2024 2023 2022 Flere år...
08-09-2010
Puisit amiinut tunngatillugu suliami Tjekkiap Kalaallit Nunaat tapersersorniarpaa
Puisit amiinut tunngatillugu suliami Tjekkiap Kalaallit Nunaat tapersersorniarpaa
Inatsisartut Siulittaasuata Josef Motzfeldtip Pragimi pisortatigoortumik tikeraarnerani ullut aappaanni imminnut uiggiuttuinnarnik ataatsimiittoqartarpoq.
Inatsisartut Siulittaasuata Tjekkiami senatimi ataatsimiititaliat siulittaasuinik arlalinnik naapeqateqarpoq, taakkunani annerusumik soqutigineqarluni Namminersornerup eqqunneqarneranit ukioq ataaseq sinnerlugu ingerlareersoq allannguutinik sunik Kalaallit Nunaat misigisaqarsimanersoq, tamatumalu saniatigut aamma Kalaallit Nunaata EU-llu akornanni pissutsit oqallisigineqarlutik. Piffissaq iluatsillugu EU-mi puisinit nioqqutissianik inerteqquteqarniarnermik suliap tikeqqinneqarpoq.
Inatsisartut Siulittaasuata taamatuttaaq Karlsuniversitetip inatsisilerinermik ilisimatusarfiani ilinniagartuut sivisungaatsiartumik naapisimaarpai, tassani annerusumik soqutigineqarluni Danmarkimi inatsisinut tunngaviusunut Danmarkimillu naalagaaffeqateqarnermut sanilliullugu Namminersorneq pillugu inatsisikkut Kalaallit Nunaata nutaamik inissisimalersimanera, peqatigitillugu aamma Kalaallit Nunaanni ilinniagartuunut attaveqarnerulernissaq aamma annertuumik soqutigineqarluni.
Kiisalu Inatsisartut Siulittaasuat Josef Motzfeldt periarfissaqartinneqarpoq Tjekkiami naalakkersuisut siulittaasuata tullianik Nunanullu allanut ministerinik Karel Schwarzenbergimik naapeqateqarnissaminut. Hr. Schwarzenbergip suliassat Kalaallit Nunaannut tunngasut nalinginnaasumik oqallisigineqarneranni Inatsisartut Siulittaasuannut ilisimatitsissutigaa puisinit nioqqutissianut tunngatillugu suliassaq EU-mi Ministerrådimut saqqummiunneqassagaluarpat taava suliassami Tjekkiap Kalaallit Nunaat tapersersorumaaraa. Ataatsimiititalianik ataatsimeeqateqartarnerni oqaatigineqartut assigalugit Nunanut allanut ministerip aamma oqaatigaa Danmarkimut attaveqarneq eqqarsaatigalugu ukiuni kingullerni Kalaallit Nunaata aqqusaarsimasai arlalippassuartigut Tjekkiap nammineq misigisimasaanut assingusut, taamaattumillu aamma Tjekkiap nammineq misilittagai tunngavigalugit nunami namminermi oqartussaaffiit nunanullu allanut attaveqarnerit ineriartortinneqarneranni misilittakkaminik tikkuagaqarsinnaasoq, qularnanngitsumik Kalaallit Nunaata aamma aqqusaarumaagaanik.
Pragimut pisortatigoortumik tikeraarnermut malunnartumillu Kalaallit Nunaata Tjekkiami innuttaasut akornanni soqutigineqarneranik malussarfiusumut atatillugu Inatsisartut Siulittaasuata nuannaarutigalugu paasivaa Siumup kissaatigimmagu Kalaallit Nunaata EU-mi erseqqinnerulersinneqarnissaa. Inatsisartut Siulittaasuata taamatut EU-mik suleqateqarnermi peqataanerulernissamik naalakkersuinikkut kissaateqarnerup aamma Inatsisartuni nalinginnaasumik inatsisartoqarnermi sulinermi ersersinneqarnissaa qilanaaraa, tassami Inatsisartut sinnerlugit pisortatigoortumik angalanerni nunani allani inatsisartunut ilaasortat Kalaallit Nunaanni tikeraarnerini peqataasarnerit aamma aalajangiisuulluinnarmata nunanik avatitsinniittunik Kalaallit Nunaata suleqateqarneranik annertusaanissamut.
Inatsisartut Siulittaasuata tikeraarnini aamma arlalinnik naapeqateqartarnernik naammassissavaa ulloq 8. september.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq + 45 24 42 34 06 attaveqarfigalugu pissarsiarineqarsinnaapput