2024 2023 2022 Flere år...
12-10-2010
Inatsisartut Siulittaasoqarfiat pillugu AG-p ulloq 6. oktober 2010 allaaserisaanut naqqiut
All.: Inatsisartut Siulittaasuat Josef Motzfeldt
Suliffeqarfik Inatsisartut AG-p paasinninnerata akerlianik naalakkersuinikkut suliniaqatigiiffiit ataasiakkaat periusiinit isummersortarnerinilluunniiit aqunneqanngilaq. Inatsisartut - malugalugu taaguut qasseersiutaammat - oqartussaapput naalakkersuinikkut aqunneqartut, tunngaviusumillu naalakkersuinikkut suliniaqatigiiffimmit ataasiinnarmit tuusintinilluunniit sinniisuutitaqarfigineqarsinnaasut.
Taamaattumik qularutigineqartussaanngilaq Inatsisartut siulittaasoqarfianni aalajangernerit pisarmata Inatsisartut ataatsimut soqutigisaat isiginiarlugit, naalakkersuinikkut suliniaqatigiiffiit angissusii immikkulluunniit soqutigisat tunngaviginagit.
Siulittaasoqarfiup suliassaraa Inatsisartuni sulinermi immikkoortuni tamani killiliussanik aalajangersaasassalluni. Taamaaliortoqanngippammi siusinnerusukkut "suliassap" pisumiit pisumut isummerfigineqartarnera uterfigineqaannassaaq, taamalu nalaatsornerinnarmik aalajangiisarneq atuutsinneqassallun, aamma suliassani assigiinngitsuni assigiimmik aalajangiiffigineqartariaqaraluartuni. Siulittaasoqarfik taamaattumik allanit qulangersimaneqarnani sulivoq naalakkersuinikkut suliniaqatigiiffiit immikkut soqutisaannik qulangersimaneqanngilluinnartumik. Suleriaatsilli tamatuma aamma ilikkarluarnissaanut piffissaq atorneqartariaqarpoq.
AG ulloq 5. oktober pingaarnerutitamini siulittaasoqarfiup aalajangertarnerinut tunuliaqutaasinnaasunik "eqqoriaasaqattaarpoq". Pissuserissaarnerusimassagaluarporlu pissutsit ataqatigiinnerat siumut misissoqqaarlugu aviisi pingaarnerutitamini eqqoriaasaqattaarsimanngitsuuppat imaluunniit taamaassorinninnerminik saqqummiussaqarsimanngitsuuppat. Soorlu aamma AG-p tunngavissaqanngitsumik akikinaaralunilu Naalakkersuisuni naalakkersuinikkullu suliniaqatigiiffimmi naalakkersuisuutitaqartumi isuma siulittasoqarfiup aalajangernerinut akuleruteriaraluaraa.
Siulittaasoqarfik tunngavissat illuinnaasiunngitsut inatsisiliornerillu atuuttut tunngavigalugit aalajangiisarpoq, ilaatigullu aalajangiisoqarsinnaasarpoq aalajangiinermi pineqartumit iluarineqanngitsumik. Kisiannili tamanna tunngavissiinngilaq tusagassiorfiit suliassamik mumisitsilluinnarlutik saqqummiussisarnissaannut, naak aamma tusagassiorfiit pisinnaatitaallutillu misigisimasartut nammineq piumasartik tunngavigalugu isornartorsiunissaminnut.
Aviisi ataasiarani siulittaasoqarfimmi aalajangikkanik isornartorsiuinissaminut pissutissaqartitsigaangat, pisuni ataasiakkaani isumaliutigineqartariaqartarpoq siulittaasoqarfik qisuariaateqassanersoq tunngavissaqanngitsumik isornartorsiorneqarneq illuatungilerniarlugu. Kisiannili aviisi illuinnaasiortunik saqqummiussaqaraangat tamannalu tusagassiorfiit allat tamuaqqaanngiivillugu taamaatiinnarlugu ingerlateqqippassuk, taava aallaavittut ileqqussat pitsaasut malinneqarnissaat eqqaasitsissutigineqartariaqarpoq.
Matumanilu siulittaasoqarfimmik tamarmiusumik taakkulu aalajangertagaannik isornartorsiuinerummat pisariaqarnerulerpoq pissutsit aviisip nammineq saqqummiukkumanngisaasa eqqortumik ataqatigiinnerisa nassuiaateqarfiginissaannut piffissamik atuinissamut.
Siulittaasoqarfik malittarisassanik ingasattajaarluni malitsitsiniartutut pisuutissallugu kukkuneruallaanngikkaluarpoq, kisiannili siutinngunarsisarpoq tamanna aalajangernissamut tunngavissatut kissaatigineqanngitsutut suaarutigineqaraangat. Inatsisartut sulinerat inatsisinik, malittarisassanik ileqquliussanillu tunngaveqarpoq, taakkulu atapput malinneqartussaagamik, taamaaliortoqanngippammi taakkuninnga malitsitsiniaaneq isumaarutissammat.
Siulittaasoqarfiup aalajangerneri taamaattussaanertik pissutigalugu kikkut tamat akornanni oqallisissiarineqarneq ajorput, taamaattumillu Siulittaasoqarfimmi amerlanerussuteqartut ikinnerussuteqartulluunniiit aalajangerneri eqqartussallugit isumaqanngilaq. Inatsisartuni siulittaasoqarfiup naalakkersuinikkullu suliniaqatigiiffiit akornanni suleriaaseqareerpoq apeqqutit tunngaviusut oqallisigineqarfissaminni eqqortuni oqallisigineqartarnissaannik qularnaariniartussanik.
Suliassaq AG-p allaaserisaani sammineqartoq, ajoraluartumillu suliassami susassaqartut arlaannaata taamaallaat oqaaserisaanik tunngaveqartoq, pissutissaqavilluta oqaaseqarfigisinnaanngilarput. Naalagaaffiit Peqatigiit ataatsimeersuarnerannut peqataasussatut toqqagaanerit qinikkatut pisussaaffiupput akueriumannginneqarsinnaanngitsut. Oqaatigineqarsinnaavorli AG-p misissorsimagunanngimmagu tamatuma sanioqqunneqarnissaanut pissutissaqarsimanersoq.
Inatsisartut taamatullu aamma Kalaallit Nunaat Naalagaaffiit Peqatigiit ataatsimeersuarnissaanut sinniisuutitassaminnik TOQQAAREERPUT, Kalaallit Nunaat isumaqarmat suliamut tamatumunnga peqataaneq pingaaruteqartoq. Taamaattumik tupaallaannarpoq aviisi
Qularnartumik tunngavilersukkamik siulittaasoqarfiup iliuuserisimasaa pillugu isornartorsiuinermik taama qussalaatsigisumik saqqummiussaqarsinnaammat.
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.