2024 2023 2022 Flere år...
16-08-2010
Nunat Avannarliit Killiit Siunnersuisoqatigiiffiata siulittaasua Josef Motzfeldt Kalaallit Nunaanniillu aallartitat Tasiilami aggustip ulluisa 23-ianni ukiumoortumik ataatsimiinnermi peqataassapput
Nunat Avannarliit Killiit Siunnersuisoqatigiiffiata siulittaasua Josef Motzfeldt Kalaallit Nunaanniillu aallartitat Tasiilami aggustip ulluisa 23-ianni ukiumoortumik ataatsimiinnermi peqataassapput
Inatsisartut aamma Nunat Avannarliit Killiit Siunnersuisoqatigiiffiata siulittaasua Josef Motzfeldt Nunat Avannarliit Killiit Siunnersuisoqatigiiffiata ukiumoortumik ataatsimiinnissaanut sapaatip akunnerata tulliani Tasiilami ingerlanneqartussamut qaaqqusisuuvoq. Kalaallit Nunaannit aallartitat Ruth Heilmann, Jens Imanuelsen, Jane Petersen, Justus Hansen aamma Siverth K. Heilmann angalaqatigissavai.
Nunat Avannarliit Killiit Siunnersuisoqatigiiffiata ukiumoortumik ataatsimiinnera ataasinngornermit aggustip ulluisa 23-ianniit pingasunngornermut aggustip ulluisa 25-iannut 2010 ingerlanneqassaaq.
Kalaallit Nunaanniit aallartitat saniatigut Nunat Avannarliit Killiit Siunnersuisoqatigiiffiannut ilaasortaapput Islandimi inatsisartunut Althingimut ilaasortat tallimat aamma Savalimmiuni inatsisartunut Lagtingimut ilaasortat tallimat. Pineqartut saniatigut Kalaallit Nunaanniit peqataassaaq nunat avannarliit suleqatigiinnerannut Naalakkersuisoq Palle Christiansen, nunanillu avannarlernit allanit Kent Olsson Nunat Avannarliit Siunnersuisoqatigiiffiannit aamma Marit Nybakk Norgemi Stortingimit.
Nunat Avannarliit Killiit Siunnersuisoqatigiiffiata ukiumoortumik ataatsimiinnermini Siunnersuisoqatigiiffiup inassutigisarsimasai inassuteqaatissaalu oqallisigissavai. Siunnersuisoqatigiiffiup inassuteqaatigisarsimasaasa malitseqartinneqartarnerat pillugu suleqatigiinnissamut ministerit nalunaarutaat aamma siunnersuisoqatigiiffimmut ilaasortat isummerfigissavaat. Taamatuttaaq juunip qaammataani Islandimi Savalimmiunilu nunani avannarlerni killerni aalisarnermik aqutseriaatsit assigiinngitsut pillugit siunnersuisoqatigiiffiup ataatsimeersuartitsineranit angusat nalilerneqassapput. Tamatumunnga nangissutitut aappaagu ataatsimeersuartitsinissami Savalimmiuni ingerlanneqartussami sammineqarsinnaasut ilaasortat oqallisigissavaat. Tamakku saniatigut Naalakkersuisoq Palle Christiansen Nunat Avannarliit Siunnersuisoqatigiiffiannit Norgemi Stortingimit qaaqqusat peqatigalugit tamarmik immikkut saqqummiussaqassapput.
Nunat Avannarliit Killiit Siunnersuisoqatigiiffiata siulittaasuata Josef Motzfeldtip kissaatigaa nunat avannarliit killiit suleqatigiinnerata nunani avannarlerni killerni innuttaasut qanimut suleqatigalugit taakkulu aallaavigalugit ingerlanneqarnissaa. Nunat Avannarliit Killiit Siunnersuisoqatigiiffiat innuttaasut ataasiakkaat pillugit atavoq, tassanngaanniit innuttaasut nunani avannarlerni killerni allani pissutsit pillugit paasisaqarusukkunik ikiorneqarlutillu ilitsersorneqarsinnaallutik.
Taamaattumik aamma siunnersuisoqatigiiffiup ukiumoortumik ataatsimiinnerani pisussat eqqarsaatigalugit innuttaasut periarfissinneqassapput nunani avannarlerni killerni inatsisartunut ilaasortanik naapeqateqarnissamut pingasunngornermi ulloq 25. august nal. 22.00 katersortarfimmi qitinnertalimmik naapeqatigiinnermi, nunani avannarlerni killerni pingasuni qangaaniilli ileqquusut malillugit erinarsorfiusumi qitiffiusumillu. Tamatuma saniatigut nunat avannarliit killiit suleqatigiinnerat malunnartinniarneqassaaq Tasiilami Filateliami ataatsimut nunani avannarlerni frimærkimik saqqummersinneqartarsimasunik saqqummersitsinikkut. Saqqummersitsineq siulittaasumit Josef Motzfeldtimit ataasinngornermi, ulloq 23. august nal. 17.10 ammarneqassaaq.
Ukiumoortumik ataatsimiinnerup Tasiilami inissinneqarsimaneranut pissutaavoq ukiumoortumik ataatsimiinneq nunami siunnersuisoqatigiiffimmi siulittaasuutitaqartumi ingerlanneqartarmat. Kalaallit Nunaat 2009-mi aggustimiit Nunat Avannarliit Killiit Siunnersuisoqatigiiffianni siulittaasuutitaqarpoq, 2009-milu ukiumoortumik ataatsimiinnermi isumaqatigiiffioqisumik aalajangerneqarpoq nunani avannarlerni naalakkersuinermik suliallit 2010-mi ukiumoortumik ataatsimiinnerat Tasiilami ingerlanneqassasoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 saaffigalugu pissarsiarineqarsinnaapput.