2024 2023 2022 Flere år...
01-11-2011
Nunani Avannarlerni Ministerit Siunnersuisoqatigiiffiata taaguut "sumiiffiit namminersornerusut allanngortinnianngilaa"
Inatsisartut Siulittaasuat ulluni makkunani Nunat Avannarliit Siunnersuisoqatigiiffiata Københavnimi ataatsimeersuarnerani, Nunat Avannarliit Killiit Siunnersuisoqatigiiffiata NAKS-ip siulittaasoqarfiata Nunat Avannarliit Siunnersuisoqatigiiffiata siulittaasoqarfianik kiisalu nunani avannarlerni killerni ministerinik ilaatigut taakkunani suleqatigiinnissamut ministerinik ataatsimeeqateqartarluni qangali peqataaffigisartagaanni, peqataavoq.
NAKS-ip siulittaasoqarfiata taamatuttaaq ataatsimeersuarnerup nalaani ataatsimiittarpoq Nunat Avannarliit Killiit Siunnersuisoqatigiiffiata ukiumoortumik sulinissaanut pilersaarummut ataatsimiittarnissanullu killiliussat aalajangersarlugit. NAKS-ip siulittaasoqarfiata ataatsimiinnerani aalajangerneqarpoq aalajangersimasumik qulequteqartitsilluni ataatsimeersuarnissaq tulleq Ilulissani 2012-imi piffissami marsip ulluisa 26-ianniit 30-iannut ingerlanneqassasoq.
Aalajangersimasumik qulequtaqartitsilluni ataatsimeersuarnissami sammineqartussaq NAKS-ip aggustimi ukiumoortumik ataatsimiinnerani aalajangersarneqareerpoq: "Nunat tamalaat akornanni nunat avannarliit killiit inissisimanerat, immikkut pingaartillugu issittoq aamma nunani avannarlerni killerni inuussutissarsiutitigut pissutsit allangoriartornerat". Aalajangersimasumik qulequtaqartitsilluni ataatsimeersuartitsinermi sammisassap issittumut tunngasortaa immikkut pingartinneqarumaarpoq, issittup annertuumik soqutigineqaleriartornerata tamatumalu minnerunngitsumik nunanut avannarlernut killernut sunniutigisinnaasai qulaajarniarlugit.
NAKS-ip siulittaasoqarfiata taamatuttaaq aalajangerpaa tullianik ukiumoortumik ataatsimiinnissaq Savalimmiuni ingerlanneqassasoq, ukiumi suliffiusumi matumani savalimmiormiut siulittaasuutitaqarmata. Ukiumoortumik ataatsimiinneq piffissami septembarip ulluisa pingajuanniit qulingannut ingerlanneqassaaq.
NAKS-ip siulittaasoqarfiata ataatsimiinnerani taamatuttaaq paasinarsivoq Kalaallit Nunaata NAKS-imi siulittaasuutitaqarnerani 2009-imi Nunat Avannarliit Siunnersuisoqatigiiffiata siulittaasoqarfianut noqqaassutaa ima oqaasertalik: "Nunat Avannarliit Siunnersuisoqatigiiffiata kaammattuutigaa Nunat Avannarliit Siunnersuisoqatigiiffiata Nunanilu Avannarlerni Ministerit Siunnersuisoqatigiiffiata pisortatigoortumik allakkiaanni nittartagaannilu ilaasortanut taaguummut "nunat sumiiffiillu namminersorfiusut" taarsiullugu siunissami taaguut "naalagaaffiit nunallu", taamaassanngippallu "naalagaaffeqatigiit nunallu" imaluunniit "naalagaaffiit nunallu namminersortut", atorneqaleqqullugu. Taamatut kaammattuuteqartoqarpoq oqaatsip "nuna"-p atorneqarnera imatut paasineqaqqunagu, tamatumani Savalimmiut Kalaallillu Nunaat ilaatinneqanngitsut." - Nunat Avannarliit Siunnersuisoqatigiiffiannit naammassineqarsinnaanngitsoq.
Tamatumunngali taarsiullugu Nunat Avannarliit Siunnersuisoqatigiiffiata tamatumani nutaamik suleriaaseqalerniarpoq taamalu massakkumut taaguut atorneqartartoq "sumiiffiit namminersorfiusut" atorneqarunnaarluni siunissami Nunat Avannarliit Siunnersuisoqatigiiffiata saqqummersittagaani taaguut eqqortoq tassaalissalluni: "nunat tallimat aamma Åland, Savalimmiut Kalaallit Nunaallu".
NAKS-ip siulittaasoqarfiata akissut naammaginanngitsutut isigaa tassami Helsingforsimi isumaqatigiissutip oqaasertalerneqarnera aporfissaqartitsinngikkaluarmat taaguutit taakku kissaatigineqartutut iluarsinissaannut. Taamaattorli Nunat Avannarliit Siunnersuisoqatigiiffiata siulittaasoqarfianik ataatsimeeqateqarnermi siulittaasup Berthel Harderip oqaatigaa Nunat Avannarliit Siunnersuisoqatigiiffiani aatsaat kikkut tamarmik isumaqatigiikkaangata aalajangiisarneq ileqquusoq. Taamalu matumani taaguutit allanngortinneqarnissaannik noqqaassuteqarneq eqqarsaatigalugu tamanna ajornarsimammat taamatut aaqqiisoqarsimasoq. NAKS-ip siulittaasoqarfiata taaguutit "sumiiffiit nunallu" eqqortumik atorneqarnissaat pillugu nunat avannarliit isumaqatigiissuteqarsinnaasimannginnerat tupigusuutigikujuppaa, tassami aamma taaguutit taakku oqaasilerineq eqqarsaatigalugu atorneqannginnissaannut naalakkersuinikkut tunngavilersuutissaqanngimmat.
Inatsisartut Siulittaasuat Josef Motzfeldt taamatuttaaq Nunat Avannarliit Siunnersuisoqatigiiffiata ataatsimeersuarnerani peqataasunik Dronningip pisortatigoortumik nereqatigiissitsineranut kiisalu nunani avannarlerni allani inatsisartut siulittaasuisa nereqatigiinnertalimmik ataatsimiinnerannut peqataassaaq, taamatullu aamma nunat avannarliit killiit siunnersuisoqatigiiffiata kaammattuuttaasa nunani avannarlerni killerni inatsisartuni killiffii oqallisiginiarlugit NAKS-ip siulittaasoqarfiata nunanilu avannarlerni killerni ministerit akornanni ataatsimiittarnerni peqataassalluni.
Josef Motzfeldt
Inatsisartut Siulittaasuat
Paasissutissat sukumiinerusunut Inatsisartut Siulitaasuat oqarasuaat +45 24 42 34 06 attaveqarfigalugu pissarsiarineqarsinnaapput.