2024 2023 2022 Flere år...
09-05-2011
Kalaallit Nunaanni suliffiit attatiinnarneqarnissaat
SIK-mi siulittaasup maajip aallaqqaataani oqalugiarnermini
Inatsisartut nunani allani naqiterisitsisarnermikkut
maligassiuinerluttutut isornartorsiorpai, tamannalu
ileqqorissaarnermut illersorneqarsinnaanngitsutut SIK-mit
isigineqarpoq.
Taamaalillutik Inatsisartumik tamanut ammasumik
pingaarnersiuillunilu eqqunngitsumik nittarsaanneqarput.
Ileqqorissaarneq illersorneqarsinnaasoq
SIK-mi maajip aallaqqaataani oqalugiaammi una qulequtsiullugu
ammasumik apeqquserneqarpoq: "Nunanut allanut suliakkiipput",
imatut paasillugu Inatsisartut pingaarnersiuillutik suliassaatitik
nunani allani suliaritittaraat, taamaalilluni oqqassutaasinnaasoq
oqaatigineqarluni - "Ileqqorissaarnikkut illersorneqarsinnaanngilaq
Namminersorlutik Oqartussat aamma Brugsen - oqariaaseqartoq
"kalaallit piat" - ajornartoornerup nalaani naqitassaminnik nunatta
avataanut, Islandimut Danmarkimullu, imissuteqartuarnerat."
Brugsen sinnerlugu akissanngilanga. Piviusorli tassaavoq
Inatsisartut Allattoqarfiat 2010 siullermeerluni suliat arlaqartut
tamatumanittaaq 2009-mut Inatsisartut ukiumoortumik nalunaarutaat
Islandimi suliaritimmagit. Naqitassaatimi suliallu
nutarternissaanut periarfissat siusinnerusukkut nunatsinni
naqiterisitsisarfimmit Inatsisartut Allattoqarfianut
neqeroorutigineqarsimanngitsut Inatsisartut Allattoqarfiata
naammattoorsimavai. Ullutsinnut malinnaanissaq Inatsisartut
Allattoqarfianit kissaatigineqarpoq. Pissutissatsialaat malillugit
tamanna Inatsisartut Allattoqarfianit nunanut allanut
Inatsisartullu Allattoqarfianut niueqateqarusuttunut
piumasaqaataasinnaasariaqarpoq pissusissamisoortoq. Tamanna ima
paasineqassaaq Inatsisartut aningaasaatitik nioqqutinut
pitsaanerpaanut atorusukkaat.
Naqiterisitsisarfiup nammineq suliassaatini nunani allani
isumagitittarpai
Taamaakkaluartoq naqitertinniagaq Inatsisartut ukiumorrtumik
2009-mut nalunaarutaat nunatsinni naqiteriviup aningaasarliornerata
nalaani pivoq, taamaattumillu tusagassiuutit aqqutigalugit
naqiterisitsisarfiup taassuma Inatsisartut Islandimi suliassanik
naqiterisitsisartutut pasillerpai. Naqiterisitsisarfik
nioqqutigisartakkaminik neqerooruteqarniarluni taamaalillunilu
akimik pitsaassutsimillu unammillersinnaasumik kiffartuussaminut
qulakkeerinninniarluni nammineerluni Inatsisartunut
saaffiginnissinnaasimagaluarpoq. Nunatsinni naqiterisitsisarfimmit
kiffartuussassatut ilumut amigaataanini Inatsisartut
Allattoqarfiata taamanikkut ilisimanngilaa.
Taamaattoq kingullermik ukiumoortumik nalunaarusiap
naqiterneqarneranut isornartorsiuineq Inatsisartut paasisimavaat,
nunatsinnilu aamma avataaneersunit naqiterivinnit
neqeroortitsilluni. Naalakkersuinikkut mianerisassat
tunngavigalugit nunatsinni naqiterisitsisarfik toqqarneqarpoq,
tamatuma mianerisariaqarnerata naqiterisitsisarfimmit
kissaatigineqarnera tunngavigalugu. Neqeroorummut akigitinneqartoq
pitsaanerpaanngilaq, taamaattorli suliassaq nunatsinni
naqiterisitsisarfimmut tunniunneqarpoq.
Taamaakkaluartoq Ukiumoortumik nalunaarusiamut
piffissaliuunneqarpoq naammat Inatsisartut Allattoqarfiata
pisiarineqartoq isumaqatigiissutigineqartutut pitsaassusilik
tigunngilaa, taamaanneranilu naqiterisitsisarfiup nammineerluni
nassuiaatigaa suliap naqiterneqarnera Danmarkimi
ingerlanneqarsimasoq.
Suliap nunatsinni naqiterivimmit suliarineqarsinnaannginnera
Inatsisartut Allattoqarfianut oqaatigineqarsimananiluunniit
ilimasaarutigineqarsimanngilaq. Tamanna iluarinanngilluinnarpoq
isumaqatigiissuteqartummi tamarmik ilisimavaat suliassaq nunatsinni
naqiterisitsisarfimmut tunniunneqarsimasoq pitsaassuseq aamma
akigititaq nunani allani naqinneqarnerasut
assersuunneqarsinnaanersoq takorusullugu.
Kina ileqqorissaartuunersoq aperisoqarsinnaavoq. Taamaattumik
kikkunnit kikkunnulluunniit eqqumaffigineqassanersoq
nalileruminaappoq. Isummanik aalajangiussisimanissaq pisariaqarpoq,
pisariaqanngitsumillu misissuilluaqqaarani
uppernarsarneqarsinnaanngitsumik isornartorsiuinissaq
pisariaqarani.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef
Motzfeldt angallattagaq 55 76 41 attaveqarfigalugu
pissarsiarineqarsinnaapput.