2024 2023 2022 Flere år...
24-06-2010
Inuusuttut Inatsisartoqartitsisarneq sukumiisumik piareersarneqaqqaartariaqartarpoq
Ullaaq radioaviisimi Siumup Inuusuttunut Suleqatigiiffiata siulittaasua Lars Frederik Lundblad ilaatigut ima oqaaseqarpoq: ”Inuusuttut Inatsisartuisa 2011-mi kinguartinneqarnerat Siumup inuusuttaasa eqqumiigaat, aamma qaaqqusissummik suli tigusaqanngilavut.”
Tamatuma pissutissaqartilerpaanga Inuusuttut Inatsisartuinik taallugu aaqqissuussisarnerni suleriaatsit makku SIS-ip siulittaasunut Lars Frederik Lundbladimut erseqqissassallugit.
Inuusuttut Inatsisartui 2003-imiillu ukioq allortarlugu ingerlanneqartarput. Inatsisartut Siulittaasoqarfiata aalajangertarpaat tullianik Inuusuttut Inatsisartuinik taallugu aaqqissuussinermi suna qulequtarineqassanersoq.
Ukioq Inuusuttut Inatsisartuinik taallugu aaqqissuussiviusussaq sioqqullugu upernaakkut ilinniarfiit aallarniutaasumik allaffigineqartarput qinnuigalugit Inatsisartut Allattoqarfiannut nalunaaruteqaqqullugit ukiup tulliani Inuusuttut Inatsisartuinik taallugu aaqqissuussinissamut peqataanissamut soqutiginninnerlutik. Tamatuma kingorna ilinniarfinnut peqataasussanut atortussat ilinniartitsinermi atugassat suliarineqartarput.
Inuusuttut Inatsisartuinut peqataanermut aallaaviusarpoq ilinniarfinni ataasiakkaani qaammatini marlussunni piareersarsimaneq. Ilinniarfinni ilinniartut qulequtaq sammineqartussaq qaammatini arlalinni sammisarpaat, sulinerullu tamatuma inernerisarlugu qulequtaq aalajangerneqarsimasoq aallaavigalugu Inuusuttut Inatsisartuinut oqaluuserisassanik siunnersuusiorneq.
Inuusuttut Inatsisartuinut peqataasussat ilinniarfiit ataasiakkaat sinniisaattut toqqarneqartarput. Novembarip qaammataanni taakku saniatigut partiit inuusuttaasa sinniisaannik Inuusuttut Inatsisartuini naalakkersuisutut inissisimasussanik qaaqqusisoqartarpoq.
Partiit inuusuttaasaa sinniisaat taakku oqaluuserisassat Inatsisartut Inatsisartuini oqaluuserisassanut ilanngunneqareeraangata siunnersuutinut ataasiakkaanut akissuteqaasiortussaapput. Suliaq tamanna aallartittarpoq qaammammi Inuusuttut Inatsisartunik taallugu aaqqissuussiviusussami.
Inatsisartut nittartagaat Inuusuttut Inatsisartuinik taallugu siusinnerusukkut aaqqissuussisarsimanernit atortussanik aallarfiusinnaasoq innersuussutigissavara.
Naggataatigut ilisimatitsissutitut innersuussutigissavara Inatsisartut Siulittaasoqarfiannut partiit Inuit Ataqatigiit, Siumut, Demokraatit Atassullu ilaasortaatitaqarmata. Siulittaasoqarfiup tamarmiusup Inuusuttut Inatsisartuinik taallugu aaqqissuussinissap 2012-imut kinguartinneqarnissaanik aalajangerneq akuerisaraa. 2012-imi aaqqissuussinissami nutaatut meeqqat atuarfianni klassit angajulliit aallaavigineqassapput. Ulloq 23. juni tusagassiorfinnut nalunaarut ilanngullugu innersuunneqarpoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuannut Josef Motzfeldtimut angallattagaq mobil +299 55 76 41 saaffiginnilluni pissarsiarineqarsinnaapput.