2024 2023 2022 Flere år...
20-10-2010
Ilinniartitaanermut tunngasuni sipaarutissat ilinniartunit akilerneqassanngillat
2011-mi aningaasanut inatsisissatut siunnersuummi ataatsimiititaliap suliassaqarfiata iluani sipaarutissatut Naalakkersuisunit nalunaarutigineqartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap ataatsimiinnermini arlalinni oqaluuserai.
Ungasinngitsukkut tusagassiorfinnut nalunaaruteqarlutik Naalakkersuisut nalunaarutigaat aatsaat taama amerlatigisut ilinniagaqalersimasut. Tusagassiorfinnut nalunaarummi tassani 2005-ip kingorna ilinniagaqalersut 34 %-imik amerleriarsimasut, taamaalillutalu kingusinnerpaamik 2020-mi sulisinnaasut 2/3-iisa piginnaassusiliisumik ilinniagaqarsimanissaannik anguniagaq angujartuaaripput Naalakkersuisut ilanngullugu paasissutissiissutigaat.
Sipaarutissat innuttaasut ilinniarnissamut periarfissaannik killiliisinnaasut pissutigalugit pitsaasumik ingerlalerneq unikaallatsinneqassanngitsoq ataatsimiititaliap kissaatigaa. Amerlanerusut ilinniakkamik naammassinnittarnissaat pisariaqartikkipput ataatsimiititaliap erseqqissarumavaa. Misissuinerit ilisimatuullu tamarmik oqaatigaat ilinniagaqarneq aningaasaqarnikkut imminut napatilernissamut aqqutaasoq.
Sullississutit ilinniartunut sammitinneqartut pingaarnerit, soorlu akunnerit ilinniartitsiffiusut allanngoratik taamaaginnarnissaat aammalu ilinniartunik pitsaasumik siunnersuineq, minnerpaamik attatiinnarneqartariaqarput. Taamaattumik suliassaqarfimmi tassani sipaarutissat allaffissornikkut ingerlatsinerup killilersimaarneratigut, ataatsimoortitsinermi iluaqutissarsissutissatut neriorsuutigineqartut piviusunngortinnerisigut aammalu kultureqarnermut ilinniartitaanermullu suliassaqarfiup iluani pisariillisaanissap salliutinneratigut - kiisalu minnerunngitsumik suliassaqarfiup tamarmiusup iluani sullississutit pingaarnersiuiffiginerisigut ingerlanneqartariaqarput.
Taamaattumik suliassaqarfiup iluani allanik sipaaruteqarniaqqullugit Naalakkersuisut ataatsimiititaliamit kaammattorneqarput.
Paasissutissat annertunerusut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap siulittaasuanut Harald Biancomut tlf. +299 59 87 54-mut saaffiginninnikkut pissarsiarineqarsinnaapput.