2024 2023 2022 Flere år...
04-03-2011
Kristian Jeremiassen Siumullu Kukkunersiuinermut Ataatsimiititaliap suli inissititerluni ataatsimiissimannginnera pillugu ernummatissaqarpat?
Sermitsiap nittartagaani ulloq 3. marts 2011 atuarneqarsinnaavoq Siumut oqaaseqarsimasoq kukkunersiuinermut ataatsimiititaliap suli inissititersimannginnera pillugu.
Allaaserisami ilanngullugu allassimavoq "Maannakkut Kristian Jerimiassen Siumut sinnerlugu Inatsisartunut ilaasortaq, Inatsisartut siulittaasoqarfiannut allagaqaateqarpoq kukkunersiuinermut ataatsimiititaliaq suli ataatsimiissimanngitsoq, siulittaasoqarfillu qinnuigalugu kukkunersiuinermut ataatsimiititaliap sulinerata unittuunnginnissaanik qulakkeerinnissasoq. "
Ilumoorpoq Aningaasaqarnermut Ataatsimiititaliamut aamma Kukkunersiuinermut Ataatsimiititaliamut ilaasortassanik nutaanik ulloq 1. marts qinersisoqarmat Inatsisartut suleriaasianni aalajangersakkat nutaat naapertorlugit. Suleriaaseq allanngortinneqanngikkallarmat ataatsimiititalianut pineqartunut ilaasortassanik qinersineq ukiakkut ataatsimiinnermi pisaraluarpoq. Inatsisartut suleriaasiat nutaaq ulloq 1. decembar 2010 atuutilerpoq.
Uanga Inatsisartut siulittaasuattut suliassaraara isumagissallugu Inatsisartuni ataatsimiititalianilu sulinerup illersorneqarsinnaasumik pilersaarusiorneqarlunilu ingerlanneqartarnissaa, taamaattumillu ullumi Kristian Jeremiassen oqaloqatigisimavara malugeqqullugulu Kristian Jeremiassen nammineq tassaammat kukkunersiuinermut ataatsimiititaliami sivisunerpaamik ilaasortaasimasutut ataatsimiititaliap pilersinneqarnerata kingorna sapaatip akunnera ataaseq qaangiutsinnagu kukkunersiuinermut ataatsimiititaliami inissititernissamut ataatsimiigiaqqusisussaq. Peqatigitillugu kaammattorpara kukkunersiuinermut ataatsimiititaliap allattoqarfianut attaveqaqqullugu, kukkunersiuinermut ataatsimiititaliamut ilaasortassanik nutaanik qinersineq ullunik pingasunik qaangiutiinnartoq ataatsimiititaliap sulinerata unittoornissaa ernummatigisimaguniuk. Ernummateqarneq tamanna nammineq paasisinnaanngilara, tassami Kukkunersiuinermut ataatsimiititaliap Nunatta Karsiata 2010-mut naatsorsuutaanik misissuataarinninnera pissutissaqavissumik suli aallartissinnaanngimmat. Nunatta Karsiata naatsorsuutai suli tamanut saqqummiunneqanngillat, Inatsisartunilu siullermeerlugit oqaluuserineqarnissaata ulloq 13. april, Inatsisartut upernakkut ataatsimiinneranni ullormi ataatsimiiffiusumi kingullermi, pinissaa naatsorsuutigineqarluni.
Nunatta Karsiata naatsorsuutai ileqquusutut 2011-mi ukiakkut ataatsimiinnermi aappassaaneerneqassapput.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.