Nutaarsiassat

17-08-2010

Siunnersuutinik tunniussivissap kingorna ullut sisamat qaangiutiinnartut 2010-mi ukiakkut ataatsimiinnermi UKA2010-mi oqaluuserisassat Siulittaasoqarfiup nalunaarutigai

Siunnersuutinik tunniussivissap kingorna ullut sisamat qaangiutiinnartut 2010-mi ukiakkut ataatsimiinnermi UKA2010-mi oqaluuserisassat Siulittaasoqarfiup nalunaarutigai

Inatsisartut siulittaasuata Josef Motzfeldtip UKA2010-mi oqaluuserisassat taama siusitsigisukkut nalunaarutigineqarnerat nuannaarutiginngitsuunngilaa. Oqaluuserisassatut siunnersuutinik tunniussivissaq aggustip ulluisa 13-iannut killilerneqarsimavoq, taamaalillunilu ataatsimiinnermi oqaluuserisassanut siunnersuut ullut sisamat qaangiutiinnartut piareerluni.

Siulittaasoqarfiup oqaluuserisassanut siunnersuut ippassaq oqaluuseraa siunnersuullu ilanngunneqartoq akueralugu.

Taamaalilluni Inatsisartut ukiakkut ataatsimiinnerat tallimanngornermi ulloq 17. september aallartissaaq, ulloq 11. november naammassineqarnissaa naatsorsuutigineqarluni.

Oqaluuserisassatut siunnersuutit ullut ataatsimiiffiusut 19-it ingerlaneranni naammassineqarnissaat naatsorsuutigineqarpoq. Ulluni ataatsimiiffiusuni ataatsiakkaani oqaluuserisassat ingerlaavartumik oqaluuserineqartassapput, immikkoortut ullormi ataatsimiiffiusumi angumerineqanngitsut ullormi ataatsimiiffimmi tullermi oqaluuserineqartassallutik.

Ullut ataatsimiiffiusussat ima agguataarneqarput:

• Sapaatit akunnerini 38-imi, 39-imi 40-milu ullut ataatsimiiffiusartussat pingasuupput (marlunngorneq, pingasunngorneq sisamanngornerlu).
• Sapaatit akunnerini 41-mi, 42-mi 43-milu ullut ataatsimiiffiusartussat marluupput (marlunngorneq pingasunngornerlu).
• Sapaatit akunnerat 44 Nunat Avannarliit Siunnersuisoqatigiiffiata ataatsimiinnera pissutigalugu Inatsisartuni ataatsimiiffiussanngilaq.
• Sapaatit akunnerat 45 UKA2010-mi ataatsimiiffissatut pilersaarutit kingullersaraat marlunngorneq, pingasunngorneq sisamanngornerlu ataatsimiiffiussallutik.

Siulittaasoqarfiup aamma aalajangerpaa suleriaatsimi § 36, imm. 7 naapertorlugu aalajangersimasumik sapaatip akunnikkaartumik akunnermik apeqquteqarfiusinnaasoqassasoq. Sapaatip akunnikkaartumik pingasunngornerit tamaasa nal. 11:00-imiit 12:00-imut apeqquteqartoqartarsinnaassaaq, tamatumalu kingorna unikkallartoqartassalluni ataatsimiinnerit nal. 13:00 aallarteqqinnissaasa tungaannut.

UKA2010-mut tunngatillugu atortussat tamarmik inatsisartut.gl-imi takuneqarsinnaapput. Atortussanik tamanik ingerlaavartumik qarasaasiakkut pissarsisarnissamut nalunaarnissamut periarfissaqarpoq. Tamanna kissaatigigaanni Laila Kristensen lkri@inatsisartut.gl saaffigineqartassaaq.

Josef Motzfeldt

Inatsisartut Siulittaasuat

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 saaffigalugu pissarsiarineqarsinnaapput.