2024 2023 2022 Flere år...
17-05-2011
Inatsisartut Siulittaasoqarfiat ulluni 10. - 13. maj Canadami Newfoundlandimut tikeraarpoq
Siulittaasoqarfik ulluni 10. - 13. maj Newfoundland aamma
Labradorimut pisortatigoortumik tikeraarpoq.
Newfoundland aamma Labrador Canadami naalagaaffeqatigiit provinsit
kangillersaraat 500.000 missaannik inulik inatsisartunullu
qinersivinnut 48-nut tamarmik immikkut ataatsimik inatsisartunut
qinersiviusartunut agguataarneqarsimasoq, taamalu Newfoundland
aamma Labradorimi inatsisartut 48-nik ilaasortaqarlutik.
Newfoundlandimi aningaasaqarniarneq aalisarnermik
inuussutissarsiuteqarnermik uuliasiornermillu suliffissuaqarnermik
tunngaveqarpoq. Aalisarnermik inuussutissarsiuteqarneq
uuliasiornermik suliffissuaqarnermik inuussutissarsiuteqarnerup
aallartinnginnerani qangaaniilli inuussutissarsiutit
pingaarnersarisimavaat, sulilu ullumikkut inuiaqatigiit
aningaasaqarniarnerannut uuliasiornermik suliffissuaqarnermik
inuussutissarsiuteqarneq naligalugu pingaaruteqarluni.
Aalisarnermik inuussutissarsiuteqarnermik ingerlatsisut pissutsinut
nutaanut ikaarsaariarnermut naleqqussarnerat annerusumik pisimavoq
aalisartut aalisartutut inuussutissarsiuteqarnerminnik
attassiinnarnermik saniatigut minnerunngitsumik niuernermut
tunngasunik ilinniaqqittarsimanerisigut. Aalisarnermik
inuussutissarsiuteqarneq nunatsinnisut saarulliit tammakarnerannut
naleqqussarsimavoq, soorlu aamma aalisariuteqassuseq aalisakkat
aalisarneqarsinnaasut nikerarnerat malillugu imminut
naleqqussartuartoq.
Siulittaasoqarfik Newfoundland aamma Labradorip inatsisartuinut
The House of Assembly pulaarpoq, tassanilu inatsisartunut
siulittaasuusoq Speaker of the House Hon. Roger Fitzgerald
naapeqatigalugu.
Siulittaasoqarfik inatsisartuni naalakkersuisunik apeqqarissaarneq
malinnaavigaat, tassanilu oqalliseriaasseq ataatsimiittarfimmilu
ileqqulersuutaasartut maluginiagassat allat misigisaqarfigalugit.
Maluginiakkat ilagaat ilaasortat ataatsimiittarfimmut iseraangamik
anileraangamillu siulittaasoq saallugu sikkivigisarmassuk, soorlu
aamma inatsisartuni aatsisartut ilaasortanik siulittaasumillu
sullissisut piffissap oqaaseqarfiusinnaasup qaangerneqalernera
malugeqqullugu siulittaasoq nikuikkaangat nikueqataasartut.
Newfoundland aamma Labradorimi naalakkersuinikkut aaqqissuussaaneq
inatsisartullu suleriaasiat tuluttoorpalaartorujussuupput, taamalu
aamma maani inatsisartuni sulisarnermut imaaliallaannaq
sanilliunneqarsinnaanatik. Taamaakkaluartorli siulittaasoqarfik
nunatsinni Inatsisartuni sulinerup pitsanngorsartuarneqarnissaanik
suliniarnerminut atorsinnaasaminik nunani allani inatsisartunut
tikeraartarnermigut isumassinneqartuartarpoq.
Siulittaasoqarfik taamatuttaaq Newfoundland aamma Labradorimi
ministeriunerup Ms. Kathy Dunderdale-ip, 2010-mi ukiakkut Nuummut
tikereernermini Inatsisartunut nammineq pulaarsimasup,
naapeqatiginissaanut periarfissaqarsimavoq.
Siulittaasoqarfik inatsisartuni pissarsiviusumik
ataatsimeeqateqartarnermi saniatigut taamatuttaaq naalakkersuisut
sinnissaanik aalisarnermut ministerimik Clyde Jackmanimik
aatsitassarsiornermullu ministerimik Shawn Skinnerimik
ataatsimeeqateqarput, taamatullu aamma St. Johnsimi imavinni
pissutsinik ilisimatusarfik Marine Institute pulaarlugu. Marine
Institute amerikap avannarliup nunavittaani imarsiornermik
imavinnullu tunngasunik ilinniarfinni siuttuuvoq, 2015-ilu
angutinnagu nunarsuarmi siuttunngornissaminik anguniagaqartoq.
Ilisimatusarfiup pisortaata Gerald Andersonip ilanngullugu
ilisimatitsissutigaa uuliasiornermik suliffissuaqarnermi
inuussutissarsiornermik ineriartortitsinissami nunatsinni
siunissami ilinniartitaanikkut periarfissat ineriartortinneqarnerat
eqqarsaatigalugu nunatsinni oqartussanik ilinniarfinnillu
suleqateqarnerit aallartinneqareersut.
Josef Motzfeldt
Inatsisartut Siulittaasuat
Paasissutissat sukumiinerusunut Inatsisartut Siulittaasuat Josef Motzfeldt angallattagaq 55 76 41 attaveqarfigalugu pissarsiarineqarsinnaapput.