2024 2023 2022 Flere år...
29-04-2010
Inatsisartut Suleriaasiat maleqqissaarneqarpoq
Sermitsiaq/AG-p nittartagaanni ulloq 29. april allaaserisaq ”Drama i Landstingssalen” (”Inatsisartuni pissanganartorsiorneq”) aallaavigalugu matumuuna manna erseqqissarusunneqarpoq:
Puiaasaaqqanik utertitsisarnerup nutarteriffiginissaa pillugu apeqquteqaat aallaavigalugu oqallinnermi partiit ilaannit Inatsisartut ataatsimiinnerannik aqutsisoq annertuumik tatiniarneqarpoq oqallinneq ingerlasoq unitseqqullugu sammisaq allarluinnaq oqaluuserineqarniassammat. Matumani pisumi Naalakkersuisunut ilaasortap Jens B. Frederiksenip akiliisinneqarsimanerarnera oqallisigitinniarneqaraluarpoq.
Erseqqissarneqartariaqarpoq Inatsisartut Suleriaasiat periarfissiinngimmat oqaluuserisassat allarluinnaat oqaluuserisassanut ilanngunneqarsimanngitsut oqallisiginissaannut. Taamaalilluni oqallinnerup aalajangersimasup ingerlanerani suliassat nutaarluinnaat oqallisigineqartumullu tunnganngilluinnartut oqallisigalugit aallartinneqarsinnaanngillat.
Oqaluuserisassap aalajangersimasup suliarineqarnerani sammisat nutaarluinnaat sammineqalissagaluarpata, tamanna Inatsisartut Suleriaasiannik erseqqissumik sanioqqutsinerussaaq. Taamaalilluni ajuusaarnarpoq partiip pineqartup siuttua isumaqarsimappat innuttaasut oqartussaaqataaneranni najoqqutassat atorunnaarsinneqartut, naak matumani innuttaasut oqartussaaqataaneranni najoqqutassat atornissamittorpiaq atorneqaraluartut.
Taama eqqunngitsunik saqqummiisarnerit innuttaasut oqartussaaqataanerannik innarliinerupput, ataatsimiittarfimmi pisariaqanngitsumik eqqissiviilliortitsillutik Inatsisartullu oqartussatut nunatsinni innuttaasunit avataaniillu isigineqarneranik sanngiillisitsisinnaallutik, taamaattumillu nipangiullugit akuersaaginnarneqarsinnaanatik. Taamaattumik matumuuna Inatsisartut Suleriaasianni § 48, imm. 3 innersuussutigineqassaaq. Tassuuna ataatsimiinnermik aqutsisup Inatsisartunut Naalakkersuisunulluunniit ilaasortaq ataatsimiinnermi pissuserissaarnissamik siusinnerusukkut peqquneqaraluarluni naalasseriitsoq oqaaseqarniarluni kissaataanik itigartissinnaavaa.
Inatsisartut Suleriaasianni § 2 malillugu manna atuuppoq:
”§ 2. Inatsisartuni ilaasortaq pinerluttulerinermi inatsit naapertorlugu inaarutaasumik eqqartuussissutikkut imaluunniit akiliisitaanissamik akuersissuteqarnikkut pinerluuteqarsimasutut pineqaatissinneqarsimappat imaluunniit pinerluttulerinermi inatsit naapertorlugu Inatsisartunut ilaasortaanissaminut nalinginnaasumik isigineqarnermini naleqqukkunnaarutigisaminik pineqaatissinneqarsimappat Qinigaanerup Misilinneqarnissaanut Ataatsimiititaliap inassuteqarnera naapertorlugu, tak. § 7, imm. 2, Inatsisartut aalajangissavaat iliuuserisaq ilaasortap eqqartuunneqaatigisaa pineqartup Inatsisartunut ilaasortaaginnarnissaanut naleqqukkunnaarutaanersoq.”
Pissusissaanngitsutut isigineqartariaqarpoq Inatsisartunut ilaasortat ataasiakkaat Inatsisartut ataatsimiittarfianni uivertitsiniassappata, innuttaasut oqartussaaqataaneranni najoqqutassat ataqqinneqarnissaat illuatungaani kissaatigiitigalugu.
Suliassamik partiip pineqartup oqaluuseritinniagaanik suliarinneqqaarfissaq tassaanngilaq Inatsisartut Ataatsimiittarfiat, kisiannili Qinigaanerup Misilinneqarnissaanut Ataatsimiititaliaq. Naatsorsuutigineqartariaqarpoq tamanna Inatsisartunut ilaasortat ilisimassagaat.
Inatsisartut Suleriaasissaat soorunami immini ilaasortanit tamanit malinneqartussaavoq.
Josef Motzfeldt
Inatsisartut Siulittaasuat
Paasissutissat sukumiinerusunut Inatsisartut Siulittaasuannut Josef Motzfeldt oqarasuaat angallattagaq +299 55 76 41 attaveqarluni pissarsiarineqarsinnaapput.