2024 2023 2022 Flere år...
29-04-2010
Inatsisartut torrutiinnarlugu Naalakkersuisunut apeqquteqartarneq siullermeerutaasumik misililerpaat
Inatsisartut Suleriaasianni § 36, imm. 7-imi aalajangersarneqartutut Inatsisartut Siulittaasoqarfiata sapaatip akunneranut ataasiarluni akunnermik ataatsimik Naalakkersuisunut apeqquteqarfiusinnaasumik aalajangersaasinnaanini atorniarlugu Inatsisartut Siulittaasoqarfiata maanna aalajangerpaa. Periarfissaq taanna siullermik atorneqassaaq ulluni ataatsimiiffiusuni maajip ulluisa tallimaanni aqqaneq-aappaannilu ataatsimiinnerit nal. 10.00 aallartinnerini.
Akunnermi pineqartumi Inatsisartunut ilaasortat oqaluinnarlutik apeqqutiginiakkaminnillu siumut nalunaaruteqaqqaaratik Naalakkersuisut ingerlaannaq akisassaannik apeqquteqarsinnaassapput.
Apeqquteqarsinnaaneq ullunik marlunnik sioqqullugu Naalakkersuisut Inatsisartunut nalunaarutigereertassavaat Naalakkersuisunut ilaasortat ikinnerpaamik marluk kikkut apeqqarissaarfigineqarsinnaassanersut.
Akunnermi apeqquteqarfiusinnaasumi aalajangiisoqarsinnaanngilaq, taamatullu aamma Naalakkersuisut apeqqutigineqartumut akissuteqarsinnaanngippata suliaq tassunga unissalluni.
Akunnerup apeqquteqarfiusinnaasup qanoq ingerlasarnissaanut paasissutissat sukumiinerusut ulluni qaninnerni Inatsisartunut Naalakkersuisunullu ingerlatinneqarumaarput.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartunut Siulittaasuannut Josef Motzfeldtimut angallattagaq +299 55 76 41 saaffiginnilluni pissarsiarineqarsinnaapput.