2024 2023 2022 Flere år...
14-09-2010
Inatsisartut Siulittaasuata Josef Motzfeldtip FIFA-p præsidentia Joseph Sepp Blatter naapippaa
FIFA-p præsidentia Joseph Sepp Blatter Kalaallit Nunaannut tikeraarnerminut atatillugu ullumi Inatsisartut Siulittaasuannik Josef Motzfeldtimik naapeqateqarpoq.
Joseph Sepp Blatterip Inatsisartut Siulittaasuannut FIFA-p tikeraarneranik eqqaamassutissanik medaaliamik erfalasuaqqamillu allassimasumik "Le President, FIFA Official visit to Greenland" (FIFA-p præsidentiata Kalaallit Nunaannut pisortatigoortumik tikeraarnera) tunissuteqarfigaa.
Josef Motzfeldt tunissutigineqartunut qujassuteqarluni oqarpoq: "Naalakkersuinikkut timersornikkullu soqutigisat immikkoortisimanissaat ileqqussaavoq pitsaasoq, taamaattumillu aamma timersornerup silarsuaanit taama qaffasitsigisumik inissisimasumik maani Inatsisartuni tikeraartoqartarnerput qaqutigoorluni. Taamaattumik Hr. Præsident, nuannaarutigeqaarput ullumi maani allaffinni naapissinnaagatsigit siunissamilu maanga isertartussanut FIFA-p erfalasua saqqumilaartissinnaaleratsigu".
Tamanna pereermat Inatsisartut Siulittaasuata FIFA-p præsidentia ilullernut atsipaaqutinut attatinik Tunumit ujaqqanik pisatalinnik Namminersulernermillu eqqaamassutissamik marrarmik skåliliamik tunissuteqarfigaa. Joseph Sepp Blatterip Inatsisartut Siulittaasuata pulaartuisa allaffigisartagaat allaffigereermagu kaffisoreerlunilu Josef Motzfeldtip inatsisartut ataatsimiittarfiat kaffisortarfiallu Inatsisartunut siulittaasuusarsimasut qalipannerinik assiliartalersorneqarsimasoq alakkartippai.
Ullumi siusinnerusukkut Qaqortumi arsaattarfik ivigaasanik qalligaq pisortatigoortumik atoqqaarteriarlugu FIFA-p præsidentiata Kalaallit Nunaannut tikeraarnini ingerlateqqissavaa ullumi Nuummiit Ilulissanukassalluni.
Josef Motzfeldt
Inatsisartut Siulittaasuat
Paasissutissat sukumiinerusut Inatssiartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.