2024 2023 2022 Flere år...
25-05-2011
Nunat Avannarliit Killiit Siunnersuisoqatigiiffiata siulittaasoqarfiata EU-parlamentimut ilaasortaanit tallimanit Nuummi tikeraarteqarnera
Nunat Avannarliit Killiit Siunnersuisoqatigiiffiata (NAKS)
siulittaasoqarfiata Nuummi ulluni 19. - 20. maj ataatsimiinneranut
atatillugu siulittaasoqarfik EU-parlamentimut ilaasortanit
tallimanit tikeraarneqarpoq.
EU-p inatsisartuinit aallartitat
tassaapput:
Aallartitat siuttuat Mr. Pat the Cope Gallagher (Irland) ilaatigut
EU-mi inatsisartut aalisarnermut ataatsimiititaliaannut
ilaasortaasoq, Mr. Petru Luhan (Rumania) ilaatigut EU-mi
inatsisartut nunap immikkoortuinik ineriartortitsinermut
ataatsimiititaliaannut ilaasortaq, Ms Zuzanna Brzobohata (Tjekkit
kunngiitsuuffiat) ilaatigut EU-mi inatsisartut nunap
immikkoortuinik ineriartortitsinermut ataatsimiititaliaannut
ilaasortaq, Mr. Alyn Smith (England) ilaatigut EU-mi inatsisartut
nunalerinermut aamma nunap immikkoortuinik ineriartortitsinermut
ataatsimiititaliaannut ilaasortaq aamma Ms Sabine Wils (Tyskland)
ilaatigut EU-mi inatsisartut Avatangiisinut, Peqqissutsimut
Isumannaatsumillu nerisassaqarniarnermut ataatsimiititaliaannut
ilaasortaq.
NAKS-ip siulittaasoqarfiata ataatsimiinnera
NAKS-ip siulittaasoqarfia, siulittaasoq Ólína Þorvarðardóttir
Islandimit, Kári P. Højgaard Savalimmiunit Josef Motzfeldtilu
nunatsinniit, siullermik ataatsimiipput utoqqarnut inissiat
eqqarsaatigalugit siunissami nunani avannarlerni killerni
aaqqiissutissat qulequtaralugu Savalimmiuni ulloq 7. juni
ataatsimeersuartitsinissamik aamma Atlantikup Avannaani imaatigut
angallannermi isumannaallisaaneq pillugu 9. juni
ataatsimeersuartitsinissamik siulittaasoqarfiup pilersaarusiornera
oqaluuseralugu.
EU-parlamentip NAKS-illu pingajussaanik
ataatsimeeqatigiinnerat
Tamanna pereermat NAKS-ip siulittaasoqarfiata EU-mi inatsisartunut
ilaasortat tallimat peqatigalugit EU-mi Nunanilu Avannarlerni
Killerni inatsisartut akornanni ataatsimeeqatigiinnerit pingajuat
ingerlappaat, tamatumani qulequttat arlallit ataatsimut
soqutigisaqarfigisat pillugit pisunik kingullernik
ilisimateqatigiinnissamut periarfissaqarsimalluni.
Illuatungeriit ujarlertarnernut annaassiniartarnernullu (SAR)
upalungaarsimaneq pillugu Issittumi Siunnersuisoqatigiit
qanittukkut isumaqatigiissutaata imarisai oqallisigaat. EU-mi
inatsisartunut ilaasortanit ilisimatitsissutigineqarpoq ulluni
makkunani Tuluit Nunaanni nunanilu allani pisortani ingerlatani
annertuumik sipaarniartoqarnera pissutigalugu aningaasatigut
killiliussassat isumaqatigiissutip imarisaasa
piviusunngortinneqarnissaanut pisariaqartut qanoq
qularnaarniarneqarnersut isumaqatigiissutip imarisai
aallaavigalugit takujuminaatsut, tamannalu suliassap
malitseqartinneqarnerani EU-mut ilaasortanit
pingaartinneqarumaartoq.
Illuatungeriit taamatuttaaq silap pissusiisa allanngoriartornerisa
malitsigisaanik tamatuma Nunani avannarlerni killerni inuiaqatigiit
aningaasaqarniarnerannut sunniutai oqallisigaat, soorlu aamma
EU-mut puisinit nioqqutissianik eqqusseqqusiunnaarneq,
aalajangersakkullu tamatuma minnerunngitsumik nunatsinni
piniartukkormiut aningaasaqarniarnerannut nalinginnaasumillu
puisinit nioqqutissianik avammut tuniniaanermut inuiaqatigiit
aningaasaqarniarnerannit isigalugu ilungersunartumik eqquisimanera
pillugit suliami isummat erseqqissarneqarnissaannut
periarfissaqarsimasoq. Aallartitat siulittaasuata Mr. Pat the Cope
Gallagherip puisinit nioqqutissianik eqqusseqqusiunnaarnermut
naggueqatigiit Inuit nioqqutissiaasa ilaatinneqannginnerannik
oqallisiginninneq tunngavigalugu suliaq pillugu EU-mi
tusarniaasoqarnissaa sulissutiginiarpaa, oqaatigalugu
tusarniaanermi suliassaq pillugu paasissutissat piviusut,
assersuutigalugu puisit amiisa avammut tunineqartartut amerlassusii
il.il. pillugit paasissutissat paasissutissallu allat inerteqqummit
naggueqatigiit Inuit eqqorneqarsimanerannik takutitsisinnaasut
tunngaviusariaqartut.
Illuatungeriit taamatuttaaq EU-p aalisarnermut politikkimik
tamarmiusumik nutarteriniarluni suliniarnera oqallisigaat. Kikkut
tamarmik naammagisinnaasaannik EU-p aalisarnermut
politikkeqarnissaa siusinnerusukkut sulissutigineqarsimagaluarpoq,
EU-lli iluani aalisarnermik inuussutissarsiuteqarnermi
ajornartorsiutit assigiinngitsorpassuit nassuerutigalugit maanna EU
nunat immikkoortukkuutaarlugit aalisarnermut politikkeqalernissamut
samminerusumik suliniuteqalersimavoq, taamaalillunilu aalisarnermut
politikki nunani immikkoortuni aalisarnermik
inuussutissarsiuteqarnermut aalisakkatigullu periarfissanut
annerusumik naleqqussarneqartussanngorlugu.
EU-p inatsisartuinut ilaasortat taamatuttaaq kissaatigisimavaat
Nuumminnerminni pisortat aallartitaannik sapinngisamik
amerlanerpaanik naapitaqarnissartik, taamaattumillu aamma
periarfissaqarsimallutik Naalakkersuisut Siulittaasuannik Kuupik
Kleistimik, Inuussutissarsiornermut Aatsitassanullu
Naalakkersuisumik Ove Karl Berthelsenimik Aalisarnermullu
Naalakkersuisumik Ane Hansenimik ataatsimeeqateqarnissaminnut.
Taakku saniatigut aamma Inatsisartut Aatsitassanut
ataatsimiititaliaannut Aalisarnermullu Ataatsimiititaliaannut
ilaasortanik, ICC-mik kiisalu aamma Greenland Developmentimik
ataatsimeeqateqarput, tassani ALCOA-p aluminiuliorfimmik
pilersaarutaa pillugu ilisimatinneqarlutik.
EU-p inatsisartuinut ilaasortanit tikeraarteqarneq pillugu
Nunat Avannarliit Killiit Siunnersuisoqatigiiffiannut Kalaallit
Nunaannit aallartitat siulittaasuat Josef Motzfeldt ima
oqarpoq:
"EU-p issittumut soqutiginninnerata annertusiartornera ilutigalugu
soqutisat pitarlugit naapittarnissaq suleqatigiinnissarlu
pingaaruteqarput, taamaattumillu EU-mit aallartitanik
oqaloqateqarneq assut pingaaruteqarluni paasissutissat maani
pissarsiarineqartut EU-mi aalajangiisartunut sapinngisamik
amerlanerpaanut apuussinnaanissaat eqqarsaatigalugu.
Puisinit nioqqutissianik EU-mut eqqusseqqusiunnaarsimaneq
ammasumik oqallisigineqarpoq. NAKS-ip siulittaasoqarfiata
sakkortuunik oqaaseqarluni puisinit nioqqutissianik EU-mut
eqqusseqqusiunnaarneq, suliassami naalakkersuinikkut isummanik
tunngaveqarani, misigissutsinik tunngaveqarnerarpaa, tamannalu
siulittaasoqarfiup eqqarsarnartutut isigalugu, minnerunngitsumik
tamanna siunissami aamma EU-mi aalajangiisarnissanut
tunngaviussappat. EU-p inatsisartuinit aallartitat siulittaasuata
Mr. Pat the Cope Gallagherip pisuussuutit uumassusillit
piujuaannartitsinermik tunngaveqarluni
iluaqutiginiarneqarnissaannik tunngaveqanngitsumik EU-p
aalajangersimanera eqqumaffiginerarpaa, oqaatigalugulu taamatut
aalajangertarnerit kukkusumik tunngaveqarnerat EU-p iluani
naalakkersuinermik sulialinnut paasitinniassallugu
imaannaanavianngitsoq. Taamaattumik nuannaarutissaavoq aallartitat
siulittaasuata EU-mut puisinit nioqqutissianik
eqqusseqqusiunnaarnerup naggueqatigiinnut Inunnut atuutinnginnera
pillugu EU-mi tusarniaasoqarnissaa sulissutiginiarmagu."
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef
Motzfeldt angallattagaq 55 76 41 attaveqarfigalugu
pissarsiarineqarsinnaapput.