2024 2023 2022 Flere år...
22-09-2010
Inatsisartut 2009-mut ukiumoortumik nalunaarutertik saqqummersippaat
Inatsisartut Allattoqarfiata Inatsisartut 2009-mut ukiumoortumik nalunaarutaat sapaatit akunnerat kingulleq saqqummersippaa.
Ukiumoortumik nalunaarut nutaarluinnarmik ilusilersorneqarsimavoq kapitaliisalu inatsisartut nittartagaata inatsisartut.gl-ip aaqqissuussaanera malillugu. Taamaalilluni paasissutissat qalipaatilersuinikkut takulertorneqarsinnaasumik erseqqissumillu immikkoortiterneqarsimapput, Inatsisartut pillugit paasissutissat aappaluttumik, ataatsimiittarnerit pillugit paasissutissat qasertumik, ataatsimiititaliat pillugit paasissutissat tungujortumik taartumik kiisalu Inatsisartut Allattoqarfiat pillugu paasissutissat tungujortumik qaamasumik ilisarnaaserneqarsimapput.
Suliniutit tamakku Inatsisartuni sulinerup sapinngisamik takulertoruminarnerulerneranut paasiniumarnerulerneranullu peqataaniartussaapput. Taamaalilluni ukiumoortumik nalunaarutip siunertaraa Inatsisartuni sulineq pillugu nalinginnaasumik paasissutissiinissaq Inatsisartut nittartagaanni paasissutissanut sukumiinerusunut innersuussisarluni.
Ukioq 2009 assigiinngitsunik immikkut pisoqarfiusoq. Namminersornerup eqqunneqarnerata saniatigut Inatsisartunut qinersisoqarpoq, inuusuttut inatsisartuinik taallugu aaqqissuussisoqarluni taamatullu aamma siulittaasuusimasunik qalipakkat nutaat uleerneqarlutik. Ukiumoortumik nalunaarummi taamatuttaaq allattoqarfiup nutaamik aaqqissuussaanera, ataatsimiititaliani sulineq aamma nunat tamalaat akornanni inatsisartutigoortumik suleqatigiinneq nassuiaateqarfigineqarput.
2009-mut ukiumoortumik nalunaarut nunarput tamakkerlugu atuarfinnut, atuakkanik atorniartarfinnut kommuninullu nassiussuunneqarsimavoq aammalu uani aaneqarsinnaalluni inatsisartut.gl/saqqummersitat imaluunniit Inatsisartut Allattoqarfiannut inatsisartut@inatsisartut.gl-imut allallutik imaluunniit 34 50 00-mut sianerlutik pissarsiariniarsinnaallugu.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.