2024 2023 2022 Flere år...
25-08-2010
Nunat Avannarliit Killiit Siunnersuisoqatigiiffiata aalangersakkakkut Tunup pitsaanerusumik pilersorneqalernissaa kaammattuutigaa
Nunat Avannarliit Killiit Siunnersuisoqatigiiffiata aalangersakkakkut
Tunup pitsaanerusumik pilersorneqalernissaa kaammattuutigaa
Aappaagu aalajangersimasumik qulequtaqarluni ataatsimeersuartitsinissami "Utoqqarnut inissiat eqqarsaatigalugit nunani avannarlerni killerni siunissami aaqqiissutaasinnaasut" qulequtarineqassaaq. Tamanna Siunnersuisoqatigiiffiup ukiumoortumik ataatsimiinnerani Tasiilami ippassaq naammassineqartumi aalajangerneqarpoq.
Aalajangersimasumik qulequtaqarluni ataatsimeersuartitsineq 2011-mi juunimi Savalimmiuni ingerlanneqassaaq.
Ukiumoortumik ataatsimiinnermi suliassat pingaarnersarisarpaat kaammattuutitut aalajangersakkat, nutaat pisoqqallu, misissuataarneqartarnerat. Taamaattumik ataatsimiinnermi matumani aamma kaammattuutitut aalajangersakkat misissuataarneqarput. Kaammaattuutitut aalajangersakkat siunnersuisoqatigiiffiup sakkussaasa pingaarnersaraat nunani avannarlerni killerni naalakkersuinikkut suliniuteqarnissaq siuarsarniarlugu. Kaammattuutitut aalajangersagak taamaalilluni aalajangiiffigisassatut siunnersuutaavoq nunat ilaasortat inatsisartuinut tamanut saqqummiunneqartartoq. Siunnersuisoqatigiiffiup taamaalilluni kaammattuutitut aalajangersakkat arfinillit nutaat akuerai, tamatumunngalu ilanngullugu nalilerneqarluni siusinnerusukkut kaammattuutitut aalajangersagaasimasut pingasut siunertaat naammassineqarsimasut, taamalu aalajangersakkat taakku atorunnaarsinneqarsinnaasut.
Aalajangersakkat nutaat ilaat Tunumi innuttaasunut toqqaannartumik sunniuteqarsinnaasoq tassaavoq Nunat Avannarliit Killiit Siunnersuisoqatigiiffiata nunatsinni Naalakkersuisunut kaammattuutigimmagu Tunup pilersorneqarnerata allatut aaqqissuunneqarsinnaaneranik periarfissanik misissuinermik aallartitseqqullugit, tassungalu ilanngullugu pilersuisussaatitaanermut isumaqatigiissut atuuttoq pilersorneqarnerup pitsaanerulersinneqarsinnaaneranut sunik aporfissaqartitsinersoq nalileqqullugu.
Siunnersuisoqatigiit aamma ukioq manna siunnerusukkut aalajangersimasumik quleqataqartitsilluni aataatsimeersuartitsineq tassanilu nunat avannarliit killiit pinngortitami pisuussusimik piujuartitsinermik tunngaveqartumik iluaquteqarniarsinnaatitaanermut pisinnaatitaaffeqarnerannik inerniliussat tunngavigalugit naalakkersuinikkut oqaaseqaateqarput. Oqaaseqaat tamakkiisumik tusagassiorfinnut nalunaarummut matumunnga ilanngussatut ilanngunneqarpoq.
Nunat Avannarliit Killiit Siunnersuisoqatigiiffiat ataatsimiinnerminut aamma Norgemit Sverigemiillu qaaqqusisimavoq, aamma saqqummiussaqartunik.
Norgemit peqataavoq Marit Nybakk, Norgemi inatsisartut Stortingip siulittaasuata tullia, taassumalu erseqqissarpaa silap pissusiisa allanngoriartornerat pissutigalu ajornartorsiutit iluarsineqarsinnaanissaannut taamatullu aamma Mexicop kangerliumanersuani uuliaarluerneq innersuussutigalugu piujuaannartitsinermik tunngaveqarluni pisuussutinik iluaquteqarniarnerup qularnaarneqarnissaanut suleqatigiinneq qitiusoq. Qanittukkut Island Norgelu Atlantikup Avannaani ataatsimut alapernaarsuineq pillugu isumaqatigiissuteqarput. Tamanna illersornissamut suleqatigiinnissamut isumaqatigiissutit pitarlugit pivoq, taamalu nunat avannarliit suleqatigiinnerinut aamma nukittorsaataalluni. Marit Nybakkip ilanngullugu nuannaarutigaa issittoq aningaasaqarniarnikkut avatangiisitigullu soqutigisat tunngavigalugit soqutigineqaleriartuinnarmat.
Kent Olssonip, Sverigemi inatsisartunut Riksdagimut ilaasortap Nunat Avannarliit Siunnersuisoqatigiiffiatalu alaatsinaatsitaata, taamatuttaaq erseqqissarpaa nunat avannarliit killiit suleqatigiinnerat aamma Nunant Avannarliit Siunnersuisoqatigiiffiannut maligassiuisinnaasartoq, taamatullu aamma ukiakkut Nunat Avannarliit Siunnersuisoqatigiiffiata ataatsimiittarnerini nunat avannarliit killiit peqataasarnerat annertuumik iluaqutaasartoq. Tassuuna nunat ataasiakkaat akornanni toqqaannartumik attaveqaqatigiinnernik pilersitsinissat periarfissinneqartarput. Nunat avannarliit killiit asseqanngillat, tamaaniikkannilu najukkani innuttaasunik inuttut ilisarisimasaqalernissamut piffissarluni periarfissaqartarluni. Oqaaseqarnermini nunat avannarliit killiit suleqatigiinneranni annaassiniartarnermut upalungaarsimatitaqarnissaq siunissami suliassanut pingaatilinnut ilaasussatut oqaatigaa. Avangiisinut tunngatillugu apeqqutit sammisassat allat pingaarutillit aamma ilagaat.
Tamatuma saniatigut Naalakkersuisunut ilaasortaq Palle Christiansen nunat avannarliit suleqatigiinnerata pingaaruteqassusia pillugu nassuiaateqarpoq. Tamatumani Nunat Avannarliit Killiit Siunnersuisoqatigiiffiata nunani ataasiakkaani nunallu tamalaat akornanni suleqatigiiffinni sammineqartuni pingaarutilinni oqariartuutini iluatsittumik saqqummiussinnaasarsimavai.
Tasiilami ukiumoortumik ataatsimiinneq unnugu nal. 22.00 katersortarfimmi qiteqatigiinnermik naggaserneqassaaq. Siunnersuisoqatigiiffimmut ilaasortat aqagu ulloq 26. august angerlamut aallakaassapput aggustimi silagisseruttornerani Tasiilap illoqarfia nuannersunik misigisaqarfigereerlugu.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.
Siunnersuisoqatigiiffiup aalajangernissaanut siunnersuut nr. 4/2010