2024 2023 2022 Flere år...
04-11-2011
Inatsisartut Nunanut Allanut Sillimaniarnermullu Ataatsimiititaliaat paasinnillunilu tatiginnippoq
Nunanut Allanut Sillimaniarnermullu Ataatsimiititaliap ullumi ataatsimiinnermini isertortumik tigusanik angallassisarnernut nunatta silaannartaannik nunatsinnilu mittarfinnik nunat tamalaat isumaqatigiissutaat akimorlugit CIA-p atuisarsimaneranik misissuisitsinissaq Danmarkimik isumaqatigiissutigineqaqqammersoq oqallisigaa.
Ataatsimiititaliap Naalakkersuisut Siulittaasuat ataatsimeeqatiseriniarpaa isumaqatigiissutip imarisai tunuliaqutaalu pillugit sukumiinerusumik ilisimatinneqarsinnaaniassagami.
Ataatsimiititaliap takorusunnerusimagaluarpaa suliassami matumani nunatta Danmarkillu akornanni ataatsimiittarnerit arlaannaannulluunniit attuumassuteqanngitsumik misissuisitsinissamik isumaqatigiissuteqarsimanermik inerneqarsimasuuppata. Ataatsimiititalialli paasivaa isumaqatigiissutigineqarsimasoq pissutsit aallaavigalugit angusarineqarsinnaasimasut pitsaanersarigaat, ataatsimiititaliallu aappaagumut maajimut Nunat tamalaat akornanni pissutsinik danskit ilisimatusarfiata Dansk Institut for Internationale Studier inaarutaasumik misissuinerata inernerata takunissaa qilanaaraa.
Ataatsimiititaliap CIA-ip timmisartuussisarnissaanut danskit naalakkersuisui akuersissuteqartarsimanersut imaluunniit takunninngitsuusaaginnarsimanersut misissuinerup takutissinnaassagaa upperaa. Ataatsimiititaliap taamatuttaaq qularutiginngilaa pissutsit atuuttut aallaavigalugit misissuinerup pitsaanerpaajunissaa Naalakkersuisut siulittaasuata sulissutigiumaaraa.
Nunanut Allanut Sillimaniarnermullu Ataatsimiititaliaq tallimanik ilaasortaqarpoq, siulittaasoq Justus Hansen (Demokraatit), siulittaasup tullia Juliane Henningsen (Inuit Ataqatigiit), Jane Petersen (Inuit Ataqatigiit), Aleqa Hammond (Siumut) og Knud Kristiansen (Atassut).
Paasissutissat sukumiinerusut Nunanut Allanut Sillimaniarnermullu Ataatsimiititaliap siulittaasuata tullia Juliane Henningsen 48 81 48 attaveqarfigalugu pissarsiarineqarsinnaapput.