2024 2023 2022 Flere år...
21-09-2010
Nunat Avannarliit Siunnersuisoqatigiiffianni ilaasortat Malmömi marlunngornermi ulloq 21. aamma pingasunngornermi ulloq 22. september naapissapput
Nunat Avannarliit Siunnersuisoqatigiiffianni ilaasortat Malmömi ullumimiit pingasunngorneq ilanngullugu ataatsimiissapput, Inatsisartunit Kim Kielsen pinngortitamut avatangiisinullu ataatsimiititaliami ilaasortanngussaaq aammalu Hans Aronsen atugarissaarnermut ataatsimiititaliami ilaasortaalluni.
Nunani avannarlerni utertitsisarnermik aaqqissuussineq ilaatigut oqaluuserineqassaaq. Issittup imartaani isumannaatsuunissaq avatangiisinullu ulorianartorsiortitsisut sammisassaapput allat marluk Kim Kielsenip ilaasortaaqatini peqatigalugit erseqqinnerusumik oqaluuserisassai.
Nunani Avannarlerni nunanilu namminersorfiusuni nakorsat, kigutit nakorsaasa, peqqissaasut peqqinnissaqarfimmilu sulisutut akuerisaasut allat elektroniskiusumik nalunaarsorneqartarnissaat pillugu siunnersuut atugarissaarnermut ataatsimiititaliami Hans Aronsenip oqaloqatigiissutigissavaa.
Nunat Avannarliit Siunnersuisoqatigiiffiata ukiumoortumik ataatsimeersuarnissaa ukioq manna Islandimi illoqarfiit pingaarnersaanni Reykjavikimi novembarip ulluisa aappaannit sisamaata tungaanut ingerlanneqartussaq sioqqullugu septembarimi ataatsimiinnissat ataatsimiititaliat ataatsimiinnissaasa kingullersaraat. Taamaalilluni suliassat sorliit ataatsimeersuarnermi suliareqqinneqassanersut Malmömi aalajangerneqassaaq.
Ministeriunerit aammalu ministerit inatsisartullu arlalippassuit Nunanit Avannarlernit tamaneersut Nunat Avannarliit ataatsimeersuarneranni katersuutissapput.
Annertunerusumik paasisaqarniaraanni Ataatsimiititaliamut allatsi Jakob Hartmann Hansen saaffigineqarsinnaavoq +299 52 23 27.