2024 2023 2022 Flere år...
02-03-2011
Innuttaasut oqartussaaqataaneranni inuusuttut sunniuteqarsinnaanerata ilaa annaasimavarput?
Siumup Inuusuttunut Suleqatigiiffiata SIS-ip siulittaasua Kaalinnguaq Siegstad siulittaasullu tullia Benjamin Kielsen ataasinngornermi ulloq 7. februar 2011 tusagassiorfinnut nalunaaruteqarput "Inuusuttunut sullissineq siunissaqartinneqanngitsoq" qulequtsiullugu Sermitsiami nr. 6-imi ilanngunneqartumik.
Tusagassiorfinnut nalunaaruteqartut ilaatigut allapput
"naalakkersuinikkut siuttugut inuusuttunik ipisitsisutut isigaavut,
inuusuttut inatsisartui inuusuttut kommunalbestyrelsillu
ingerlanneqartarnerat unitsinnikuuaat allanillu
periarfissinnata". Inuusuttut
kommunalbestyrelseqartarsimanerat matumani
oqaasissaqarfiginngilara.
Ajuusaarnarpoq inuusuttunut naalakkersuinikkut
suliniaqatigiffiup pineqartup Inatsisartunit ulloq 23. juni 2010
tusagassiorfinnut nalunaarummi atuarneqarsinnaasutut siunnersuutit
samminngimmagit, tusagassiorfinnummi nalunaarummi pineqartumi
maannamut inuusuttunut inatsisartoqartitsisarnerup ilusaata
aaqqissuussinermik ullutsinnut naleqqunnerusumik
taarserneqarnissaanut suliniutit nutaat
ilisimatitsissutigineqarmata, taakkulu timitalerneqarnissaat suli
sulissutigineqarluni. Aaqqissuussisarnerup ilusaata
allanngortinneqarnissaanik aalajangiisoqarpoq isumaqarnarmat
maannamut aaqqissuussinerusarsimasut taamatut isikkoqartillugit
inuusuttunut ilinniarfinnullu naammattumik
soqutiginarunnaarsimasut.
Inuusuttut inatsisartoqartinneqarnerannik isuma sunik
tunngaveqarnersoq, sooq ukioq manna inuusuttut
inatsisartoqartinneqassannginnersut ukioq mannalu taamatitsineq
innuttaasut oqartussaaqataanerannut ajortumik kinguneqartussatut
sooq pisuutinneqarsinnaannginnersoq
nassuiaateqarfigilaarniarpakka.
SIS-ip tusagassiorfinnut nalunaarutaani
oqaatigineqartutut Inuusuttut Inatsisartuinik tallugit
aaqqissuussisarsimanerit Naalakkersuisut ataanni suliaasutut
taassallugit paatsuuineruvoq. Inuusuttut
inatsisartoqartinneqartarnerat Inatsisartunit isumagineqarluni
pilersaarusiorneqartarpoq. Taamaalillunilu Inatsisartut
Siulittaasoqarfiat tassaavoq ukiut ingerlanerini inuusuttut
inatsisartoqartinneqartarnerannik qularnaarinnillunilu
pingaartitsisimasoq, taamaaliornikkut inuusuttut nunatsinni
innuttaasut qinikkat aqqutigalugit oqartussaaqataanerannik
paasinninnerunissamut periarfissikkumallugit.
Inuusuttut
Inatsisartui Inatsisartut paasisitsiniaallutik suliarisartagaasa
ilagiinnarpaat
Inuusuttut Inatsisartuinik taallugu aaqqissuussisarneq
siulittaasoqarfiup nalinginnaasumik paasisitsiniaalluni
suliarisartagaasa ilagiinnarpaat, periarfissiissutaavoq
Inatsisartut Naalakkersuisullu akornanni taamatullu aamma
inuiaqatigiit sinnerinut
sunniivigeqatigiittarnermik inuusuttut namminneq
misigisaqarnissaannut paasinninnissaannullu. Taamaattumik maannamut
inuusuttut inatsisartoqartarneri imatut aaqqissuunneqartarsimapput
inuusuttut inatsisartuinut peqataanissamik aaqqissuussineq
piareersarnerlu annerusumik ilinniarfiit aqqutigalugit
pisarsimalluni, taamaaliornikkut aamma ilinniarfiit
periarfissikkusullugit nunatsinni naqisimaneqarani qinikkat
aqqutigalugit naalakkersueqataanermi oqartussaaffiit pillugit
ilinniartitsinermik aaqqissuussisinnaanissamut.
Taamaattumik inuusuttut inatsimmi
aalajangersagaqarneralugu Inuusuttut Inatsisartuini peqataanissaq
piumasarisinnaanngilaat, soorlu aamma inuusuttut tamarmik
peqataasinnaanngitsut, piumasaqaataammammi inuusuttut
inatsisartuinut peqataannginnerminni inuusuttut ilinniarfinni
piareersaqqaarsimanissaat.
Inuusuttut inatsisartui 2003-miit siulittaasoqarfiup
ataani ingerlanneqartartunut aalajangersimasumik ilaalerput.
2003-miilli ukioq allortarlugu pingasoriarluni inuusuttunut
inatsisartoqartitsisoqarsimavoq. 2009-mili kingullermik inuusuttut
inatsisartoqartinneqarnissaannut atatillugu paasinarsivoq
inuusuttut inatsisartuinut peqataanissamik soqutiginninneq
annikilliartulersimasoq. Tamannarpiarlu pissutigalugu taamanikkut
inuusuttunut inatsisartoqartitsinissaq qaammammik ataatsimik
kinguartinneqartariaqarsimavoq, pilersaarutigineqartutut 2009-mi
januaarimi ingerlanneqarani aatsaat februaarimi
ingerlanneqarluni.
2011-mi tullianik inuusuttut
inatsisartoqartinneqarnissaannut pilersaarusiorneq 2010-mi
aallartippoq.
2011-mili inuusuttut inatsisartoqartinneqarnissaata
piareersarnerani 2010-mi juunimi paasinarsereerpoq peqataanissamut
nalunaarnissamut soqutiginninneq
annertugisassaanngitsoq.
Taamaattumik siulittaasoqarfiup 2010-mi juunimi
aalajangerpaa inuusuttut inatsisartuinik allatut
aaqqissuussisinnaaneq ujartorneqalissasoq. Inuusuttut inatsisartui
ukiut ingerlanerini ilinniarfinniit inuusuttunit
peqataaffigineqartarsimapput, inuusuttut inatsisartuini
ilaasortaannartut inissisimasartunik, tamatumunngalu tapiliullugu
naalakkersuinikkut suliniaqatigiiffiit inuusuttaat inuusuttut
inatsisartuini peqataatitassaminnik ataatsimik toqqaasarput
inuusuttut inatsisartuisa Naalakkersuisuisut
inissisimasartunik.
Soqutiginninnginneq ersersinneqartoq tunngavigalugu
Siulittaasoqarfiup aalajangerpaa siunissami taamatut inuusuttunut
inatsisartoqartitsisarnermi sammivik allanngortinneqartariaqartoq
sivisussusigisartagaalu eqqarsaatigineqaqqittariaqarluni,
taamaattumillu aamma aalajangerneqarluni siunissami meeqqat
atuarfianni klassit angajulliit aallaavigineqartalissasut, soorlu
aamma eqqarsaatigineqartoq siunissami inuusuttut
inatsisartoqartarnissat ullormik ataasiinnarmik
sivisussuseqartassasoq, maannamut ullunik pingasunik-sisamanik
sivisussuseqartarsimagaluarluni. Taamaattumik siunissami inuusuttut
inatsisartoqartinneqartarnissaata ilusissaa eqqortoq
nassaariniarlugu suli suliaqartoqarpoq.
Taamaattumik eqqunngilaq oqaatigissallugu inuusuttut
inatsisartoqartinneqartarnerat taamaatiinnarneqarsimasoq
sipaarniarneq pissutigalugu. Kinguartinneqaannarpoq paasinarsimmat
ilinniarfiit aaqqissuussinerup taamatut isikkoqartinneqarneratigut
eqeersimaartumik peqataasinnaanerat ajornarsisimasoq, tamannalu
tunngavigalugu suleriaqqittariaqarluta.
Inuusuttut
Inatsisartuinut peqataneq tigussaasumik naalakkersuinikkut
sunniuteqarfiusinnaava?
Pingaaruteqarpoq erseqqissassallugu Inuusuttut
Inatsisartuinut peqataaneq inuusuttut allat akigalugit
tigussaasumik naalakkersuinikkut sunniuteqarnissammik
inuiaqatigiinni inuusuttut immikkoortut toqqakkalluunniit
periarfissinngimmagit. Inuusuttut Inatsisartui Inatsisartunut
qinikkanut taartaanatillu tapertaanngillat. Innuttaasut
kikkulluunniiit naalakkersuinikkut sunniuteqarusuttut
taamaalillutik taamatut sunniuteqarniarsinnaajuarput
naalakkersuisunikkut suliniaqatigiiffiit
soqutigisasaqaqatigiiffiillu pioreersut aqqutigalugit. Inuusuttut
inatsisartoqartinneqarnerata kinguartinneqarnerataluunniit
innuttaasut qinikkat aqqutigalugit oqartussaaqataanerat
naalakkersuinikkulluunniit ingerlatsineq atuuttoq
allanngortinnavianngilaat. Inuusuttut
inatsisartoqartinneqartarneratigut nunatsinni innuttaasut allat
mattunneqanngillat nutaarsiassaqartitsivinni isummaminnik
saqqummiussinissaannut imaluunniiit inunnut attaveqarfigerusutanut,
peqatigiiffinnut attaveqaqatigiiffinnulluunniit allanut
saaffiginninnissamut arlaannik uummammioqaraanni.
Josef Motzfeldt
Inatsisartut Siulittaassuat
Paasissutissat
sukumiinerusut Inatsisartut Siulittaasuat Josef Motzfeldt
angallattagaq 55 76 41 attaveqarfigalugu
pissarsiarineqarsinnaapput.