2024 2023 2022 Flere år...
13-04-2010
Inatsisartunut ilaasortat, Olga P. Berthelsen aamma Per Berthelsen, Nunat Avannarliit Siunnersuisoqatigiivini ataatsimeeqataapput
Ulluni 13. aamma 14. april 2010 Norgep inatsisartui, Stortingi, Nunat Avannarliit Siunnersuisoqatigiivisa ataatsimiinneranni qaaqqusisuupput.
Oslomi inatsisartutigoortumik ataatsimiinnerni peqataassallutik Olga P. Berthelsen, Nunat Avannarliit Siunnersuisoqatigiivini ilaasortaasoq aamma Per Berthelsen, Nunat Avannarliit Siunnersuisoqatigiivini sinniisuusoq, ulluni 12.-15. april 2010 akuerisaallutik nunatsinni Inatsisartunit sulinngiffeqarput. Partiit ataatsimiinneri taamatullu ataatsimiititaliat ataatsimiinneri ingerlanneqassapput, tamatumani nunani avannarlerni tallimaasuni Islandimi, Danmarkimi, Sverigemi, Norgemi Finlandimilu inatsisartut kiisalu Kalaallit Nunaanni, Ålandimi Savalimmiunilu inatsisartut ataatsimeeqatigiissallutik. Nunani avannarlerni politikikkut anguniagassat oqallisigineqarnissaat akuerineqarnissaallu, attaveqaateqalernissaq ilisimasanillu avitseqatigiinnissaq ataatsimiinnerni siunertaapput.
Nunat Avannarliit Siunnersuisoqatigiivisa aprilimi ataatsimiinnerini peqataasut aalajangersimasumik qulequtaqarluni sammisaqartarput, tassanilu aamma peqataasarlutik Beneluximit baltikumimilu nunanit pingasuusunit qaaqqusat. Ukioq manna qulequtarineqarpoq ”Nunanit allanit suliartortut suliffeqarnerlu eqaatsoq”.
Nunat Avannarliit Siunnersuisoqatigiivini atugarissaarnermut ataatsimiititaliap, Olga P. Berthelsenimit ilaasortaaffigineqartup, sammisaq ”Nunani Avannarlerni utoqqaat inuunerinnissaat” ingerlateqqissavaa. Atugarissaarnermut ataatsimiititaliap ingerlatassai annertupput, ilaatigullu Oslomi Ullevålimi napparsimmavissuaq paasisassarsiorfigineqassalluni.
Nunat Avannarliit Siunnersuisoqatigiivini avatangiisinut pinngortitamullu ataatsimiititaliami sinniisup Per Berthelsenip ingerlatassai aamma annertupput. Ataatsimiititaliaq siunnersuutinik arlalinnik suliassaqarpoq, tamatumalu saniatigut Nunat Avannarliit Siunnersuisoqatigiivisa inuussutissarsiornermut ataatsimiititaliaat peqatigalugu Canada Alaskalu avaqqullugit umiarsuit aqqutaat pillugu pissutsit misissussallugit. Kiisalu avatangiisinut pinngortitamullu ataatsimiititaliaq Nunani Avannarlerni nunaateqarnermi orpippassuaateqarnermilu politiki pillugu isumasioqatigiissaaq.
Atugarissaarnermut ataatsimiititaliap aammalu avatangiisinut pinngortitamullu ataatsimiititaliap ulloq 28. junimit ulloq 2. juli 2010-mut, tassa sapaatip akunnerani 26-imi aasaanerani ataatsimiinnitik ingerlatissavaat.
Annertunerusumik paasisaqarniaraanni Inatsisartunut ilaasortat peqataasut saaffigineqarsinnaapput:
Olga P. Berthelsen, mobil +299 55 33 68 aamma Per Berthelsen, mobil +299 55 33 61.
Nunat Avannarliit Siunnersuisoqatigiivi inatsisartutigoortumik suliffeqarfiuvoq Norgemeersunik, Danmarkimeersunik, Sverigemeersunik, Finlandimeersunik, Islandimeersunik aammalu nunani namminersortuni Ålandimeersunik, Savalimmiuneersunik Kalaallillu Nunaanneersunik 87-inik ilaasortalik.
Nunat Avannarliit Siunnersuisoqatigiivini Inatsisartut marlunnik ilaasortaqarlutillu marlunnik sinniisussaqarput. Inatsisartunut ilaasortaq Olga P. Berthelsen Inuit Ataqatigiinneersoq aamma Aleqa Hammond Siumumeersoq ilaasortaapput, taakkulu sinniisussaralugit Inatsisartunut ilaasortaq Hans Aronsen Inuit Ataqatigiinneersoq aamma Inatsisartunut ilaasortaq Per Berthelsen Siumumeersoq. Olga P. Berthelsen atugarissaarnermut ataatsimiititaliami aammalu Aleqa Hammond avatangiisinut pinngortitamullu ataatsimiititaliami ilaasortaapput.