2024 2023 2022 Flere år...
17-09-2010
Josef Motzfeldt Inatsisartut Siulittaasuattut qinigaaqqippoq
Ullaaq aqqaneq qaangilaara Inatsisartut Siulittaasuata Josef Motzfeldtip Inatsisartut 2010-mi ukiakkut ataatsimiinnerat ammarpaa.
Ileqquusoq malillugu ulloq Hans Egedep Illuani ullaakkorsioqatigiinnermik Annaassisitta Oqaluffiani naalagiaqatigiinnermik malitseqartinneqartumik aallartinneqarpoq. Naalagiaqatigiittoqareermat Inatsisartut Siulittaasuat Josef Motzfeldt siuttoralugu Inatsisartunut ilaasortat 31-it seqinnarissuugaa Naalakkersuisut naalakkersuisoqarfinnilu pisortat peqatigalugit Inatsisartut ataatsimiittarfiannut ingerlaaqatigiipput. Sinniisussat marluk aappaa Inuit Ataqatigiinniit aappaalu Kattusseqatigiit Partiiannit ullumi ataatsimiinnerup ammarneqarneranut angumersisinnaasimanngillat, taamaattorli Ivalo Thorin Inuit Ataqatigiinneersoq suli ataatsimiinneq naanngitsoq angumersilluni ilaasortatut inissaminut ingippoq. Kattusseqatigiit Partiiannit sinniisussaq Jens Jørgen Broberg ullumi kingusinnerusukkut aatsaat tikissaaq.
Inatsisartut ataatsimiinnerat aallartinneqarpoq Inatsisartut Siulittaasussaannik kiisalu Inatsisartut Siulittaasuata tullianik siullermik, aappaannik, pingajuannik sisamaannillu qinersinermik. Qinersinermi siulittaasoqarfik tamarmi qinigaaqqippoq, taamaalillunilu Josef Motzfeldt Inatsisartut ukiuanni aallartittumi aamma Inatsisartunut siulittaasuussalluni. Siulittaasoqarfimmut ilaasortat allat tassaapput Olga P. Berthelsen, Per Berthelsen, Finn Karlsen aamma Justus Hansen. Olga P. Berthelsen massakkorpiaq New Yorkimi Naalagaaffiit Peqatigiit ataatsimeersuarnerani peqataammat, uternissaata tungaanut Debora Kleist sinniisussaatut ilaasortaassaaq.
Siulittaasussamik siulittaasoqarfimmilu ilaasortassanik qinersisoqareerpat ataatsimiititalianut ataavartunut sinniisoqarfinnullu ilaasortassanik sinniisussanillu qinersisoqarpoq. Inatsisartut ataatsimeereermata ataatsimiititaliat ataasiakkaat inissititerput.
Ataatsimiititalianut qinersisoqareermat Naalakkersuisut siulittaasuat ammaanermi oqalugiarpoq.
2010-mi ukiakkut ataatsimiinnermi ullut ataatsimiiffiusussat 19-iussasut pilersaarutigineqarpoq. Ulluni ataatsimiiffiusuni ataasiakkaani oqaluuserisassat ingerlaavartussaassapput, taamaalillunilu oqaluuserisassat ullormi oqaluuserineqarfissaminni angumerineqanngitsoortut ullormi ataatsimiiffiusumi tullermi oqaluuserineqartassallutik.
Ukiakkut ataatsimiinnerup ulloq 11. november naammassineqarnissaa naatsorsuutigineqarpoq.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.