2024 2023 2022 Flere år...
10-05-2010
Inatsisaatsuususeq innuttaasut oqartussaaqataanerata illuatungeraa
Inatsisaatsuususeq innuttaasut oqartussaaqataanerata illuatungeraa
All.: Josef Motzfeldt, Inatsisartut Siulittaasuat
AG-mi ulloq 5. maj saqqummersumi allaaserisamut ”Naggataagut nipi sakkortusineqassaaq” oqaaseqaatit.
Immaqa una qulequtarissallugu tulluarnerusimassagaluarpoq ”Partiit illuatungiliuttut ilaannit nipi suli nalinginnaavallaaqaaq”.
Aallaqqaasiullugu uparuarusuppara uanga nammineq inatsisartut ataatsimiinnerat sioqqullugu, ingerlanerani kingornaluunniit tutsuiginanngitsumik oqalliseriaatsimut partiit illuatungiliuttut aappaata siuttuisa Inatsisartut ataatsimiittarfianni atuligaannut minnerpaamilluunniit peqataanissara pisussaaffiginnginnakku.
Taamaattumik nuannissagaluarpoq allaaserisami oqaatigineqartoq, tassalu upernaakkut ataatsimiinneq Siumup siulittaasuata ataatigullu atsiortup sakkortuumik akerleriittarnerannik malunnaateqarsimasoq, uppernarsaaserneqarsinnaasuuppat.
Siumup siulittaasuata uparuagaatut ilumooraluarpoq Inatsisartuni kinaluunniiit allanit qaffasinnerunanilu appasinnerunngimmat. Nipili allarluinnanngortarpoq ataasiakkaat namminneq isumartik kisiat tunngavigalugu najoqqutassat tamakku qanoq paasineqarnissaat nassuiarsinnaasorileraangassuk.
Inuit tamat naalakkersueqataaneranni pissusiviusut ataqqinagit siulittaasoqarfik pissaanermik sumik una tigusisimasoq?
Siulittaasoqarfik Inatsisartunut ilaasortanik tallimanik ilaasortaqarpoq, nalinginnaasumik Inatsisartuni qassinik ilaasortaatitaqarneq tunngavigalugu ilaasortaatitaqartarneq akuerisaq naapertorlugu qinikkanik. Inuit tamat naalakkersueqataanerannik tamanna ataqqinninnginnerua?
Siulittaasoqarfik suleriaasissaq nammineq akuerisani tunngavigalugu sulivoq. Suleriaasissaq taanna nunatta inatsisartoqarluni oqaluttuarisaanerani suleriaatsit siullersaraat, ulloq 21. december 2009 akuerineqartoq.
Immaqamiuna tamanna – siulittaasoqarfiup sulinerata maanna killiliussat siumut aalajangersakkat tunngavigalugit ingerlalersimanera – illuatungiliuttut ilaannit inuit tamat naalakkersueqataanerannik ataqqinninnginnertut isigineqartoq?
Inatsisartut ataqqinneqarlit immitsinnullu ataqqeqatigiitta
Innuttaasut qinikkat aqqutigalugit oqartussaaqataanerannik paasinninnerput illersorniarlugu innuttaasut oqartussaaqataanerat taamalu naqisimaneqarani saqqummiisinnaaneq sumut killeqassappat?
Oqartussat inatsisiliortut Inatsisartutut ittut sulinerminnut aalajangersimasunik killissaqarput, taakkulu killissarititat periarfissiinngillat ilaasortat ataasiakkaat namminneq piumassutsiminnik inatsisinik atuutsitsiunnaarsitsisinnaanerinut.
Siulittaasoqarfiup ataatsimiittarfimmi suliassarinngilluinnarpaa aaqqiagiinnginnernik ikummarissaanissaq, partiilli qalipaataat apeqqutaatinnagu isumaginiassallugu oqallinnerup ataatsimiittartunut inatsisiliortunut ataqqinassusilimmik malittarisassallu akuerineqarsimasut malillugit ingerlanneqarnissaa.
Nalinginnaavoq Inatsisartunut ilaasortat Inatsisartut ataatsimiinnerisa nalaanni taakkulu avataanni tamanut ammasumik Siulittaasoqarfimmik isornartorsiuissanatik, Inatsisartut ataqqinassusiat sernissorniarlugu takutinniarlugulu.
Siulittaasoqarfik Inatsisartut avammut sinniisorimmassuk ataqqinninneq tamanna aamma Siulittaasoqarfimmut tunngavoq, taakkumi sulinerat aamma Inatsisartut ataatsimiititaliaanni sulinertut innani ilaasortat ataasiakkaat naalakkersuinikkut isumaannit aqunneqanngimmat.
Siulittaasoqarfimmut ilaasortat paarlakaajaallutik Inatsisartut ataatsimiinnerinik aqutsisarput, kina oqaluuserisassani ataasiakkaani aqutsisuussanersoq ilaasortat akunnerminni aalajangertarlugu, soorlu aamma siulittaasoqarfimmi ilaasortat tamarmik Inatsisartut suleriaasiat sukumiisumik iserfigisimagaat. Akerlianik annertuumik kissaatiginaraluarpoq Siumup siulittaasuata Inatsisartut suleriaasiat Inatsisartunullu ilaasortanut ilitsersuut qupperalaassagai. Ilaasortanut ilitsersuut atuaruminarsagaavoq, suleriaatsimi aalajangersakkat ataasiakkaat qanoq siunertaqarnersut kikkunnit tamamit paasineqarsinnaanissaat anguniarlugu.