2024 2023 2022 Flere år...
06-10-2010
Nunat Avannarliit Siunnersuisoqatigiiffiat 2011-mut Pinngortitamut Avatangiisinullu tunngatillugu nersornaasigassanik inassuteqaqqusivoq
Nunat Avannarliit Siunnersuisoqatigiiffiata Pinngortitamut Avatangiisinullu tunngatillugu nersornaasiuttakkani, danskit koruuninngorlugit 350.000-inik aningaasartalik, aappaagu 17-issaa tunniutissavaa. Nunat Avannarliit Siunnersuisoqatigiiffiata Pinngortitamut Avatangiisinullu tunngatillugu nersornaasiuttagaa 2011-mi piujuaannartitsinermik tunngavilimmik takornariartitsisarnermik ingerlataqartunut sammitinneqarpoq.
Nersornaasiuttagaq 2011-mi tunniunneqassaaq suliffeqarfimmut, suliniaqatigiiffimmut, tusagassiorfimmut inummulluunniit Nunani avannarlerni angalaniarnerup avatangiisinut innarliinnginnerusumik ingerlanneqartalernissaanut maligassiuisumik tunniusimallutillu sulissuteqarsimasunut.
Nersornaaserneqartussaq eqqortoq nassaariniarlugu maanna Nunat Avannarliit Siunnersuisoqatigiiffiat, pineqartumi tusagassiuineq, oqalugiartarnerit, atuakkiat assigisaalluunniiit aqqutigalugit atuisartuni pisisartunilu ilisimasaqarnerulernissamik sulissuteqarsimasunik, inassuteqaatigineqarsinnaasunik ujarlerluni aallartippoq. Kikkut tamarmik nersornaasigassanik inassuteqarsinnaapput.
Nersornaaserneqartussaq naliliisartutut ataatsimiititaliamit nunani avannarlerni nunanit tallimanit namminersorfiusunillu Savalimmiunit, Kalaallit Nunaannit Ålandimiillu sinniisuutitaqarfigineqartumit toqqarneqassaaq.
Malugeqquneqassaaq inassuteqaatit immersuivissami immikkut ittumi allanneqassammata, taakkulu allattoqarfiup tigoreersimassammagit tallimanngornermi ulloq 10. december 2010 nal. 12.00.
Nunat Avannarliit Siunnersuisoqatigiiffiata 2010-mut Pinngortitamut Avatangiisinullu tunngatillugu nersornaasiutassaa pillugu paasissutissat sukumiinerusut piumasaqaatillu nittartakkami www.norden.org-imi pissarsiarineqarsinnaapput.
Paasissutissat sukumiinerusut Jakob Hartmann 34 61 15 attaveqarfigalugu pissarsiarineqarsinnaapput.