Nutaarsiassat

08-06-2010

Inatsisartut Nunallu Avannarliit Killiit Siunnersuisoqatigiiffiata siulittaasuata Josef Motzfeldtip nunani avannarlerni killerni aalisarnermik aqutseriaatsit assigiinngitsut pillugit ataatsimeersuarneq ullumi ammarpaa

Inatsisartut Nunallu Avannarliit Killiit Siunnersuisoqatigiiffiata siulittaasuata Josef Motzfeldtip nunani avannarlerni killerni aalisarnermik aqutseriaatsit assigiinngitsut pillugit ataatsimeersuarneq ullumi ammarpaa

Inatsisartut Nunallu Avannarliit Killiit Siunnersuisoqatigiiffiata Josef Motzfeldtip ullaaq manna Nunat Avannarliit Killiit Siunnersuisoqatigiiffiata ukiumoortumik aalajangersimasumik qulequtaqarluni ataatsimeersuartitsinera ukioq manna “Nunani avannarlerni killerni aalisarnermik aqutseriaatsit assigiinngitsut”-nik qulequtaqartinneqartoq ammarpaa. Ataatsimeersuarneq Islandimi Sauðarkrókurimi ingerlanneqarpoq, naalakkersuinermik sulialinnit, ilisimatusarnermit atorfilittanillu peqataaffigineqarluni.

Ammaalluni oqaaseqarnermi Josef Motzfeldtip erseqqissarpaa nunani avannarlerni killerni aningaasaqarniarnerit ullumikkut ilisarnaatigimmassuk tamarmik pingaarnertut imaani pisuussutinik aallaaveqarnertik, taakkulu tunngavigalugit inuussutissarsiorneq inuussutissarsiutit pingaarnersaralugu. Inuussutissarsiorneq nunani avannarlerni killerni ataatsimut aqunneqartoq, EU-millu soqutigineqarluni eqqumaffigineqartuarsimasoq.

Josef Motzfeldtip oqaaseqarnermini ersersippaa naatsorsuutigalugu ataatsimeersuarneq manna aqqutigalugu aalisarnermik aqutseriaatsit assigiinngitsut iluaqutaannik ajoqutaanillu qulaajanikkut nunani avannarlerni killerni aalisarnermik aqutseriaatsinik peqataasut ilisimasaqarnerulissasut. Minnerunngitsumik nunat pingasut aalisarnikkut oqartussaaffigisaanni assigiinngitsunik aalisagaqassutsimut, inuussutissarsiornerup isertitsiviusarneranut nunallu ataasiakkaat aningaasaqarniarnerannut aqutseriaatsit ataasiakkaat sunniutaat tamatumani sammissallugit pingaaruteqarput. Kiisalu ataatsimeersuarneq aamma peqataassaaq EU-p aalisarneq pillugu nutaamik ataatsimut politikkiliorniarneranut timitalimmik sunniiniarnermut.

Nunani avannarlerni killerni aalisarnermik aqutseriaatsit siunissami assigiikannilernissaat anguniagassatut kissaatigineqartutut isigigaluarlugu Josef Motzfeldtip erseqqissarpaa alloriarnerit mikigaluartulluunniit aamma peqataasarmata nunani avannarlerni killerni aalisarnikkut pisuussutit eqqarsaatigalugit soqutigisat ataatsimoorfiginissaannut. ”Imartatta avatangiisitta nunarsuatta nillataartitsiviatut ataqqinassuseqartuaannarnissaanut qularnaveeqqutaassaagut.”

Josef Motzfeldt

Inatsisartut Siulittaasuat

Paasissutissat sukumiinerusut Inatsisartut Siulittaasuannut Josef Motzfeldtimut oqarasuaat angallattagaq +299 55 76 41 attaveqarfigalugu pissarsiarineqarsinnaapput.

Nunat Avannarliit Killiit Siunnersuisoqatigiiffiat Kalaallit Nunaata, Islandip Savalimmiullu akornanni inatsisartutigoortumik suleqatigiiffiuvoq. Suleqatigiinneq isumaqatigiissutip, suleqatigiinnermut malittarisassat aamma aalajangersarneqarfigisaata, akuersissutigineqarneratigut timitalerneqarpoq. Nunat Avannarliit Killiit Siunnersuisoqatigiiffiata siulittaasoqarfianut ilaasortaapput Josef Motzfeldt, Kalaallit Nunaat, Olina Thorvardardottir, Island, aamma Kari P. Højgaard, Savalimmiut. Ukioq manna aggustimi ukiumoortumik ataatsimeersuarnissap tungaanut Kalaallit Nunaat Nunat Avannarliit Killiit Siunnersuisoqatigiiffianut siulittaasuutitaqarpoq.