut piffissaliussat nutaat Inatsisartunut ilaasortanit iluarineqarlutik atorluarneqarumaartut.
Josef Motzfeldt
Inatsisartut Siulittaasuat