2024 2023 2022 Flere år...
17-09-2010
Siulittaasoqarfiup Inatsisartut ataatsimiinneranni oqaluuserisassat amerlassusissaat annertussusissaalluunniit aalajangerneq ajorpai
KNR-ip Radioaviisiata ullaaq nutaarsiassaatimini oqaatigaa Inatsisartut ukiakkut ataatsimiinneranni oqaluuserisassat nalinginnaasumit ikinnerusut, radioaviisillu tamatumunnga pissutaatillugu oqaluuserisassat arlallit siulittaasoqarfimmit itigartinneqarsimanerat.
Tamanna eqqunngilaq.
Siulittaasoqarfiup Inatsisartut ataatsimiinnissaannut oqaluuserisassat ilanngunneqartussat imarisassaat amerlassusissaalluunniit aalajangerneq ajorpai. Siulittaasoqarfik qaqutiguinnaq oqaluuseritinniakkanik itigartitsisarpoq, tamannalu pigaangat taamaallaat pissutaasarluni oqaluuserisassat ataatsimiinnerminni oqaluuserisassanngortissinnaanissaannut piumasaqaatit aalajangersarneqareersut naammassineqarsimanngikkaangata.
Tusagassiorfiit partiinut, ilaasortanut Naalakkersuisunulluunniiit attaveqarnissaat innersuussutigineqarpoq taakku oqaluuseritinniakkaminnik pingaarnersiuinerat suliassanillu qanoq amerlatigisunik oqaluuserisassanut ilanngussaqarnissamik kissaateqarnerat sukumiinerusumik paasisaqarfigerusukkunikku.
Taamaalilluni siunnersuutit oqaluuserisassanut ilanngukkusunneqartut amerlassusissaat imarisassaallu pineqartut taakku namminnerluinnaq aalajangigassarivaat.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq + 45 24 42 34 06 attaveqarfigalugu pissarsiarineqarsinnaapput.