2024 2023 2022 Flere år...
21-08-2010
Nunani avannarlerni killerni inatsisartut siulittaasui Tasiilami ataatsimeeqatigiipput
Nunani avannarlerni killerni inatsisartut siulittaasui Tasiilami ataatsimeeqatigiipput
Inatsisartut siulittaasuata Josef Motzfeldtip ullumi nunani avannarlerni inatsisartuni siulittaasoqatini Ásta R. Jóhannesdóttir, Islandimi inatsisartut Alþingip præsidentia, aamma Hergeir Nielsen, Savalimmiuni inatsisartut, Løgtingip siulittaasua, Tasiilami ataatsimeeqatigai.
Ataatsimeeqatigiittarnerit 2003-miilli ingerlanneqartalerput, nunani avannarlerni killerni nunat pingasut paarlakaallutik ataatsimiiffiusarlutik. Taamatut naapeqatigiittarnerit siunertaraat inatsisartuni pingasuusuni naalakkersuisunikkut pissutsit, taamatullu aamma nunani pineqartuni taakkulu inatsisartuini massakkorpiaq sammineqartut pillugit ilisimateqatigiittarnissaq. Tullianik 2011-mi Savalimmiuni ataatsimiittoqassaaq.
Inatsisartut siulittaasuisa ataatsimeeqatigiinnerat Nunat Avannarliit Killiit Siunnersuisoqatigiiffiata ukiumoortumik ataatsimiinnera sioqqutitsiarlugu ingerlanneqarmat, tupinnanngitsumik Nunat Avannarliit Killiit Siunnersuisoqatigiiffianni suleqatigiinneq aamma oqaluuserineqarpoq. Ukioq manna 2008-mit aalajangersagaq nunani avannarlerni killerni ataatsimut "Nunat Avannarliit Killiit Ulluat"-nik taallugu nunat avannarliit killiit suleqatigiinnerata malunnartinniarneqartarnissaanik nunanut pingasunut kaammattuutaasoq maluginiarneqarpoq. Nunat avannarliit killiit ulluat taanna siullermeerutaasumik malunnartinniarneqassaaq nunat avannarliit killiit ataatsimut frimærkinik saqqummersittarsimasaannik Tasiilami saqqummersitsinikkut. Saqqummersitsineq Inatsisartut siulittaasuata Josef Motzfeldtip ataasinngornermi, ulloq 23. august ammassavaa.
Nunat Avannarliit Killiit Siunnersuisoqatigiiffiata ukiumoortumik ataatsimiinnera aamma ataasinngorpat aallartissaaq. Ataatsimiinnermi tassani Inatsisartunit, Alþingimit Løgtingimiillu aallartitat Siunnersuisoqatigiiffimmit kaammattuutissatut aalajangersakkat oqallisigineqarnerisa saniatigut siulittaasussamik nutaamik qinersissapput. Ukiumoortumik ataatsimiinnermut siunnersuisoqatigiiffiup maanna siulittaasorisaa Josef Motzfeldt qaaqqusisuuvoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 sianerfigalugu pissarsiarineqarsinnaapput.