2024 2023 2022 Flere år...
10-02-2011
Nunat avannarliit suleqatigiinnerata Issittumilu Siunnersuisoqatigiit siunissaat
Inatsisartut Siulittaasuata Nunallu Avannarliit Killiit Siunnersuisoqatigiiffianni Kalaallit Nunaata aallartitaasa siulittaasuata Josef Motzfeldtip kimmut sanilerisanik annerusumik suleqateqalernissaq issittorlu immikkut pingaartillugit nunat avannarliit suleqatigiinnerat sammillugu Katuami nunat avannarliit isumasioqatigiinnerat ammarpaa.
Tamatumunnga atatillugu pissusissamisoortumik suleqatigiiffiit atuutereersut taakkulu qanoq nukittorsarneqarsinnaanerat ingerlaannaq tikinneqarpoq.
2011-mi maajimi Nuummi Issittumi Siunnersuisoqatigiit qanittukkut ataatsimiinnissaat taamaattumik aamma tamatumani pissusissamisoortumik sammineqarpoq.
Inatsisartut Siulittaasuat 2008-mili siunnersuuteqarpoq taamanikkut Ilulissani Issittumi Siunnersuisoqatigiit isumasioqatigiinnerannut atatillugu Issittumi Siunnersuisoqatigiit ataanni siunnersuisartussanik pilersitsinissamik. Taamaakkaluartorli 2008-mi Issittumi Siunnersuisoqatigiit isumasioqatigiinnerannit oqaaseqaammi atuarneqarsinnaavoq taamatut siunnersuisartussanik pilersitsinissaq pisariaqartutut isigineqarani, maannamutut nunat Issittup Imaanut sineriallit ilaatigut Issittumi Siunnersuisoqatigiit aqqutigalugit qaqugumulluunniit imminnik isumasiuisarsinnaanerat innersuussutigalugu. Matumani eqqaamaneqassaaq Issittumi Siunnersuisoqatigiit nunanit aalajangersimasumik ilaasortaasunit arfineq-pingaasuusunit immikkut aningaasalersugaanngimmata, taamatullu aamma 2006-imi norskit siulittaasuutitaqarmata Issittumi Siunnersuisoqatigiit aatsaat aalajangersimasumik allattoqarfeqalermata Tromsømi inissinneqartumik.
Taamaattumik Issittup Imaani pissutsinik alapernaarsuineq, upalungaarsimanissanut akisussaaneq kiisalu tamaani umiarsuit angallannerannik nakkutilliinermut akisussaaneq aningaasalersuisoqassanngippat isumaqanngillat, taamaalillunilu aamma alapernaarsuinermut nakkutilliinermullu, taamatullu aamma sumiffimmik atuerusuttunut siunnersuisarnissamut nukissaqartoqassani.
Tamanna tunngavigalugu Josef Motzfeldtip ulloq 9. februar Nuummi nunat avannarliit isumasioqatigiinneranni oqaaseqarnermini manna tikkuaqqippaa:
"Nunat avannarliit suleqatigiinnerata EU-llu, tamarmik issittumi suleqatigiinnermik pingaartitsisut, saniatigut aamma Issittumi Siunnersuisoqatigeeqarpugut, ukiuni makkunani suleqatigiinnermik aaqqiissuussaanerusumik nassaarniarluni sukataaruteqartumik, ukiunilu kingullerni aamma suleqatigiinnermut aningaasaliissutitigut nukissanillu pilersorneqarnikkut naalakkersuinikkut pingaartinneqarnerulersimasumik.
Angusassat namminneq takkunneq ajorput. Minnerunngitsumik innuttaasut takusinnaasaannik suleqatigiinnerup inerititaqarlunilu angusaqarfiusarnissaa qularnaarniarlugu suleqatigiinnerup aningaasartaqarlunilu nukissanik immikkoortitsivigineqarluni timitalerneqarnissaa pisariaqarpoq. Aaqqissuussamik suleqatigiinnerup aamma ingerlaavartumik inerititaqarfiusumillu angusaqartarnissaq qularnaartarpaa."
Josef Motzfeldt
Inatsisartut Siulittaasuat
Paasissutissat sukumiinerusut eqqarsaatigalugit Inatsisartut Siulittaasuata oqalugiaata nittartakkami www.inatsisartut.gl-imi aaneqarsinnaavoq Josef Motzfeldtilu oqarasuaat angallattagaq 55 76 41 attaveqarfigalugu pissarsiarineqarsinnaalluni.