2024 2023 2022 Flere år...
18-12-2010
Laarseeraq Skiftemik sølviusumik Nersornaasiineq
Inatsisartut Siulittaasoqarfiup Laarseeraq Skifte sølviusumik Nersornaaserpaat piffissami sivisuumi annertuumillu timersorneq siuarsarniarlugu nersortarialimmik suliaqarsimanera pissutigalugu.
Inatsisartut Siulittaasuata tulliisa pingajuata Laarseeraq Skiftemik nersornaasiinermini ilaatigut makku erseqqissarpai: " Peqataaffigisimasatit amerlaqaat, taakkulu tamaasa matumani tamakkiisumik taakkartorsinnaanngilagut. Ataaserli avaqqussinnaanngilarput, tassalu timersorneq aqqutigalugu nunarput nunarsuarmioqatitsinnit ilisimaneqarneruleqqullugu suliniutigisarsimasatit.
Arctic Circle Race-ip, maani Sisimiuni ukiut tamaasa timersornikkut ingerlanneqartalersup nunarsuatsinnilu nunatta ilisimaneqarnerulerneranik malitseqarsimasup, piviusunngortinniarneqarnerani tunuliaqutaasut pingaarnerit ilagisimavaatsit. Arctic Circle Race ukioq manna 14-issaa ingerlanneqarpoq, illillu Arctic Circle Race-ip siulersuisuini ukiut qulit siulittaasuusimavutit.
Arctic Circle Race ujakkaarluni unammineq nunarsuatsinni taamatut unammisarnerit sakkortunersaattut kusanarnerpaanillu avatangiisilittut taaneqartartoq nunatsinni nunarsuattalu sinnerani nunarpassuarnit timersortartunik puigugassaanngitsunik misigisassaqartitsisarsimavoq, minnerunngitsumillu annerusumik illit pisuullutit immikkut kissalaartumik susassareqatigiiffiusumillu iluarusunnartarnini tusaamasaassutigalugu."
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuata tulliisa pingajuat Finn Karlsen angallattagaq 54 71 52 attaveqarfigalugu pissarsiarineqarsinnaapput.