2024 2023 2022 Flere år...
13-04-2010
Ataqqinartorsuup Dronningip 70-iliineranut Inatsisartut Naalakkersuisullu tunissuteqarput
Ataqqinartorsuup Dronning Margrethep ulloq 16. april 2010 70-iliilluni inuuissiornissaanik ulloq 13. april Christiansborgimi pisortatigoortumik malunnartitsiniaalluni nerersuaaqatigiinnermi Inatsisartut Siulittaasuat Josef Motzfeldt peqataassaaq.
Inatsisartut Naalakkersuisullu peqatigiillutik Ataqqinartorsuaq Niels Motzfeldtip qalipagaanik tunissuteqarfiginiarpaat.
Niels Motzfeldt eqqumiitsuliani “Arnap Sullivia”-nik taasimasani ima oqaasertalerpaa:
” Dronningip inuuissiornissaanut tunissutissamik qalipakkamik pisassinneqarama siullertut isummersorfigaara arnap pisoqasaanngortup, ilisimasaqqortullunilu misilittagaqqortuup, imminilu eqqumiitsutliortuusup assiliassaanik immikkuullarissamik pisoqasaanngortumut tulluarsorisannik sananissaq.
Isummersorujoornerani eqqarsaatiginngitsoorneq ajorpara qanoq inuuvissiortussaq assigiinngitsigisunik amerlalluinnartigisunillu eqqumiitsulianik pigisaqarlunilu takunnereersimanera, qanorlu kalaalerpaluttumik aallanik asseqanngitsumik qalipagaliornissaq niaqorluutiginerullugu.
Ullualunnguit ingerlanerini qalipagassaq qanoq isikkoqarnissaanik isuma inissippara, aalajangiullugulu nerriviusaq avittartup sullivia ulluinnarpalaartumik kisialli immikkuullarissamik isikkulerlugu ersersinniassallugu.”
(eqqumiitsuliortup eqqumiitsuliani pillugu oqaasii tamarmiusut ilanngunneqarput)
Inatsisartut Siulittaasuata Josef Motzfeldtip Naalakkersuisullu Siulittaasuata Kalaallit Nunaanni innuttaasut sinnerlugit Ataqqinartorsuaq 70-iliinerani pilluaqqussuteqarfigaat ima oqaasertalimmik:
Ataqqinartorsuaq Margrethe Aappaat
Danmarkip Dronningia
70-inik ukioqalerlutit inuuissiorninni
Kalaallit Nunaat inuilu sinnerlugit pilluaqquatsigit
Josef Motzfeldt Kuupik Kleist
Inatsisartut Naalakkersuisut
Paasissutissat sukumiinerusut Inatsisartut Siulittaasuannut Josef Motzfeldt oqarasuaat angallattagaq+299 55 76 41 imaluunniit +45 24 42 34 06 saaffiginnilluni pissarsiarineqarsinnaapput.