2024 2023 2022 Flere år...
24-08-2010
Nunat Avannarliit Killiit Siunnersuisoqatigiiffiata Tasiilami ukiumoortumik ataatsimiinnera ammarneqarpoq
Nunat Avannarliit Killiit Siunnersuisoqatigiiffiata Tasiilami ukiumoortumik ataatsimiinnera ammarneqarpoq
Inatsisartut siulittaasuata Josef Motzfeldtip ippassaq ualikkut Nunat Avannarliit Killiit Siunnersuisoqatigiiffiata 26-issaanik ukiumoortumik ataatsimiinnera ammarpaa. Ammaaneq Tasiilami kommunip allaffiani kommunalbestyrelsiusimasup ataatsimiittarfitoqaani ingerlanneqarpoq.
Kalaallit Nunaannit aallartitat Tasiilamut arfininngormalli tikipput, Savalimmiuniit Islandimiillu aallartitat ataasinngornermi Tasiilamut tikillutik. Silagissuugaa seqinnarik nunat pingasut aallartitaasa, nunanit ataasiakkaanit tamanit inatsisartunut ilaasortat arfinillit, ataatsimiinnertik qiimaqalutik aallartippaat.
Nunat Avannarliit Killiit Siunnersuisoqatigiiffiata siulittaasuata Josef Motzfeldtip aallartitat Tasiilamut tikilluaqquai. Ammaalluni oqaaseqarnermini erseqqissarpaa Nunat avannarliit killiit suleqatigiinnermikkut peqatigiillutillu soqutigisaminnik ingerlatsinermikkut annertuunik angusaqarsinnaasut.
Kalaallit Nunaanni nunat avannarliit killiit suleqatigiinnerannut naalakkersuisup Palle Christiansenip tamanna taperserpaa ilaatigut innersuussutigalugu Nunat Avannarliit Killiit peqatigiinnermikkut ataatsimullu soqutigisaminnik siuarsaanermikkut angusinnaasaat imaannaanngitsuusut.
Nunat Avannarliit Killiit Siunnersuisoqatigiiffiata allattaanerata Þórður Þórarinssonip erseqqissarpaa pingaaruteqartoq aallartitanut isumagissallugu kaammattuutitut aalajangersakkat nutaat ukioq manna ukiumoortumik ataatsimiinnermi akuersissutigineqartussat ukiap ingerlanerani nunat ilaasortat inatsisartuini oqaluuserisassanut ilanngutereerneqarnissaat, taamaalillutik ukioq nutaaq aallartitsinnagu nunani ataasiakkaani naalakkersuisunit iliuuseqarfigineqareersinnaaniassammata.
Ukiumoortumik ataatsimiinneq ammarneqareermat nunanit pingasunit aallartitat Filatelialiarput. Tassani ilaatigut saqqummersinneqarput ukioq manna Islandimi juullimut nipitittagassap titartarneqaqqaarneri. Tamatumunnga atatillugu Filateliap Nunat Avannarliit Killiit Siunnersuisoqatigiiffianni aallartitat angerlamut ilaquttaminnut kammalaatiminnullu postkortinik nassiussisinnaanerannik periarfissaqartippai, frimærkitai kusanartunik naqissuserlugit nassiunneqartussanik.
Tamatuma kingorna aallartitat katersugaasivimmi Kalaallit Nunaannit frimærkinik Martin Mørchillu, ukiuni arlalinngortuni Kalaallit Nunaanni allakkeriveqarfimmik suleqateqarsimasup, imilertakkanik qalipagaanik saqqummersitsineq alakkarpaat.
Nunat Avannarliit Killiit Siunnersuisoqatigiiffiata ukiumoortumik ataatsimiinnera ullumi marlunngornermi ingerlaqqissaaq, ilaatigut Norgemi inatsisartuisa Stortingip siulittaasoqarfianit Nunallu Avannarlliit Siunnersuisoqatigiiffiannit qaaqqusat saqqummiussereerpata Nunat Avannarliit Killiit Siunnersuisoqatigiiffiata aalajangersagarisarsimasai nutaatullu aalajangersagassatut siunnersuutit oqaluuserineqassallutik. Taakku saniatigut aamma siulittaasoqarfimmik nutaamik qinersisoqassaaq aappaagulu aalajangersimasunik qulequtaqarluni ataatsimeersuartitsinissami sammineqartussaq aalajangersarneqarluni.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.