Nutaarsiassat

01-09-2010

Inatsisartuni pappiarartornerup suli annikillisinneqarnissaa Siulittaasoqarfiup aalajangerpaa

Inatsisartuni pappiarartornerup suli annikillisinneqarnissaa Siulittaasoqarfiup aalajangerpaa

Siulittaasoqarfiup kingullermik ataatsimiinnermini aalajangerpaa Inatsisartuni pappiarartorneq suli annikillisinniarneqassasoq. Tamatumunnga taarsiullugu Inatsisartut nittartagaat inatsisartut.gl siunissami qitiutinneqarnerulissaaq, tassani atortussat tamarmik aaneqarsinnaalissallutik.

Inatsisartut Allattoqarfiata Inatsisartunit Inatsisartunullu kiisalu avataani tigusisartunut ukiup ingerlanerani ingerlaavartumik atortussanik agguaassisarsimavoq. Ukiulli ingerlanerini agguaassaasartut ikilisinneqarsimapput. Pappiarartorneq suli annikillisikkumallugu ukiuni kingullerni atortussat amerliartuinnavissut qarasaasiakkut agguaanneqartarnerat atorneqaleriartuinnavissimavoq. Siulittaasoqarfiullu kingullermik ataatsimiinnermini aalajangerpaa pappiarartorneq suli annikillisinneqassasoq taamaattumillu Inatsisartut taakkulu ataatsimiinnerinut atatillugu atortussat siunissami agguaanneqartarnissaat eqqarsaatigalugit suleriaatsit nutaat eqqunneqassallutik.

Oqaluuserisassat nassiunnerini taamaallaat atortussat pappiaranngorlugit nassiunneqartalissapput

Immikkoortut ataasiakkaat qulequtaannut takussutissiat, oqaluuserisassat allattorsimaffiat taamatullu aamma ulluni ataasiakkaani oqaluuserisassatut siunnersuutit suli ataatsimoortillugit Inatsisartut ataatsimiinnissaat sioqqullugu Inatsisartunut ilaasortanut tamanut, Naalakkersuisunut, partiit allattoqarfiinut naalakkersuisullu siulittaasuata naalakkersuisoqarfianut nassiunneqartassapput. Atortussat taamatuttaaq Inatsisartut nittartagaanni peqatigitillugu saqqummersinneqartassapput, kikkunnullu tamanut taamatut kissaateqartunut qarasaasiakkut nassiunneqarsinnaallutik.

Inatsisartut ataatsimiinnerata ingerlanerani atortussat Inatsisartunut ilaasortanut, naalakkersuisunut, partiit siunnersortaannut avataanilu pisartagaqartunut siunissami taamaallaat qarasaasiakkut nassiunneqartalissapput. Tamatumani pineqarput akissuteqaatit, isumaliutissiissutit assigisaallu.

Immikkoortunut ataasiakkaanut atatillugu atortussanik ilisiviit

Siusinnerusukkut katersuunnermi oqaluuserisassat immikkoortut ataasiakkaat pillugit atortussat torsuusarsuarmi immikkut ilisiveqartinneqartarsimagaluarput, tassani oqaluuserisassat ataasiakkaat pillugit paasissutissat aaneqarsinnaasarlutik. Ilisiviit taakku maannakkut atorunnaarsinneqassapput.

Tusagassiortunut paasissutissiisarnermullu ini nutaaq

Ataatsimiittarfitoqqami 1-imi, Inatsisartut ataatsimiittarfiata akerpiaaniittumi, tusagassiortunut paasissutissiisarnermullu inimik pilersitsisoqassaaq. Tassani ilaatigut qarasaasiakkut paasissutissiisarfimmik toortaaginnarluni paasissutissanik pissarsiviusinnaasumik ikkussisoqassaaq, taamaalilluni aamma Inatsisartut ataatsimiinnerinik tusarnaartut ilaasortallu Inatsisartut pillugit paasissutissanik inatsisartullu ataatsimiissutaannik imaaliallaannaq naqitertitsisarsinnaassallutik.

§ 36, imm. 1 malillugu apeqqutit

Suleriaatsimi § 36, imm. 1 malillugu apeqqutit siunissaami taamaallaat qarasaasiakkut elektroniskimik nassiunneqartalissapput inatsisartullu nittartagaannut ilanngunneqarlutik.

Josef Motzfeldt

Inatsisartut Siulittaasuat

Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.