2024 2023 2022 Flere år...
15-04-2010
Aatsitassanut Ataatsimiititaliamik pilersitsinissaq pillugu paasissutissat
Inatsisartuni oqaluuserisassat pillugu nassuiaateqartoqarnerani ippassaq aatsitassanut ataatsimiititaliamik pilersitsinissamik kissaateqartoqarpoq. Tamanna tunngavigalugu aallaqqaasiutigalugu erseqqissartariaqarpara ataatsimiititaliaqareermat aatsitassanut tunngasunik suliaqartartussamik. Aatsitassanut tunngasut Inuussutissarsiornermut Ataatsimiititaliap suliassaqarfiinut ukiorpassuarni ilaareerput, ataatsimiititaliallu pineqartup suliassaqarfiinut suli ilaallutik ilaassallutillu.
Taamaalilluni matumani pineqanngilaq naalakkersuinikkut suliassaqarfik Inatsisartunit naammattumik isumagineqanngitsoq sumiginnarneqarsimasorlu.
Ullumikkut ataatsimiititaliaqarnikkut aaqqissuussaaneq
Ullumikkut Inatsisartut 14-inik ataatsimiititaliaqarput Namminersorlutik Oqartussat suliassaqarfiinik suugaluartunilluunniit sammisaqarfiusunik siulittaasoqarfiullu naliliinera malillugu suliassaqarfinnik tamakkiisumik matusisimasunik. Ataatsimiititaliat suli ilaqqinneqassappata ataatsimiititaliat qinikkat isumagisassaat amerlissapput, siulittaasoqarfiullu kissaatigisimavaa ataatsimiititalianik amerlanernik pilersitsinissamik aalajangiisoqartinnagu ataatsimiititaliaqarnikkut aaqqissuussaaneq tamarmi ataatsimut nalilersorneqaqqaartariaqartoq. Taamaattumik siulittaasoqarfiup ataani ullumikkut sulisoqarpoq qulaajarniarlugu assersuutigalugu siunissami ataatsimiititaliat ikilineqassanersut amerlanernillu ilaasortalerlugit imaluunniit ullumikkutut ataatsimiititaliaqariaaseq attatiinnarneqassanersoq.
Taamaalilluni uggornarpoq illuatungiliuttut taamatut suliniarnermi inerititaqarfiusumik suleqataarusussanngippata. Siulittaasoqarfiup kissaatigaa suliniarneq tamanna aaqqissuulluakkamik misissueqqissaarnermik qulaajaaqqaarnermillu tunngaveqartariaqartoq.
Siulittaasoqarfiup Inatsisartut suleriaasiannik nutarteriniarnera
Siulittaasoqarfik nutaamik qinigaasoq 2009-mi junimi ataatsimeeqqaarmalli siunertaasimavoq qinigaaffiup matuma ingerlanerani Inatsisartut suleriaasiat siusinnerusukkullu suleriaasiusarsimasut, tassunga ilanngullugit ataatsimiititaliaqarnikkut aaqqissuussaaneq taakkulu katitigaanerat, sukumiisumik misissuataarneqassasut. Inatsisartuni siunissami suleriaasissaq eqqarsaatigalugu siulittaasoqarfiup sulinini ingerlateqqinniarpaa, suliap pingaaruteqartup tamatuma ingerlanerani malittarisassat atuuttut sanioqqutinngikkaluarlugit.
Inatsisartut ippassaq ataatsimiinnerannut atatillugu paasissutissat
Pissutissaqartippara ippassaq Inatsisartuni pisut eqqarsaatigalugit pissusiviusunik paasissutissiissallunga.
Naatsumik oqaatigalugu suliami qitiuvoq Inatsisartuni partiit sinniisaasa ataasiakkaat ulloq 25. november 2009 Siulittaasoqarfimmut saaffiginnissutaat, tassani:
”siunnersuutigineqarluni Inatsisartut Siulittaasoqarfiata … piaartumik Inatsisartut Aatsitassarsiornermut immikkut Ataatsimiititaliaqalernissaat sulissutigissagaat”.
Saaffiginnissut pineqartoq ukiakkut ataatsimiinnerup ulluisa kingulliup tulliani siulittaasoqarfiup tiguaa, siulittaasoqarfiullu ulloq 26. november ataatsimiinnermi aalajangerlugu:
”- aningaasaqarnikkut allaffissornikkullu kingunerisassat erseqqinnerusumik qulaajaavigineqareerpata ataatsimiititaliamik nutaamik pilersitsisinnaaneq UPA10 nallertinnagu pisariaqartoq.”
Pissusissaatut oqaatigineqassaaq siulittaasoqarfiup ataatsimiinnerini Kattussuseqatigiit Partiiat eqqaassanngikkaanni partiit tamarmik sinniisuutitaqartarmata, taamaattumillu siulittaasoqarfimmi aalajangernerit isumaliutillu tamakku partiinut anngussimanissaat naatsorsuutigineqarluni.
2010-mi februarimi siulittaasoqarfiup isumasioqatigiinnerani Inatsisartuni suleriaaseq taamatuttaaq sukumiisumik oqallisigineqarpoq, tassunga ilanngullugu siulittaasoqarfik tullianik ataatsimiinnermini Inatsisartuni ataatsimiititaliaqarnermik aaqqissuussinermik atuuttumik nalilersuilluni misissuinerit tunngavigalugit Aatsitassanut ataatsimiititaliamik pilersitsisinnaaneq pillugu aalajangiiumaartoq. Ataatsimiititaliaqarnikkut aaqqissuussinerup tamarmiusup nalilersorneqarnissaa pisariaqarpoq ataatsimiititaliaqarnikkut aaqqissuussaaneq tamarmiusoq iluarsiivigineqarsinnaassappat. Ilanngullugu erseqqissarneqarpoq aatsitassanut tunngasut Inuussutissarsiornermut ataatsimiititaliap suliassaqarfiinut ilaareersut.
Ataatsimiititaliaqarnikkut aaqqissuussaanermik atuuttumik qulaajaaneq annertooq tunngavigalugu sukumiisumillu oqallittoqareersoq ulloq 8. marts 2010 siulittaasoqarfiup ataatsimiinnerani aalajangerneqarpoq 2010-mi upernaakkut ataatsimiinnermi aatsitassanut ataatsimiititaliamik pilersitsisoqassanngitsoq. Taamatut aalajangerneq minnerunngitsumik pissuteqarpoq suliassaqarfik Inuussutissarsiornermut ataatsimiititaliap suliassaqarfiinut ilaareermat, taamatullu aamma Aatsitassanut ataatsimiititaliamik pilersitsisinnaaneq ataatsimiititaliaqarnikkut allatigut allanngortitsinissanik pisariaqartitsinernut allanut sanilliullugu suliarineqartariaqarmat.
Ataatsimiititaliaqarnikkut aaqqissuussaanermik Siulittaasoqarfiup naliliinera ukiamut saqqummiunneqassaaq
Taamaattumik suliassap siulittaasoqarfimmi sukumiisumik suliarineqarsimanera tunngavigalugu isornartorsiuineq paasiuminaappoq, minnerunngitsumik aamma eqqarsaatigigaanni taamatut aalajangerneq Inatsisartut namminneq suleriaasiannit tapersersorneqarmat, tassanimi aalajangersarneqarmat ataatsimiititalianik pilersitsineq Inatsisartut ukiuata aallartinnerani pisartoq. Inatsisartut ukiuat ilisimaneqartutut ukiakkut aallartittarpoq.
Ukiamut katersuunnissamut ataatsimiititaliaqarnikkut aaqqissuussaanermut nutaamut siunnersuummik saqqummiussinissani siunertaralugu Siulittaasoqarfiup sulinini unigani ingerlatiinnassavaa.
Josef Motzfeldt
Inatsisartut Siulittaasuat
Paasissutissat sukumiinerusunut Inatsisartut Siulittaasuannut Josef Motzfeldt oqarasuaat angallattagaq +299 55 76 41 attaveqarluni pissarsiarineqarsinnaapput.