2024 2023 2022 Flere år...
05-11-2010
Nunat Avannarliit Siunnersuisoqatigiiffiata Reykjavikimi ataatsimiinnerani avatangiisit pinngortitarlu pillugit politikki aamma isumaginninnermut politikki pillugu oqaluuserisanut Inatsisartunut ilaasortat immikkut suliniuteqarsimapput
Nunat Avannarliit Siunnersuisoqatigiiffiata ataatsimiinnerani sapaatip akunnerani matumani Reykjavikimi ingerlanneqartumi Avatangiisinut Pinngortitamilu Pisuussutinut Ataatsimiititaliap ilaatigut Kim Kielsen ilaasortatut peqataasoralugu 2. november 2010-mi ataatsimiinnermi nunat avannarliit avatangiisinut ministerii katersortissimavaat. Uumassusillit ikiliartornerat unikaallatsinniarlugu suliniuteqarnerup siuariartortinneqarnissaata oqaluuserineqarnissaa aammattaaq akuutissat ulorianaatillit pillugit nunat avannarliit suleqatigiinnerisa oqaluuserineqarnissaat ataatsimiinnermi siunertaavoq.
Kalaallit Nunaanni ullumikkut pissutsit piviusut inuuniarnermilu atugassarititaasut avatangiisinut politikerit peqataasut immikkut erseqqissaassuteqarfigalugit Kim Kielsenip ataatsimiinneq atorpaa. Pinngortitaq angisooq tupinnartorlu kusanarsinnaallunilu tunniussaqarsinnaasoq aammali siumut oqaatigineqarsinnaanngitsunik pissuseqartartoq Kalaallit Nunaanni innuttaasut inooqataaffigisaanni inuuniarnikkut atugassarititaasut matumani pineqarput. Pinngortitaq pinngortitallu nukii unissarneqarsinnaanngillat, pisuussutilli uumassusillit nungusaataanngitsumik uumassusillillu assigiiaanngissusiat innarlitsaaliuutigalugu inuiaqatigiit kalaallit Kalaallillu Nunaanni innuttaasut atorluarniartuassavaat illersortuassallugillu. Pinngortitaq pillugu nunat tamat isumaqatigiissutaat pissutsit piviusut atuuffianni isumatusaartumik paasisimaarinnittumillu ingerlaqatigiissittuarnissaat Kim Kielsenip pingaartippaa.
Aammattaaq nunat issittumiittut innuttaasalu sammineqarnissaat taamaalillunilu nunat avannarliit nunarsuarmioqatigiillu suleqatigiinneranni issittormiut ikinnerussutillit mianerineqarnissaat finlandimiut 2011-mi siulittaasuutitaqarnissaanni aalajangiusimaneqaannassasoq ulloq 4. november 2010-mi nalunaaquttap akunnerani apeqquteqartarfimmi Kim Kielsenip uppernarsivaa.
Debora Kleistip Inatsisartut Peqqinnissamut Ataatsimiititaliaanut ilaasortap Reykjavikimiinnini iluatsillugu Islandimi nuna tamakkerlugu napparsimmavik nunatta peqqinnissaqarfianik suleqateqartoq pulaarpaa. Pulaarnermini naalungiarsunnut immikkoortortaqarfik aamma arnanut immikkoortortaqarfik iviangitigut ilukkullu kræftimik immikkut paasisimasaqarfiusoq takuniarpai. Pulaarneq Debora Kleistip isumassarsiffiulluartutut isigaa ilaatigut umiarsuit sinersortinnerisigut ivianginik misissuisinnaaneq misissuiitigalunilu pinaveersaartitsisinnaaneq ingerlanneqarsinnaasoq malugaa.
Aammattaaq Nunani Avannarliit Innarluutillinnut Politikkimut Siunnersuisooqatigiit sammisassatut saqqummiussaat Atugarissaarnermut ataatsimiititaliaq peqatigalugu Debora Kleistip ulloq 3. november 2010-mi peqataaffigaa. Ataatsimiinnermi tassani Naalagaaffiit Peqatigiit innarluutilllit pillugit nunat tamat isumaqatigiissutaat nunani avannarlerni tamani atuutilersinneqartariaqarnera Debora Kleistip immikkut maluginiarpaa. Innarluutillit atuartitaanissaannut ilinniartitaanissannullu periarfissat Innarluutillit pillugit nunat tamat isumaqatigiissutaat aqqutigalugu ilaatigut qulakkeerneqarsinnaapput. Aammattaaq innarluutillit suliffissanut sapinngisamik ilaatinneqalernissaata pingaaruteqassusianik Nunat Avannarliit Innarluutilinnut Politikkiannut Siunnersuisooqatigiit erseqqissaanerat Debora Kleistip nuannaarutigaa.
Paasissutissat sukumiinerusut Inatsisartut peqataatitaannut saaffiginnilluni pissarsiarineqarsinnaapput:
Debora Kleist, oqarasuaat +299 49 03 90 aamma Kim Kielsen, oqarasuaat +299 54 86 92.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit namminersorfiusunillu Ålandimit, Savalimmiunit Kalaallit Nunaanniillu 87-inik ilaasortalik. Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnik sinniisussalinnik. Inatsisartunut ilaasortat Debora Kleist, Inuit Ataqatigiit aamma Kim Kielsen, Siumut Nunat Avannarliit Siunnersuisoqatigiiffiannut ilaasortaapput sinniisussaralugit Inatsisartunut ilaasortaq Hans Aronsen, Inuit Ataqatigiit aamma Inatsisartunut ilaasortaq Akitsinnguaq Olsen, Siumut. Debora Kleist Atugarissaarnermut ataatsimiititaliamut ilaasortaavoq Kim Kielsen Avatangiisinut Pinngortitamilu pisuussutinut ataatsimiititaliamut ilaasortaalluni.