2024 2023 2022 Flere år...
12-05-2010
PCB aamma akoorutissat allat avatangiisinut ulorianaateqarsinnaasut avatangiisinut illersuilluni passuneqartassapput
Siusinnerusukkut sanaartornermi sanaartukkanilu PCB-mik aamma akoorutissanik ulorianartunik allanik atuisimaneq pillugu maanna oqallinneq Eqqissisimatitsinermut Avatangiisinullu ataatsimiititaliap ilungersornartutut ernumassutaasariaqartutullu isigai. Tamatumani pineqarput Nuummi maanna pisoq aalajangersimasoq, kisiannili aamma nuna tamakkerlugu sanaartornermi sanaartukkallu ilanngullugit. Ataatsimiititaliap Naalakkersuisup Anthon Frederiksenip pineqartoq pillugu nassuiaataa kiisalu partiini oqaaseqartartut allat ilanngussaat tusarnaarpai. Ataatsimiititaliap isumaqatigiittup PCB-p atugaanera pillugu suliaq ataavartumik malinnaaffigissavaa, naatsorsuutigalugulu suliaq kiisalu Nunamut namminermut Avatangiisinullu Naalakkersuisup iliuusereqqinniagai pillugit qanimut ilisimatinneqartarnissaq.
Siunissami Kalaallit Nunaanni PCB-p atugaanera pillugu ersarissumik malittarisassaqarnissaq pisariaqartutut isigineqarpoq. Naalakkersuisunit immikkut PCB pillugu iliuusissanut pilersaarummik pisariaqartitsinermi, tamanna Nunamut namminermut Avatangiisinullu Naalakkersuisumit nalilerneqassaaq.
Nuummi PCB pillugu suliaq tunuliaqutaralugu Eqqissisimatitsinermut Avatangiisinullu ataatsimiititaliap naatsorsuutigaa Naalakkersuisut siumut isiginiarlutik iliuusissanik aallartitsissasut, tamatumani sanaartornermit sanaartukkanillu eqqakkat ulorianartortallit avatangiisitigut illersorneqarsinnaasumik passunneqartarnissaat qulakkeerneqassalluni, taamaalilluni akoorutissanik ulorianartortalinnik akoqarnerinik naammaginartumik misissorneqanngitsunik siunissami igitsisoqaqqunagu, inaaliisoqaqqunagu atortuutinillu atuisoqaqqunagu.
Tamatumunnga atatillugu Naalakkersuisut Ataatsimiititaliamut nassuiaatigisariarpaat sanaartuinerni maanna pisuni maannakkullu sanaartukkani pineqartoq pillugu immikkut nassuiaasiornissaq ingerlanneqassanersoq.
Eqqissisimatitsinermut Avatangiisinullu ataatsimiititaliaq
sinnerlugu
Naaja Nathanielsen
Siulittaasoq