2024 2023 2022 Flere år...
08-06-2011
Nunat Avannarliit Killiit Siunnersuisoqatigiiffiat aalajangersimasumik qulequtaqartitsilluni ataatsimeersuartitsinimi 14-issaat Savalimmiuni ammarpaa.
Nunat Avannarliit Killiit Siunnersuisoqatigiiffiat aalajangersimasumik qulequtaqartitsilluni ataatsimeersuartitsinimi 14-issaat Savalimmiuni ammarpaa, tamatumani qulequttat pingasut ulluni pingasuni sammineqassallutik, ullormilu siullerni Nunani avannarlerni killerni utoqqarnut inissiat eqqarsaatigalugit siunissami aaqqiissutaasinnaasut sammineqarlutik. Ullut aappaanni sammineqassaaq Atlantikup Avannaani imaatigut ajutoortoqarsinnaaneranut upalungaarsimaneq, Nunat Avannarliit Siunnersuisoqatigiiffiat NORA-lu suleqatigalugit ingerlanneqartussaq. Kiisalu aalajangersimasumik qulequtaqarluni ataatsimeersuarneq naammassineqassaaq Seas of the Future (Siunissap Imavii) qulequtaqartillugu Nunani Avannarlerni Ministerit Siunnersuisoqatigiiffiata peqatigitillugu ataatsimeersuartitsineranut peqataanermik.
Ataatsimeersuarneq aallartinneqarpoq ukiorpassuarni Nunat
Avannarliit Killiit Siunnersuisoqatigiiffianni ilaasortaasimasoq
Jonathan Motzfeldt eqqaaniarlugu minutsi ataaseq Utoqqarnut
inissiat pillugit ataatsimeersuarnermut suliamut tunngatillugu
immikkut ilisimasallit, soqutigisaqaqatigiiffiit
naalakkersuinernillu suliallit saqqummiussisussatut
aggersarneqarsimapput.
Sulianut tunngatillugu immikkut ilisimasalinnit Nunat Avannarliit
Killiit Siunnersuisoqatigiiffiannut aallartitat nunani
assigiinngitsuni utoqqarnik inissaqartitseriaatsit pillugit
saqqummiussuiffigineqarput. Saqqummiinertigut taakkunuuna erserpoq
utoqqarnut inissiat utoqqaat qanoq annertutigisumik
paaqqutarineqartariaqarnerannut attuumassuteqarluinnartut,
taamatullu aamma napparsimaneq pissutigalugu annertuumik
paaqqutarineqartariaqarneq imaluunniit utoqqaat naapertuuttumik
ineqarnissaasa qulaarneqarnissaanik pisariaqartitsineq kisimi
pineqarnersoq. Utoqqarnut tunngasut aningaasalersorneqarnerata
nunani avannarlerni killerni aamma ilisarnaatigaa pisortanit
pigineqarlunilu ingerlanneqarnini, assigiinngissutigaluguli
aningaasartuutit taakku innuttaasut, kommunit naalagaaffiullu
akornanni qanoq agguataarneqartarnerat. Ilisarnaataavortaaq
siunissami utoqqarnut inissialiortarnissami kissaatigineqarmat
taakku sapinngisamik nammineq angerlarsimaffittut, piffissap
ingerlanerani sananeqartarsimasutut aamma ataatsimeersuarnermi
assersuutitut saqqummiunneqartutut immikkut
inissiisarfittuunngitsoq, misiginartarnissaat.
Ataatsimeersuarnermi taamatuttaaq Islandimiit Kalaallit
Nunaanniillu illussanik titartaasartunit siunissami utoqqarnut
inissialiaasarsinnaasunut assersuutinik saqqummiussisoqarpoq
inissiisarfiinnarnut annertuunut taarsiullugu
susassareqatigiiffiusunik inissialiortoqartarnissaanik
piumasaqaammik naammassinnittunik.
Immikkut ilisimasallit saqqummiussinerini Savalimmiuni Kalaallit
Nunaannilu utoqqaat kattuffiisa sinniisaannit saqqummiussinermik
malitseqartinneqarput. Utoqqaat saqqummiinerisigut aamma erserpoq
utoqqaat tupinnanngitsumik sapinngisamik sivisunerpaamik namminneq
angerlarsimaffigisaminni eqqaaniluunniit najugaqaannartarnissartik
kissaatigigaat utoqqaat annerusumik innarluuteqanngitsut
eqqarsaatigalugit ataatsimoorfiusinnaasunik periarfissalinnik,
taamatullu aamma utoqqarnut paaqqutarineqarnissamut
pisariaqartitsinerusut inissiat taakku pisariaqartitarpiaat
aallaavigalugit aaqqissuunneqartariaqartut. Utoqqaat kattuffiisa
sinniisaasa siunissami utoqqarnut inissialiortarnissaq
eqqarsaatigalugu naalakkersuinikkut aalajangiiniartarnernut
peqataatinneqartarnissartik pisariaqartutut aamma
erseqqissarpaat.
Kalaallit Nunaannit aallartitat siulittaasuat Josef Motzfeldt
oqarpoq:
"Innuttaasut ataasiakkaat pisortallu akornanni pitsaasumik
suleqatigiinneq toqqissisimanartumik utoqqalinerup pitsaanerpaamik
qularnaarneqarnissaanut aalajangiisuulluinnarpoq. Innuttaasuni
utoqqaanerusortatta atugaannik misissuinerit ataatsimeersuarnermi
saqqummiunneqartut takutippaat utoqqarnut inissiat
pilersaarusiorneqaannalersullu utoqqaat peqataatinneqarnissaat
qanoq pingaaruteqartigisoq. Nunani avannarlerni killerni pingasuni
tamani ukiut 20-t tulliuttut ingerlanerini utoqqaat marloriaammik
amerleriarnissaat naatsorsuutigineqarpoq. Taamaattumik aamma
sanioqqunneqarsinnaanngitsumik pisariaqarluinnarpoq pisortanit
soraarnerussutisiat kisiisa naatsorsuutiginagit namminerisamik
utoqqalinissamut ileqqaagaqarnissaq."
Kalaallit Nunaanni utoqqaat peqatigiiffiisa kattuffiata Utoqqaat
Nipaata siulittaasuat Magnus Therkelsen Aasiaat ataatsimeersuarneq
pillugu oqarpoq:
"Nunat Avannerliit Killiit Siunnersuisoqatigiivisa siunissami
utoqqaat inissiaanik angerlarsimaffissanillu sanaartornissaq
pillugu isumasioqatigiinnermi savalimmiuni peqataaninni assorsuaq
pissarsiaqarlunga oqaatigerusuppara.Tassami malugisinnaagakku
utoqqat Kattuffianiit sanaartornissamut kissatigisagut
tigulluarneqartut. Aammalu erseqqissumik malugisinnaallugu nunanit
assiginngittsunit sanaartornissamut isummersuutigut tunngavimmikkut
qanoq imminnut qanilluinnartigisut. Neriutigeqaaralu tamatuma
kinguneranik pitsanngoriaatinik maluniuttoqarumaartoq."
Aalajangersimasumik qulequtaqartitsilluni ataatsimeersuarni
angusat Nunat Avannarliit Killiit Siunnersuisoqatigiiffiata
ukiumoortumik ataatsimeersuarnissaani aggersumi aggustimi
ingerlanneqartussami oqallisigineqartunut ilaajumaarput.
Aalajangersimasumik qulequtaqartitsilluni ataatsimeersuarneq ullut
aappaanni nangeqqissaaq Atlantikup Avannaani imaatigut
ajutoortoqarsinnaaneranut upalungaarsimaneq qulequtaralugu.
Josef Motzfeldt
Inatsisartut Siulittaasuat
Paasissutissat sukumiinerusut Inatsisartut Siulittaasuat Josef
Motzfeldt angallattagaq 55 76 41 attaveqarfigalugu
pissarsiarineqarsinnaapput.