2024 2023 2022 Flere år...
02-06-2010
Nunani avannarlerni killerni aalisarnermik aqutseriaatsit pillugit ataatsimeersuarnermi Kalaallit Nunaata Nunat Avannarliit Killiit Siunnersuisoqatigiiffianut aallartitai peqataassapput
Inatsisartut Siulittaasuat Josef Motzfeldt sapaatip akunnerata tulliani Nunat Avannarliit Killiit Siunnersuisoqatigiiffianni siulittaasutut nunani avannarlerni killerni aalisarnermik aqutseriaatsit assigiinngitsut pillugit Nunat Avannarliit Killiit Siunnersuisoqatigiiffiata ataatsimeersuartitsinera siuttuuffigissavaa.
Ataatsimeersuarneq Islandimi ulluni 8. - 9. juni ingerlanneqassaaq Nunanilu avannarlerni ministerit siunnersuisoqatigiiffiat suleqatigalugu Savalimmiuni ulloq 10. juni nanginneqassalluni.
Ataatsimeersuarnermi siunertarineqarpoq peqataasut nunani avannarlerni killerni aalisarnermik aqutseriaatsinik paasisaqarnerunissaat, taamatullu aamma aalisarnermik aqutseriaatsinik allanik ilinniarfigeqatigiinnissamut periarfissiisoqarnissaa. Aqutseriaatsit assigiinngitsut iluaqutissartaat ajoqutaallu tamarmik sammineqassapput. Peqatigitillugu Siunnersuisoqatigiiffik sakkussaqarnerulissaaq EU-p aalisarneq pillugu nutaamik politikkiliorniarneranut maanna ingerlasumut timitalimmik sunniuteqarnissaminut.
Nunani avannarlerni killerni aalisarnermik aqutsisoqarfinnit ataasiakkaanit saqqummiinerni aalisarnerup piujuaannartitsinermik tunngaveqarnissaata pingaaruteqassusia aalisagaqatigiillu ataasiakkaat inissisimanerat immikkut pingaartinneqassaaq. Aqutseriaatsit assigiinngitsut pingasut aalisartunut aalisariutaatileqatigiiffinnullu aningaasaqarniarnikkut sunniutigisartagaat oqallisigineqassapput. Tamatuma saniatigut ataatsimeersuarnermi qulaajarneqarumaarpoq nunat avannarliit suleqatigiinnerat qanoq atorneqarsinnaanersoq EU-p aalisarneq eqqarsaatigalugu ataatsimut nutaamik politikkiliornerani sunniiniarnermut. Kalaallit Nunaanni aalisarnermik aqutsineq tamatumalu aalisarnermut aningaasaqarniarnikkut sunniutai sukumiinerusumik qulaajarneqassapput.
Ataatsimeersuarnermi nunanit avannarlernit killernit tamanit saqqummiussuisoqassaaq qinikkanillu peqataasoqarluni. Saqqummiussisussat tassaassapput atorfillit, biologit, aningaasaqarniarnermik ilisimasallit inatsisilerituullu aalisarnermi pissutsinik immikkut ilisimasallit. Ataatsimeersuarnermi Kalaallit Nunaanni Aalisarnermut, Piniarnermut Nunalerinermullu Naalakkersuisoqarfimmit, Norgemi nunalerinermi aningaasaqarniarnermik ilisimatusarfimmit, Savalimmiuni Islandimilu imavinni pissutsinik ilisimatusarfinnit taamatullu aamma Danmarkimi Syddansk Universitetimit saqqummiussisoqassaaq. EU-mi aalisarnermut kommissærip allaffia aamma sinniisuutitaqassaaq.
Islandimi aalajangersimasumik qulequtaqarluni ataatsimeersuarneq nunani avannarlerni killerni aalisarnermut ministerit Ane Hansenip (Kalaallit Nunaat), Jacob Vestergaardip (Savalimmiut) aamma Jón Bjarnasonip (Island) akornanni oqallinnermik naggaserneqassaaq, tamatumani nunani avannarlerni killerni aalisarnermik aqutseriaatsit iluaqutaat ajoqutaallu kiisalu suliassaqarfimmi siunissami nunat avannarliit killiit taamatullu aamma nunat avannarliit akornanni qaninnerusumik suleqatigiissinnaanermut periarfissat ilaatigut oqallisigineqassallutik.
Nunani avannarlerni ministerit siunnersuisoqatigiiffiat Islandimi Nunat avannarliit killiit siunnersuisoqatigiiffiata aalajangersimasumik qulequtaqarluni ataatsimeersuartitsineranut nangissutitut ”Pisinnaatitaaffiit tunngavigalugit aalisarneq – inuiaqatigiinnut iluaqutaasumik” qulequtaralugu Savalimmiuni ataatsimeersuarnermik aaqqissuussisimavoq.
Tusagassiorfinnut paasissutissat
Islandimi Savalimmiunilu ataatsimeersuarnernit pisut pillugit tusagassiorfinnut nalunaaruteqartoqartassaaq, assinik nipinillu tapertalertarlugit.
Tusagassiortut ataasiakkaat Islandimi ataatsimeersuarnermut peqataarusussappata tamanna pillugu Nunat Avannarliit Killiit Siunnersuisoqatigiiffiata allattaanera Þórður Þórarinsson attaveqarfigineqarsinnaavoq ugguuna tt@althingi.is.
Ataatsimeersuarnerup nalaani apeqqutissaqartoqarpat Inatsisartunit attaveqaqatigiinnermut suleqataasoq Nils Baum oqarasuaatikkut +299 58 92 90-ikkut attaveqarfigineqarsinnaavoq. Ataatsimeersuarnermut atatillugu tusagassiorfiit paasissutissanik aalajangersimasunik tigusaqartarnissamik kissaateqarunik tamanna tallimanngorneq ulloq 4. juni 2010 nallertinnagu Nils Baumimut ugguuna nils@inatsisartut.gl nalunaarutigeqquneqarpoq.
Ataatsimeersuarnerni marlunni pisussanut pilersaarutit tusagassiorfinnut nalunaarummut matumunnga ilanngunneqarput.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuannut Josef Motzfeldtimut oqarasuaat angallattagaq +299 55 76 41 attaveqarfigalugu pissarsiarineqarsinnaapput.
Nunat Avannarliit Killiit Siunnersuisoqatigiiffiat Kalaallit Nunaata, Islandip Savalimmiullu akornanni inatsisartutigoortumik suleqatigiiffiuvoq. Suleqatigiinneq isumaqatigiissutip, suleqatigiinnermut malittarisassat aamma aalajangersarneqarfigisaata, akuersissutigineqarneratigut timitalerneqarpoq. Nunat Avannarliit Killiit Siunnersuisoqatigiiffiata siulittaasoqarfianut ilaasortaapput Josef Motzfeldt, Kalaallit Nunaat, Olina Thorvardardottir, Island, aamma Kari P. Højgaard, Savalimmiut. Ukioq manna aggustimi ukiumoortumik ataatsimeersuarnissap tungaanut Kalaallit Nunaat Nunat Avannarliit Killiit Siunnersuisoqatigiiffianut siulittaasuutitaqarpoq.