2024 2023 2022 Flere år...
07-11-2011
Københavnimi Nunat Avannarliit Siunnersuisoqatigiiffiata 63-issaanik ataatsimiinnerani Inatsisartut sinniisaat peqataapput
Andreas Uldum Akitsinnguaq Olsenilu Inatsisartut sinniisaattut Københavnimi Nunat Avannarliit Siunnersuisoqatigiiffiata 63-issaanik ataatsimiinneranni ullumi novembarip ulluisa aallaqqaataannit pingajuannut ingerlanneqartumi peqataapput.
Ataatsimiinneq marlunngornermi ulloq 1. november pisortatigoortumik ammarneqarpoq ulloq 22. juli 2011 Norgemi ajortuliornermit eqqugaasut eqqaaniarlugit minutti ataaseq nipaallisimasoqarneratigut. Aallartitalli sulinerat sapaammi ulloq 30. oktober 2011 aallartereerpoq ataatsimiinnermi Namminerlutik Oqartussat ataatsimut sulinissaat ataqatigiissaarniarlugu Naalakkersuisunut ilaasortanit atorfilittanillu peqataasunit peqataaffigineqartumi. Ataasinngornermi ulloq 31. oktober 2011 partiikkaarluni ataat-simiittoqarpoq ataatsimiinnissamut siunnersuutinut nassuiaatinullu partiit ataasiakkaat isumaat ataqatigiissaarniarlugit.
Ataatsimiinnermi Nunat Avannarliit Siunnersuisoqatigiiffiata suleriaasiata nutarterneqarnisaanik Siulittaasoqarfiup siunnersuutaa nunani avannarlerni qinikkanit akuersissutigineqarpoq. Suleriaatsit nutaat ilaatigut malitsigissavaat siunissami ukiumut marloriarluni ataatsimiittoqartalernissaa. Ataatsimut isigalugu Nunat Avannarliit Siunner-suisoqatigiiffiata nutarterneqarnerata Nunat Avannarliit Siunnersuisoqatigiiffianni naa-lakkersuinikkut aalajangiiniartarnerit nukittorsassavai taamatullu aamma naalakkersuinikkut sulinermi nalitsinni pisut aallaavigineqarnerulissallutik.
Kultureqarnermut Ilinniartitaanermullu Ataatsimiititaliaq Andreas Uldumip ilaasortaaffigisaa Nunat Avannarliit Siunnersuisoqatigiiffiannut ilaasortanit ilinniartitaanermut ministerinik isumasioqateqarput. Isumasioqatigiinnermi sammineqartut tassaapput Nordplus, Nunarsuarmioqataaleriartormut suliniut aamma ilisimatusarneq pillugu suleqatigiinneq. Suliniutit taakkua iluanni ingerlatat siunissamullu pilersaarutit pillugit ilinniartitaanermut ministerit ataat-simiititaliamut ilisimatitsissuteqarput. Illuatungeriinnit tamanit suliniutit pingasut taakku tamarmik iluatsilluarsimanerat ingerlaqqittariaarnerallu isumaqatigiissutigineqarpoq. Ataatsimiititaliaq ulloq taanna kingusinnerusukkut kultureqarnermut ministerinik isumasioqateqarmat meeqqanut inuusuttunullu atuakkiat saqqumilaartinneqarnerulernissaannik oqallisissisaq piffissaq annersaanik tigusivoq. Ministerit ataatsimiititaliamullu ilaasortat tamarmik isumaqatigiissutigaat meeqqat inuusuttullu akornanni kulturikkut ingerlatat maannakkornit annertunerungaartumik saqqumilaartinneqarnerulertariaqartut, kisianni qanoq ililluni meeqqanut inuusuttunullu atuakkiat saqqummilaartinniarlugit suut suliniutaasariaqarnersut isumaqatigiissutaanngilaq.
Akitsinnguaq Olsen ataatsimiinnermi Kim Kielsenimut sinniisussatut peqataasoq Nunat Avannarliit Siunnersuisoqatigiiffianni oqaaseqarsinnaatitaanini atorpaa silap pissusiisa allanngoriartornerinut naleqqussarnissap issittumi najugalinnut pingaruteqassusiata erseqqissarneqarneranut, tamatumani sikup aakkiartuinnarnera inunnut, kulturimut pinngortitamullu toqqaannartumik sunniuteqarmat. Akitsinnguaq Olsen aallartitat ataat-simiinneranni taaneqartumik partiikkaartumillu ataatsimiinnerit saniatigut aamma Avatangiisinut Pinngortitamilu Pisuussutinut Ataatsimiititaliap ataatsimiinnerani peqa-taavoq. Avatangiisinut Pinngortitamilu Pisuussutinut Ataatsimiititaliaq 2011-ip ingerlanerani Issittumi imaatigut angallannermi isumannaalisaanermut tunngasunik annertuunik suliaqarsimavoq, Akitsinnguaq Olsenimullu ilurisimaarnarsimavoq paasillugu Issittumi imartanik alapernaarsuinerup annertunerulersinneqarnissaanik ataatsimiititaliamit siunnersuut Nunat Avannarliit Siunnersuisoqatigiiffiata isumaqatigiilluni ilalermagu. Taamatuttaaq isumaqatigiissutigineqarpoq umiarsuarsuit takornarniartaatit marlukkaarlutik angalasalernissaannik piumasaqaatip timitalerneqarnissaa sulissutigineqassoq, taamaatilluni taakku siunissami ajutoortoqartillugu imminnut ikioqatigiissinnaanissaaniassammata taamalu aamma imaatigut angalannermi isumannaallisaaneq pitsaanerulersillugu.
Paasissutissat sukumiinerusut Andreas Uldum oqarasuaat 34 62 58 aamma Akitsinnguaq Olsen oqarasuaat 34 62 29 attaveqarfigalugit pissarsiarineqarsinnaapput.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit namminersorfiusunillu Ålandimit, Savalimmiunit Kalaallit Nunaanniillu 87-inik ilaasortalik.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnik sinniisussalinnik. Inatsisartunut ilaasortat Andreas Uldum, Demokraatit, Jane Petersen Inuit Ataqatigiit sinniisussaralugu, aamma Kim Kielsen, Siumut Akitsinnguaq Olsen sinniisussaaralugu Nunat Avannarliit Siunnersuisoqatigiiffiannut ilaasortaapput. Inatsisartut sinniisaat marluk Kultureqarnermut Ilinniartitaanermullu Ataatsimiititaliamut aappaalu Avatangiisinut Pinngortitamilu Pisuussutinut Ataatsimiititaliamut ilaasortaapput.