2024 2023 2022 Flere år...
02-11-2010
Novembarip ulluisa aappaanniit sisamaannut Reykjavikimi Nunat Avannarliit Siunnersuisoqatigiiffiata ataatsimeersuarneranut atatillugu qinikkat ingerlataat
Debora Kleist Kim Kielsenilu Nunat Avannarliit Siunnersuisoqatigiiffiata Reykjavikimi ataatsimeersuarnerani Inatsisartut sinniisaattut peqataapput Islandimit, Danmarkimit, Sverigemit, Norgemit, Finlandimit, Ålandimit, Savalimmiunit nunatsinnillu naalakkersuinermik suliallit allat peqatigalugit.
Ataatsimeersuarnerup ammarneqarnera ukioq manna immikkut tussunngunarpoq tassami Jonathan Motzfeldt minutsimi ataatsimi nipangersimalluni eqqaaniarneqarmat, tamatumalu kingorna oqaatigineqarluni anersaava nunat avannarliit suleqatigiinnera qimagunnavianngitsoq.
Avatangiisinut Pinngortitamilu pisuussutinut ataatsimiititaliami Kim Kielsen immikkut peqataasimavoq nunani avannarlerni silap pissusii nukissiuuteqarnerlu pillugit suleqatigiinnerup minnerunngitsumillu Issittumi imaatigut angallannermi isumannaallisaanerup sammineqarnerulernissaannut. Tamatumunnga atatillugu Kim Kielsen isumaqarpoq nunat avannarliit suleqatigiinnerat Kalaallit Nunaata periarfissaasa ilagigaat issittumi angallannerup malittarisassiorneqarnissaanik oqariartuuteqarnermini, naatsorsuutigineqarmammi ilaatigut uuliasiornermut aatsitassarsiornermullu, takornariaqarnermut niuernermullu atatillugu ingerlatat pissutigalugit angallannerup annertuumik annertunerulernissaa. Silap pissusiisa allanngornerisigut issittumi aqqutit siusinnersukkut matoqqasaraluartut ammariartorput, tamatumunngalu atatillugu, Kim Kielsen malillugu, peqatigitillugu pisariaqarpoq umiarsuit atorlugit angallannerup malittarisassiuunneqarnissaa, imaatigut angallannermi isumannaallisaaneq pingaartinneqarnissaata saniatigut, taamaaliornikkut issittumi avatangiisit illersorniarlugit isumannaallisaanerlu qularnaarniarlugit. Kim Kielsen ataatsimeersuarnermi Avatangiisinut Pinngortitamilu pisuussutinut ataatsimiititaliaq oqaaseqartartoraa issittumut tunngasunut nassuiaat eqqarsaatigalugu.
Atugarissaarnermut ataatsimiititaliami Debora Kleistip ilaasortaaffigisaani 2010-mi qulequtaq "Nunani Avannarlerni utoqqaat inuunerinnerat" immikkut sammineqarsimavoq, taannalu qulequtaralugu ataatsimiititaliaq ataatsimeersuarnermut siunnersuuteqarluni. Atugarissaarnermut ataatsimiititaliap ataatsimeersuarnermi ataatsimiinnerminni 2011-mi ataatsimiititaliap sulinissaanut qulequtassaq aamma toqqarpaat. 2011-mi sammineqartussaq tassaassaaq Nunani Avannarlerni nalinginnaasumik isumaginninnermik siunertanut inissialiortiterneq, tassunga ilanngullugu taakku atugarliortunut katersuuffinngortinnginnissaannut ilioriusissat. Qulequttanut sammineqartussanut aamma ilaassapput Nunani Avannarlerni ilaqutariit meerartallit pigissaanngitsut atugaat, taamaalilluni sammineqartussat Debora Kleist malillugu aamma nunatsinni naalakkersuinikkut oqallinnermut attuumassuteqarlutillu soqutiginartorujussuullutik. Debora Kleistip, Nunat Avannarliit Siunnersuisoqatigiiffiannut nutaatut qinigaasup, inuttut atugarisanut peqqissutsimullu tunngasut sammisarnissaat qilanaaraa, taakkorpiaammi aamma Inatsisartut ataatsimiititaliaani aamma suliassaqarfigigamigit. Nunat avannarliit suleqatigiinneranni Inatsisartunilu sulinermi naalakkersuinikkut ingerlatsinerit sunniuteqaqatigiissinnaanerat isumasiorfiusinnaanerallu pingaarutilerujussuusoq Debora Kleist naliliivoq.
Parteeqatigiikkuutaarluni ataatsimiititalianilu ataatsimiittarnerit aaqqissuussinerillu allat saniatigut Kim Kielsen aamma Debora Kleist aamma peqataapput nunani namminersorfiusuni Kalaallit Nunaanni, Ålandimi Savalimmiunilu naalakkersuinermik suliallit akornanni ataatsimeeqatigiinnermi. Ataatsimeeqatigiinnermi tassani siunertarineqarpoq nunat avannarliit suleqatigiinneranni ataatsimoorluni naalakkersuinikkut anguniagassat suliniutillu pillugit suleqatigiinnerminnik nunat taakku nukittorsarsinnaanerminnut qanoq periarfissaqarnerisa paasiniarneqarnissaa. Suleqatigiinnerup tamatuma suleqatigiinnissamut isumaqatigiissummik atsiukkamik naqissuserneqarnissaa siunertarineqarpoq.
Nunat Avannarliit Siunnersuisoqatigiiffiata ataani nalinginnaasumik ataatsimiinnissat Kim Kielsenip Debora Kleistillu peqataaffigisassaat Finlandimi 2011-mi januaarip naalernerani ingerlanneqassapput.
Paasissutissat sukumiinerusut Inatsisartut peqataatitaannut saaffiginnilluni pissarsiarineqarsinnaapput:
Debora Kleist, oqarasuaat +299 49 03 90 aamma Kim Kielsen, oqarasuaat +299 54 86 92.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit namminersorfiusunillu Ålandimit, Savalimmiunit Kalaallit Nunaanniillu 87-inik ilaasortalik. Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnik sinniisussalinnik. Inatsisartunut ilaasortat Debora Kleist, Inuit Ataqatigiit aamma Kim Kielsen, Siumut Nunat Avannarliit Siunnersuisoqatigiiffiannut ilaasortaapput sinniisussaralugit Inatsisartunut ilaasortaq Hans Aronsen, Inuit Ataqatigiit aamma Inatsisartunut ilaasortaq Akitsinnguaq Olsen, Siumut. Debora Kleist Atugarissaarnermut ataatsimiititaliamut ilaasortaavoq Kim Kielsen Avatangiisinut Pinngortitamilu pisuussutinut ataatsimiititaliamut ilaasortaalluni.