2024 2023 2022 Flere år...
11-05-2010
Inatsisartut aalajangigaat Inatsisartut kisimik allanngortissinnaavaat
Af Josef Motzfeldt, formand for Inatsisartut
Sermitsiaq nr 18-imi majip arfineq aappaanni saqqummersumi allaaserisamut ”Inatsisartut Naalakkersuisullu oqaloqatigiissinnaajunnaarput”-mut oqaatigiumasat.
Inatsisartut sulinerminni najoqqutarisaata allanngortinneqarnera upernaaq manna ulloq Inatsisartut ataatsimiiffiat siulleq akuersissutigineqarpoq. Oqaaseqarsinnaanermut killiliussat allanngortitsinermi pingaarnertut pineqarput. Oqaaseqarsinnaanermummi killiliussaasimasut amerlasuut isummersorfigisimavaat allanngortinneqarnissaannik kissaateqartoqarluni.
Allannguutissatut siunnersuut Inatsisartut Siulittaasoqarfiata isumaqatigiissup saqqummiussaraa.
Siunnersuut Inatsisartuni saqqummiunneqannginnermini partinut tamanut tusarniaassutigineqarami tamanit tusaatissatut akuerineqapoq.
Taamaattumik Inatsisartuni akuersissutigineqarnera tupinnartoqanngilaq.
Ulluni ataatsimiiffiusussani 17-iusuni siulliit arfineq-marluk ingerlareersut radioavisimi Siulittaasoqarfiup isumaqatigiilluni naliliinera tunuliaqutaralugu upernaaq manna ataatsimiinnerup siunnerfeqarnerulluni oqaluuserineqartunullu aallussineraluni ingerlanera unnersiutigaara.
Taama Siulittaasoqarfiup naliliinera Hans Enoksenimit kisimiillunga eqqunngitsumik naliliinittut oqaatigineqarnera ajuusaarnarpoq. Radioavisimimi erseqqissarpara Siulittaasoqarfiup tamarmiulluni naliliinera tunngavigigiga. Taamami pisuutitsineq ajuusaarnarpoq Inatsisartut suleriaasiannut ilisimasaqannginnermik aamma aalajangerneqartunut ataqqinninnginnermut nassuernerugami.
Oqaaseqarnissamut killiliussanut iluarsiinerit Inatsisartunit akuerineqareersut Inatsisartuni siulittaasup piumallerlunilu allanngortissinnaanngilai. Inatsisartut aalajangigaat Inatsisartut kisimik allanngortissinnaavaat.
Hans Enoksenip tamanna paasiuminaatsikkuniuk piffissanngorpoq Inatsisartut suleriaasiannik paasisaqarnerulernissaanut. Taamaalilluni innuttaasunut eqqortunik paasissutissiineq peqataaffigisinnaavaa, aammami Inatsisartut isigineqarnerata illersugassaanera peqataaffigalugu.
Manna iluatsillugu eqqaasitsissutigilara Inatsisartuni ilaasortat tamarmik sukkulluunniit Siulittaasoqarfiup susassaqarfiinut tunngasunik allakkatigut Siulittaasoqarfimmut saaffiginnissinnaammata. Siulittaasoqarfik Hans Enoksenimit oqaaseqarsinnaanermut killiussanut naammagittaalliuummik tigusaqarsimanngilaq.
Paasissutissat sukumiinerusunut Inatsisartut Siulittaasuannut Josef Motzfeldt oqarasuaat angallattagaq +299 55 76 41 attaveqarluni pissarsiarineqarsinnaapput.