2024 2023 2022 Flere år...
03-11-2010
Hoyvikimi isumaqatigiissummik malinnaanissami nunarput alaatsinaatsitaqassaaq
Inatsisartut Siulittaasuat Nunat Avannarliit Siunnersuisoqatigiiffiata 62-issaanik ataatsimeersuarnera iluatsillugu Nunat Avannarliit Killiit Siunnersuisoqatigiiffiata ukiumi aggersumi sulinissaa sukumiinerusumik pilersaarusiorniarlugu Nunat Avannarliit Killiit Siunnersuisoqatigiiffiata siulittaasoqarfianik ataatsimeeqateqartarpoq.
Ukiumoortumik ataatsimiinnissaq aalajangersimasumillu qulequtaqarluni ataatsimeersuarneq
Nunat Avannarliit Killiit Siunnersuisoqatigiiffiata siulittaasoqarfiata aappaagu aalajangersimasumik qulequtaqarluni ataatsimeersuarnissaq ukiumoortumillu ataatsimiinnissaq ullulerpaat. Aalajangersimasumik qulequtaqarluni ataatsimeersuarneq Savalimmiuni piffissami 6. 11. juni 2011 ingerlanneqassaaq ukiumoortumillu ataatsimiinneq Islandimi piffissami 19 - 25. august ingerlanneqassalluni. 2011-mi aalajangersimasumik qulequtaqarluni ataatsimeersuarnermi qulequtaritinneqassaaq "Utoqqarnut inissiat eqqarsaatigalugit siunissami nunani avannarlerni killerni aaqqiissutaasinnaasut".
Hoyvikimi isumaqatigiissummut nunat avannarliit killiit ataatsimiititaliaannut alaatsinaatsutut inissisimaneq
Nunat Avannarliit Killiit Siunnersuisoqatigiiffiata siulittaasoqarfiata aalajangersarpaattaaq nunat avannarliit ataatsimeersuarnerata aallartinngilaarnerani Islandimit Savalimmiunillu inuttalimmik ataatsimiititaliamik pilersitsisoqarnera, Islandip Savalimmiullu akornanni Hoyvikimi isumaqatigiissummut atatillugu isumaqatigiissutip atorneqarneranik ineriartorneranillu malinnaasussamik. Kalaallit Nunaannit aallartitat kissaateqarneratigut taakku ataatsimiititaliami alaatsinaatsutut peqataassapput.
EU Nunallu Avannarliit Killiit
Nunat Avannarliit Killiit Siunnersuisoqatigiiffiat aamma Europa-Parlamentimut ilaasortanik aalajangersimasumik suleqateqarnermik aallartitsisimavoq. Maanna aalajangersarneqarpoq Nunat Avannarliit Killiit Siunnersuisoqatigiiffiata Siulittaasoqarfia Europa-Parlamentimullu ilaasortat 2011-mi maajimi Ilulissani naapeqatigiissasut.
Nunani avannarlerni ministerinik ataatsimeeqateqarneq
Pisarnertut Nunat Avannarliit Killiit Siunnersuisoqatigiiffiata Siulittaasoqarfiata nunat avannarliit ataatsimeersuarnerat atorpaa nunani avannarlerni ministerinik susassaqartunik ataatsimeeqateqartarnermut. Taamaalilluni siulittaasoqarfik nunani avannarlerni suleqatigiinnissamut ministerinik, isumaginninnermut ministerinik, kulturimut ministerinik ilinniartitaanermullu ministerinik ataatsimeeqateqartarsimavoq. Ministerinik ataatsimeeqateqartarnerni Nunat Avannarliit Killiit Siunnersuisoqatigiiffiata siulittaasoqarfiata siunnersuisoqatigiiffimmit kaammattuutitut aalajangersakkat nutaat pisoqqallu ministerinut susassaqartunut saqqummiuttarpaat, soorlu aamma ministerit pineqartut aalajangersakkat malillugit suliassaannik naammassinneqqusilluni kaammattuuteqarnissamut periarfissaqartartoq.
Nunat Avannarliit Killiit Siunnersuisoqatigiiffiata Siulittaasoqarfiata Nunat Avannarliit Siunnersuisoqatigiiffiata Siulittaasoqarfianik ataatsimeeqateqarnera
Nunat Avannarliit Killiit Siunnersuisoqatigiiffiata Siulittaasoqarfiata taamatuttaaq Nunat Avannarliit Siunnersuisoqatigiiffiata Siulittaasoqarfiata ataatsimeersuarnerup aallartinnissaa aqaguttoq ataatsimeeqatigaat, ataatsimut soqutigisat oqallisigineqarlutik.
Suliassaqarfittut suli angusaqarfiusimanngitsutut maannamullu arlaleriaqaluni uteqqinneqartarsimasutut assersuutitut taaneqarsinnaavoq Nunat Avannarliit Killiit Siunnersuisoqatigiiffiata noqqaassutaa sumiiffiit namminersorfiusut sumiiffittut taaneqartarunnaarlutik nunatut taaneqartalernissaannik. Suliassaq tamanna suli nunat avannarliit suleqatigiinneranni kivissallugu oqimaatsutut misigineqarpoq naak aamma Kalaallit Nunaata namminersortutut inissisimalernera aamma nunanit avannarlernit soqutigineqartorujussuugaluaq.
Ataatsimeeqatigiinnermi taamatuttaaq Nunat Avannarliit Siunnersuisoqatigiiffiata Siulittaasoqarfiat qinnuigineqarpoq Atlantikup avannarpasissortaani imaatigut angallannermi isumannaallisaaneq aamma annaassiniartarnermut upalungaarsimanissamullu apeqqutit pillugit nalunaarusiortussanik suleqatigiissitanik marlunnik pilersitsinissamik 2008-mi Ministerrådimut kaammattuuteqarneq tunngavigalugu nalunaarusiap naammassineqarsimannginnerani misissuataaqqullugu.
Nunat Avannarliit Siunnersuisoqatigiiffianut Islandip siulittaasorititaata Helgi Hjörvarip Nunat Avannarliit Killiit Siunnersuisoqatigiiffiannik ataatsimeeqateqarneq iluatsillugu Nuummi Inuit Issittormiut Siunnersuisoqatigiiffiata ICC-p ataatsimeersuarnera peqataaffigisinnaasimasani nersualaarpaa. Ilaatigut oqaatigivaa maluginiarsimallugu Kalaallit Nunaat naggueqatigiit Inuit sinnerinut maligassatut inissisimasoq, tamannalu aamma ersersippaa Nunat Avannarliit 62-issaanik ataatsimeersuarnerat ammarlugu oqaaseqarnermini:
"Ataqqinartut ministerit, ataqqinartut inatsisartunut ilaasortat ataqqinartullu qaaqqusat, naatsumik oqaatigalugu: Asasat nunani avannarlerni ikinngutit. Kalaallit Nunaata namminersulernera piffissami qaangiuttumi Nunallu avannarliit siunnersuisoqatigiiffiata oqaluttuarisaanerani pisut pingaarnerpaat ilagivaat. Nunallu Avannarliit Siunnersuisoqatigiiffiata siulittaasuatut tulluusimaaqalunga aasaq manna inuit issittormiut ataatsimeersuarneranni alaatsinaatsutut peqataavunga takullugulu Kalaallit Nunaat issittumi naggueqatigiit inuit sinnerinit maligassatut isigineqartoq ilaatigut namminneq oqaatsitik atorlugit inatsisiliaminnik akuersissuteqarsinnaalersimanermikkut."
Helgi Hjörval ingerlaqqippoq:
"Ataatsimeersuarnermulli matumunnga atatillugu aamma Kalaallit Nunaanniit nuannerpallaanngitsumik nutaarsiassaateqarpugut: Jonathan Motzfeldt toqukkut qimaguppoq. Ukiorpassuarni ataatsimeersuartarnitsinni nunani avannarlermiusut uummateqarluni peqataalluartarsimasoq aamma Nunat Avannarliit Killiit Siunnersuisoqatigiiffiannik pilersitseqataasut ilaat, Jonathan Motzfeldt, toqukkut qimaguppoq, anersaavali ingerlaqqissalluni Kalaallit Nunaata nammineernernerulernissaanik naalakkersuinikkut suliaqarsimanini pissutigalugu, taamatullu aamma Kalaallit Nunaata naggueqatigiinnit inunnit allanit maligassatut isigineqalersimanera pissutigalugu. Nunanit avannarlernit arfineq-pingasuusunit tamanit aallartitat tamaasa qinnuigaakka nikueqqullugit minutsimilu ataatsimi nipangersimaqqullugit qimaguttoq eqqaaniarlugu."
Islandip Præsidentiani nereqatigiinneq
Inatsisartut Siulittaasuat taamatuttaaq ataatsimeersuarnerup aallartinngilaarnerani Islandip Præsidentiani nereqatigiinnermut qaaqqusanut ilaavoq. Tamatumani Jonathan Motzfeldtip toqukkut qimagunneranut atatillugu Kalaallit Nunaannik misiginneqataanini præsidentip ersersippaa oqaatigalugulu angallannikkut periarfissat ajornartissanngippassuk ilisaaneranut peqataasinnaalluni.
Inatsisartut Siulittaasuat
Formand for Inatsisartut
Paasissutissat sukumiinerusut Inatsisartut Siulittaasuat Josef Motzfeldt angallattagaq +299 55 76 41 attaveqarfigalugu pissarsiarineqarsinnaapput.