2024 2023 2022 Flere år...
18-06-2010
Ukiut 31-it sinnerlugit Namminersornerulernerup Namminersulernerullu malunnartinniarneqartarnerat frimærkitigut oqaluttuaralugu Post Greenlandip assinut tunissutaanut Inatsisartut Siulittaasuat qujassuteqarpoq
2009-mi Namminersornerup eqqunneqarneranut atatillugu Post Greenlandip Inatsisartunut tunissutaanut frimærkinut sisamanut Namminersornerunerup oqaluttuassartaani ullunut malunnartikkusutanut sisamanut attuumassuteqartunut kiisalu frimærkimut kingullermut Namminersornerup eqqunneqarneranut atatillugu saqqummersinneqartumut Inatsisartut Siulittaasuat qujassuteqarpoq.
POST Greenlandip nalliuttorsiornernut atatillugu frimærkit saqqummersinneqartarsimasut tallimaasut ataasiakkaarlugit assilianngorlugit suliaritissimavai, assimi ataatsimi frimærkit arkit ilivitsut kiisalu frimærkip angisuunngortinneqarnera kartonimik qerataasumik ungalusimallutik kusanartumik sinilerlugit.
Frimærkit pineqartut tassaapput:
Maajip aallaqqaataa 1979. Namminersornerunerup eqqunneqarnera. Jens Rosingimit titartarneqartoq. Arne Kühlmannimit kigartorneqartoq. Arkip angissusia mærkit 50-it. Kigutaasai 12 ¾.Nalinga: 1,10 kroner.
Maajip aallaqqaataa 1989. Namminersornerunerup eqqunneqarnerata ukiunik qulinngortorsiornera. Kalaallit Nunaata erfalasua Erfalasorput. C. Achton Friisimit titartarneqartoq. Offsetimik naqitaq. Arkip angissusia mærkit 50-it. Kigutaasai 12 ¾. Nalinga: 3,20 kroner.
Maajip aallaqqaataa 1989. Namminersornerunerup eqqunneqarnerata ukiunik qulinngortorsiornera. Namminersornerullutik Oqartussat ilisarnaataat. C. Achton Friisimit titartarneqartoq. Offsetimik naqitaq. Arkip angissusaa mærkit 50-it. Kigutaasai 12 ¾. Nalinga: 4,40 kroner.
Marsip ulluisa 26-iat 2004. Namminersornerunerup ukiunik 25-inngortorsiornera. Erfalasorput Namminersornerullutillu Oqartussat ilisarnaataat. Morten Stürupimit ilusilersorneqartoq. Offsetimik naqitaq. Arkip angissusaa mærkit 50-it. Kigutaasai 12 ¾. Nalinga: 11,00 kroner.
- kiisalu saqqummersinneqartut kingullersaat
Juunip ulluisa 21-iat 2009. Namminersulerneq. Qaqqaq puisinit, qaannanit, tuukkarnit il.il. qaqqap qaavanut tikkuarsimasunik ungalusimasoq. Aka Høeghip qalipagaa. Offsetimik naqitaq. Arkip angissusaa mærkit 20-it. Kigutaasai 12 ¾. Nalinga: 6,25 kroner.
Allattoqarfimmi torsuusat frimærkinik tunissutinik kusassarneqarsinnaanerat Siulittaasup nuannaarutigaa.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuannut Josef Motzfeldtimut oqarasuaat angallattagaq +299 55 76 41 attaveqarfigalugu pissarsiarineqarsinnaapput.